ލައިޕްޒިގު (ޖޫން 22) - ޔޫރޯ ފުޓްބޯޅަ މުބާރާތުގައި މިރޭ ނެދަލެންޑްސް އާއި ފްރާންސާއި 0-0 އިން އެއްވަރުވި މެޗުގައި ނެދަލެންޑްސްގެ ޒަވީ ސިމޯންސް ޖެހި ގޯލު ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިނުގަތް ނިންމުމަށް ގިނަ ބަޔެއްގެ ސަމާލުކަން ހުއްޓިއްޖެ އެވެ.
މިއީ އެންމެ ފަހުން ބޭއްވި ޔޫރޯގެ ގްރޫޕް ސްޓޭޖުގައި އިންގްލެންޑާއި ސްކޮޓްލެންޑް 0-0 އިން އެއްވަރުވި މެޗަށް ފަހު ޔޫރޯގައި ލަނޑެއް ނުޖެހި މެޗެއް އެއްވަރުވި ފުރަތަަމަ ފަހަރެވެ. ޔޫރޯގައި މި ނަތީޖާ އިން މެޗެއް އެއްވަރު މި ވީ 50 މެޗަށް ފަހު އެވެ.
މިރޭގެ ނަތީޖާއާ އެކު، ފްރާންސާއި ނެދަލެންޑްސް އިން ވަނީ ދެ މެޗުން ހަތަރު ޕޮއިންޓް ހޯދައިފަ އެވެ. ދެ ޓީމަށް ވެސް މި ގްރޫޕުން ގަދަ 16ގެ ފުރުސަތު ހޯދުމުގެ އަމިއްލަ ބާރު އެބައޮތެވެ. ތިން ވަނައިގައި އޮތް އޮސްޓްރިއާ އަށް ތިން ޕޮއިންޓް ލިބިފައިވާއިރު، ޕޮލެންޑް އޮތީ ޕޮއިންޓެއް ނުލިބި އެވެ. މި ގްރޫޕުން އަނެއް ބުރަށް ދިއުމުގެ ފުރުސަތު ގެއްލުނީ ޕޮޮލެންޑް އަށެވެ. އެ ޓީމަކީ މި ފަހަރުގެ ޔޫރޯ އިން ކެޓި ފުރަތަމަ ޓީމެވެ.
އެންމެ ފަހުން މެޗުގައި ނޭފަތުގެ ކަށިގަނޑަށް ލިބުނު އަނިޔާއާ ހެދި ބަދަލުކުރި ފްރާންސްގެ ކެޕްޓަން، ކީލިއަން އެމްބާޕޭ މިރޭގެ މެޗުގައި ނުކުޅެ އެވެ. އޭގެ ބަދަލުގައި ފްރާންސްގެ ކެޕްޓަން، ބޭންޑް އެޅީ އެންޓޮއިން ގްރީޒްމަން އެވެ.
އެމްބާޕޭ މި މެޗުގައި ކުޅެން، ފުރަތަމަ ފަރުމާކުރި ފްރާންސްގެ ދިދައިގެ ކުލަތައް ހިމެނޭ ބޭންޑް ބޭނުންކުރަން ޔުއެފާ އިން ހުއްދަނުދިނެވެ. އެހެންވެ، އޭނާ ބޭނުންކުރީ ކަޅު މާސްކެކެވެ.
ލައިޕްޒިގު ސްޓޭޑިއަމްގައި ކުޅުނު މެޗުގެ ފުރަތަމަ މިނިޓްގައި ނެދަލެންޑްސްގެ ޖެރެމީ ފްރިމްޕޮން ޖެހި ޝޮޓެއް ފްރާންސްގެ ކީޕަރު، މައިކް މައިންގްނޯން ވަނީ މަތަކޮށްފަ އެވެ. ފްރާންސްގެ ފުރަތަމަ ޝޮޓް ޖެހީ އޭރިއާބޭރުން ގްރީޒްމަން އެވެ. އެ ބޯޅަ ނެދަލެންޑްސްގެ ކީޕަރު، ބާޓް ވާބްރޫގެން ވަނީ މަތަކޮށްފަ އެވެ.
ނެދަލެންޑްސްގެ ޝައުޓެން (ކ) ކައިރިން ގްރީޒްމަން ބޯޅަ ހިފައިގެންދަނީ.
ދެ ޓީމުން ވެސް މެދުތެރޭގެ ކޮންޓްރޯލް ނަގައިގެން އެޓޭކް ކުރެވޭތޯ ބަލަމުންދިޔައިރު، ނެދަލެންޑްސްގެ ކޯޑީ ގަކްޕޯ ވަނީ އޭރިއާބޭރުން ރަނގަޅު ޝޮޓެއް ފޮނުވާލައިފަ އެވެ. އެ ބޯޅަ ކީޕަރު މައިންގްނޯން ވަނީ މަތަކޮށްފަ އެވެ.
