ޑޯޓްމަންޑް (ޖޫން 22) - ތުރުކީއާ ދެކޮޅަށް ޕޯޗުގަލް އިން ނުކުންނަނީ ތަފާތު ގޭމެއް ކުޅެން ކަމަށާއި އޭގެ އިތުރުން ތުރުކީ ސަޕޯޓަރުންނަށް ޕޯޗުގަލުން ސަމާލުވާން ޖެހޭ ކަމަށް އެ ޓީމުގެ ކޯޗު ރޮބާޓޯ މާޓިނޭޒް ބުނެފި އެވެ.
ޔޫރޯ ފުޓްބޯޅަ މުބާރާތުގައި ޕޯޗުގަލުން ކުޅުނު ފުރަތަމަ މެޗުގައި ޗެކް ރިޕަބްލިކް އަތުން މޮޅުވީ ފަހު ވަގުތު ޖެހި ގޯލުން 2-1 ގެ ނަތީޖާ އަކުންނެވެ. އެ މެޗުގެ ފުރަތަމަ ހާފުގައި ޕޯޗުގަލްގެ ފަރާތުން ފެނިގެންދިޔައީ ދަށް ކުޅުމެއް ކަމަށް މާޓިނޭޒް ވަނީ ބުނެފަ އެވެ.
"އެ މެޗުގައި އަހަރެމެންނަށް ފުރަތަމަ ހާފުގައި ރަނގަޅު ހަމަލާ އެއް ނޫފެއްދޭ. އެ ފުރުސަތު ޗެކުން ނުވެސް ދޭ. އެކަމަކު ވިސްނަން އެބަޖެހޭ މިކަހަލަ މުބާރާތްތަކުގައި ޕޯޗުގަލްއާ ދެކޮޅަށް ދެން ހުރި ޓީމުތަކުން ކުޅޭނީ ޑިފެންސިވް ގޭމެއް ކަން. އެ ބްރޭކް ކުރަން އެބަ ޖެހޭ" މާޓިނޭޒް ބުންޏެވެ.
މާޓިނޭޒް ބުނީ ތުރުކީން ޖޯޖިއާ މެޗުގައި ފެނިގެންދިޔައީ އެޓޭކިން ގޭމެއް ކަމަށާއި އެކަމަކު އެ ޓީމުގެ ފަރާތުން ޑިފެންސަށް ވިސްނައިގެން ކުޅޭ މަންޒަރުވެސް ފެންނަ ކަމަށެވެ.
އެހެންވެ، ޕޯޗުގަލުން މި މެޗަށް ނުކުންނާނީ އެކަން ކަމަށް ސަމާލުވެ، މެޗުން މޮޅުވެ، ދެ ވަނަ ބުރުގެ ޖާގަ އެއް ހޯދަން ކަމަށް މާޓިނޭޒް ބުނެފައިވެ އެވެ.
"ޕޯޗުގަލް އޮތީ ކޮންފިޑެންސާ އެކު, އަހަރެން އަށް އެނގޭ މި ޓީމުގެ ފެންވަރު, އެކަމަކު އަހަރެމެން އޯވާ ކޮންފިޑެންޓް ނުވާނަން" މާޓިނޭޒް ބުންޏެވެ.
މާޓިނޭޒް ބުނީ މިދިޔަ މެޗަށް ޖުމްލަކޮށް ވިސްނަންޏާ މުޅި މެޗުގައި ވެސް ފެނިގެންދިޔައީ ޕޯޗުގަލް ކުޅުނުތަން ކަމަށެވެ. އަދި އެ މެޗުގެ ސްޓެޓްސްތައް އަދި ނަތީޖާ ވެސް ބުރަ ވަނީ ޕޯޗުގަލް ކޮޅަށް ކަމަށް މާޓިނޭޒް ވަނީ ހާމަކޮށްފަ އެވެ.
މާޓިނޭޒް ވަނީ ނޫސްވެރިންގެ ބައްދަލުވުމުގައި ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އަށް މުޅި މެޗުގައި އެއްކޮށް ކުޅެން ފުރުސަތު ދެނީ ކީއްވެތޯ އެހި ސުވާލަށް ޖަވާބުދީފަ އެވެ. ޖަވާބަކީ، ރޮނާލްޑޯ އަށް ފުރުސަތު ދޭން ހައްގުވީމަ އެވެ.
މިދިޔަ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވެސް އެންމެ ބޮޑަށް ނޫސްވެރިން މާޓިނޭޒް އަށް ކުރިމަތިކުރުވީ މި ސުވާލެވެ. އެހެންވެ މާޓިނޭޒް ބުނީ މީގެ ކުރިންވެސް އެ ސުވާލަށް ޖަވާބު ދީފައިވާނެ ކަމަށެވެ.
"އަހަރެން އަށް ހީވަނީ ޓީމު ގޭމެއް ކުޅޭއިރު, އަހަރެމެން އަށް މުހިންމު ވާނީ ކޮންމެ ކުޅުންތެރިއަކުވެސް އަހަރެމެން އަށް ގެނަސްދޭ ކަންކަން ހެން. ރޮނާލްޑޯ އަހަރެމެން އަށް މި ގެނަސްދެނީ ތަޖުރިބާ, މީގެ އިތުރުން މުހިންމު ވަގުތުތަކުގައި ތަފާތު ދައްކާ ގޯލު ވެސް އެބަ ޖަހާ. އަހަރެމެން އެކަން ގަބޫލުކުރަން ޖެހޭ. މާޓިނޭޒް ބުންޏެވެ.
ރޮނާލްޑޯގެ ފިޓްނަސް އާ މެދު ސުވާލު އުފެއްދުން އެއީ ވެސް ބޮޑު މައްސަލަ އެއް ކަމަށް މާޓިނޭޒް ބުންޏެވެ. މާޓިނޭޒް ބުނީ އުމުރުން 39 އަހަރުގައި ރޮނާލްޑޯގެ ފަރާތުން ފެންނަނީ ހައިރާން ކުރަނިވި ކަންތައްތައް ކަމަށާއި, މިދިޔަ 12 މަހުގައި ރޮނާލްޑޯގެ ކުޅުމުން އެކަން ފެންނާނެ ކަމަށެވެ.
މީގެ ކުރިން ތުރުކީން ވަނީ ޕޯޗުގަލްއާ ދެކޮޅަށް ނުވަ މެޗު ކުޅެފަ އެވެ. ޕޯޗުގަލް އިން ވަނީ ހަތް މެޗުން ތުރުކީ ބަލިކޮށްފަ އެވެ. ތުރުކީ އަށް މޮޅުވެވުނީ ދެ މެޗެވެ. އެންމެ ފަހުން މި ދެ ޓީމު ކުޅުނީ ފީފާ ވޯލްޑް ކަޕް ކޮލިފައިން ޕްލޭއޮފްގައި 2022 ވަނަ އަހަރު އެވެ. އެ މެޗުން ޕޯޗުގަލް މޮޅުވީ 3-1 އިންނެވެ.
މި ފަހަރުގެ ޔޫރޯގައި މި ދެ ޓީމު ބައްދަލުކުރާ މެޗު ފަށާނީ މިރޭ 9 ޖަހާއިރު އެވެ.
