މިއުނިކް (ޖޫން 22) - މި ފަހަރުގެ ޔޫރޯ ފުޓްބޯޅަ މުބާރާތުގައި އަމަލުކުރަން ފެށި ގަވާއިދުގެ ދަށުން ފުރަަތަމަ ސަސްޕެންޑްވި ކުޅުންތެރިއަކަށް، ސްޕެއިންގެ މިޑްފީލްޑަރު، ރޮޑްރީ ވެއްޖެ އެވެ.
އެހެންވެ، ގްރޫޕްގެ ފަހު މެޗުގައި ސްޕެއިނުން އަލްބޭނިއާއާ ދެކޮޅަށް ނުކުންނައިރު، ރޮޑްރީ އަށް ނުކުޅެވޭނެ އެވެ.
މި ފަހަރުގެ ޔޫރޯ ފުޓްބޯޅަ މުބާރާތުގައި ސްޕެއިނުން ކުޅުނު ފުރަތަމަ ދެ މެޗުން މޮޅުވެ ވަނީ ބާކީ މެޗެއް އޮއްވައި ގަދަ 16 އިން ފުރުސަތު ހޯދައިފަ އެވެ. އެ ގޮތުން ސްޕެއިނުން ކްރޮއޭޝިއާ އާއި އިޓަލީ ބަލިކުރި މެޗުތަކުގައި ރޮޑްރީ އަށް ވަނީ ރީނދޫ ކާޑު ދައްކައިފަ އެވެ. އެހެންވެ، ދެ ރީނދޫ ކާޑު ހަމަވެ، ޖެހިގެން އައި މެޗަށް ސަސްޕެންޑްވީ އެވެ.
ސްޕެއިނުން ދެ ވަަނަ މެޗުގައި އިޓަލީއާ ދެކޮޅަށް ކުޅެނިކޮށް، ރޮޑްރީ އަށް ރީނދޫ ކާޑު ދެއްކީ މި ފަހަރު އަމަލުކުރަން ފެށި ގަވާއިދެއްގެ ދަށުންނެވެ. މި ފަހަރުގެ ޔޫރޯގައި ރެފްރީން އަމަލުކުރަން ފެށި ގަވާއިދަކީ ޓީމެއްގެ ކެޕްޓަނުން ނޫން ކުޅުންތެރިއަކު އެޕީލެއް ކުރަން އައިސްފިނަމަ ރީނދޫ ކާޑު ދެއްކޭ ގޮތަށެވެ. އެ ގޮތުން، ކެޕްޓަނަކީ، ގޯލްކީޕަރު ނަމަ، އިހުތިޔާރުކުރާ އެހެން ކުޅުންތެރިއަކަށް ރެފްރީ އަށް އެޕީލް ކުރެވޭނެ އެވެ. އެކަމަކު، އެ އިހުތިޔާރު ކުރާ ކުޅުންތެރިއެއްގެ ނަން، މެޗު ފެށުމުގެ ކުރިން ރެފްރީ އަށް އަންގަންވާނެ އެވެ.
އެ ގޮތުން، އިޓަލީއާ ދެކޮޅަށް ކުޅުނު މެޗުގައި ރެފްރީ އަށް އެޕީލްކުރަން ރޮޑްރީ ދިއުމުން ރީނދޫ ކާޑެއް ދެއްކީ އެވެ.
ސްޕެއިނުން ކުޅުނު ފުރަތަމަ ދެ މެޗުގައި، ރޮޑްރީ މެޗު ނިންމާލީ ކެޕްޓަނެއްގެ ގޮތުގަ އެވެ. އެއީ އެ ޓީމުގެ ކެޕްޓަން، އަލްވާރޯ މޮރާޓާ ބަދަލުކުރުމުންނެވެ.