ފުރަތަމަ ހާފުގައި ފްރާންސަށް ލިބުނު އެންމެ ހުސް ފުރުސަތު ނަގާލީ ގްރީޒްމަން އެވެ. ނެދަލެންޑްސްގެ އޭރިއާތެެރެއިން ފްރާންސްގެ މިޑްފީލްޑަރު، އެޑްރިއަން ރަބިއޯ އަށް ލިބުނު ބޯޅަ އޭނާ ނިންމީ ގްރީޒްމަން އަށް ދޭށެވެ. އެކަމަކު، ގްރީޒްމަން ފައިގައި ރަނގަޅަށް އެ ބޯޅަ ލައްވާލާ ގޮތެއްނުވެ ފުރުސަތު ގެއްލުނީ އެވެ.
ފްރާންސްގެ ފޯވާޑް މާކަސް ތުރާމް ޖެހި ބޯޅައެއް ދިޔައީ ގޯލާ ސީދާނުވެ އެވެ.
ފްރާންސް އިން ދެ ވަނަ ހާފު ފެށިގެން ވެސް އެޓޭކްތަކެއް ކުރިއިރު، މެޗުގެ 65 ވަނަ މިނިޓްގައި، އޭރިއާތެެެރެއިން ގްރީޒްމަން އަށް ލިބުނު ފުރުސަތުގައި ޖެހި ބޯޅަ ކީޕަރު ވާބްރޫގެން ވަނީ މަތަކޮށްފަ އެވެ. އޭގެ ފަހުން، އޮސްމާން ޑެމްބެލޭ ޖެހި ބޯޅަ ދިޔައީ ހުރަސްދަނޑިމަތިންނެވެ.
ނެދަލެންޑްސްގެ ގަކްޕޯ (ވ) ކައިރިން ބޯޅަ ހިފައިގެންދާން ފްރާންސްގެ ޑެމްބެލޭ މަސައްކަތްކުރަނީ.
ދެ ވަނަ ހާފުގައި ނެދަލެންޑްސް އިން ކުރި ފުރަތަމަ އެޓޭކުގައި ލަނޑެއް ޖެހި އެވެ.
އެ ގޮތުން، މެޗުގެ 68 ވަަނަ މިނިޓްގައި ޒަވީ ސިމޯންސް ވަނީ އޭރިއާތެރެއިން ލިބުނު ބޯޅަ ގޯލަށް ފޮނުވާލައިފަ އެވެ. އެއީ، ނެދަލެންޑްސްގެ މެމްފިސް ޑިޕާއި ޖެހި ބޯޅައެއް، ފްރާންސް ކީޕަރު މައިންގްނޯން ފައިގައި ޖެހިފައި އައި ވަގުތު ސިމޯންސް ވަނީ ގޯލު ކަނަށް އަމާޒުކޮށްލައިފަ އެވެ. އެކަމަކު، މެޗުގެ ރެފްރީ އެންތަނީ ޓޭލާ ނިންމީ އޮފްސައިޑްގައި ހުރި ނެދަލެންޑްސްގެ ޑެންޒެލް ޑަމްފްރީސް ހަރަކާތްކުރުމުން އޮފްސައިޑް ކަމަށެވެ. ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ވެސް ނިންމީ އެ ގޮތަށެވެ.
އޭގެ ފަހުން ފްރާންސުން ކުރިއަށް ޖެހިގެން ކުޅުނު ނަމަވެސް ލަނޑު ޖަހަން މާ ރަނގަޅު ފުރުސަތުތަކެއް ހޯދައި، ހަމަލާތަކެއް ފޮނުވައިނުލެވުނެވެ.
ނެދަލެންޑްސް އިން ވަނީ ފްރާންސް އިން އެޓޭކްކުރަން ޖާގައެއް ނުދީ މެޗުގެ ފަހުކޮޅުގައި ރަނގަޅު ޑިފެންސެއް ކޮށްފަ އެެވެ.
މިއީ ޔޫރޯގައި ނެދަލެންޑްސް އާއި ފްރާންސްގެ ހަތަރު ވަނަ ކުރިމަތިލުމެވެ. އެ ގޮތުން، 1996 ވަނަ އަހަރުގެ ޔޫރޯގެ ކުއާޓާ ފައިނަލުގައި ފްރާންސް އިން ނެދަލެންޑްސް ބަލިކުރި އެވެ. އެކަމަކު، ގްރޫޕް ސްޓޭޖުގައި މިރޭގެ ކުރިން މި ދެ ޓީމު މީގެ ކުރިން ކުޅުނު ދެ ފަހަރު ވެސް ކުރިހޯދީ ނެދަލެންޑްސް އިންނެވެ. އެއީ 2000 ވަނަ އަހަރާއި 2008 ވަނަ އަހަރުގެ މުބާރާތުގަ އެވެ. އެކަމަކު، މިރޭގެ މެޗު ނިމިފައި މި ވަނީ އެއްވަރުވެގެންނެވެ. މިއީ ޔޫރޯގައި ނެދަލެންޑަސް އާއި ފްރާންސް އެއްވަރުވި ފުރަތަަމަ ފަހަރެވެ.
