ލައިޕްޒިގް (ޖޫން 21) - ނޭފަތުގެ ކަށިގަނޑަށް ލިބިފައިވާ އަނިޔާގެ ސަބަބުން ފްރާންސްގެ ކެޕްޓަން، ކީލިއަން އެމްބާޕޭ މާސްކެއް އަޅައިގެން ކުޅެން ނިންމާފައިވާއިރު، އޭނާ އަށް ހާއްސަކޮށް ތައްޔާރުކޮށްފައިވާ މާސްކް ބޭނުންކުރަން ޔުއެފާ އިން ހާއްސަ ހުއްދައެއް ހޯދަން ފްރާންސް އިން މަސައްކަތް ފަށައިފި އެވެ.
ގްރޫޕްގެ ފުރަތަމަ މެޗުގައި ފްރާންސް އިން އޮސްޓްރިއާ އަތުން 1-0 އިން މޮޅުވި މެޗުގައި އެމްބާޕޭގެ ނޭފަތުގެ ކަށިގަނޑަށް އަނިޔާވެ، އޭނާ ބަދަލުކުރަން ޖެހުނުއިރު، ނޭފަތުން ލޭއޮހޮރެ އެވެ. އެމްބާޕޭގެ ނޭފަތަށް ލިބިފައިވާ އަނިޔާ އިން ރަނގަޅުވާން އޮޕަރޭޝަނެއް ކުރަން ޖެހެ އެވެ. އެކަމަކު، އޭނާ ވަނީ ފްރާންސް މެޑިކަލް ޓީމުގެ ލަފާ ހޯދައިގެން، ޔޫރޯގެ ފަހުން އޮޕަރޭޝަން ކުރަން ނިންމައިފަ އެވެ.
ނެދަލެންޑްްސާ ދެކޮޅަށް ފްރާންސް އިން ކުޅޭ މެޗަށް ފްރާންސް އިން ބޭއްވި ފުރަތަމަ ފަރިތަކުރުންތަކުގައި، އެމްބާޕޭ ބައިވެިރވީ ނޭފަތުގައި ބޭސް އަޅައިގެންނެވެ. އެކަމަކު، ފަހުން، ވަނީ ފްރާންސްގެ ދިދައިގެ ތިން ކުލަ ރަމްޒު ކޮށްދޭ ކުލަތައް ހިމަނައިގެން ހަދާފައިވާ މާސްކެއްގައި އޭނާގެ ބްރޭންޑްގެ ނަން ޖަހައިގެން ބޭނުންކޮށްފަ އެވެ. އެކަމަކު، ޔުއެފާގެ ގަވާއިދު ބުނާގޮތުން، އެމްބާޕޭ އަށް އެ މާސްކް މެޗުގައި ބޭނުންނުކުރެވޭނެ އެވެ. އެއީ، ގަވާއިދުގައިވާ ގޮތުން، މެޑިކަލް ކަންކަމުގައި ބޭނުންކުރާ އެއްޗެއް ހުންނަން ޖެހޭނީ އެއް ކުލައެއްގަ އެވެ.
ފްރާންސްގެ މީޑިއާ ރިޕޯޓްތައް ބުނާގޮތުން، ފްރާންސް އިން ވަނީ މި ކަމުގައި ހައްލެއް ހޯދޭތޯ، ޔުއެފާއާ ބައްދަލުކުރަން ނިންމައިފަ އެވެ.
މެޗުގެ ކުރިން އޮތް ނޫސްވެރިންގެ ބައްދަލުވުމުގައި ދެ ޓީމުގެ ކޯޗުންނަށް ވެސް ސުވާލު ގިނައިން އަމާޒުވީ އެމްބާޕޭއާ ބެހޭގޮތުންނެވެ. އެ ގޮތުން، ފްރާންސްގެ ކޯޗު ޑިޑިއޭ ޑެޝޯމްޕްސް ބުނީ، މެޗުގައި އެމްބާޕޭ ކުޅުވުމާ މެދު ގޮތެއް ނިންމާނީ ޓްރެއިނިން އާއި މެޑިކަލް ޓީމުގެ ލަފަޔަށް ބަލައިފައި ކަމަށެވެ.
ނެދަލެންޑްސްގެ ކޯޗު ރޮނާލްޑް ކޫމަންއާ ސުވާލު އަމާޒުވީ އެ ޓީމުން ތައްޔާރުވާނީ މެޗުގައި އެމްބާޕޭ ކުޅޭނެ ކަމަށް ވިސްނައިގެންތޯ އެވެ.
"އެމްބާޕޭ ކުޅެންޏާ އެނގޭނީ ޑެޝޯމްޕްސް އަށް. އަހަރެމެންނަށް އޮތީ މެޗަށް މަޑުކޮށްގެން ތިބުން. ފްރާންސަކީ ވަރުގަދަ ޓީމެއް. އެމްބާޕޭ ނުކުޅެންޏާ ދެން އަރާ ކުޅުންތެރިއަކާ އެކު ވެސް އެ ޓީމު އޮންނާނީ ވަރުގަދަކޮށް،" ކޫމަން ބުންޏެވެ.
އޭނާ ބުނީ މެޗަށް ތައްޔާރުވާނީ ނެދަލެންޑްސްގެ އެންމެ ވަރުގަދަ އަށް ކަމަށާއި އެކަން އެ ގޮތަށް ކުރާއިރު، ވިސްނަން ޖެހެނީ އެމްބާޕޭ ކުޅޭތޯ ނޫން ކަަމަށް ވެސް ކޫމަން ވަނީ ބުނެފަ އެވެ.
މިއީ ޔޫރޯގައި ނެދަލެންޑްސް އާއި ފްރާންސްގެ ހަތަރު ވަނަ ކުރިމަތިލުމެވެ. އެ ގޮތުން، 1996 ވަނަ އަހަރުގެ ޔޫރޯގެ ކުއާޓާ ފައިނަލުގައި ފްރާންސް އިން ނެދަލެންޑްސް ބަލިކުރި އެވެ. އެކަމަކު، ގްރޫޕް ސްޓޭޖުގައި މި ދެ ޓީމު މީގެ ކުރިން ކުޅުނު ދެ ފަހަރު ވެސް ކުރިހޯދީ ނެދަލެންޑްސް އިންނެވެ. އެއީ 2000 ވަނަ އަހަރާއި 2008 ވަނަ އަހަރުގެ މުބާރާތުގަ އެވެ.
މި ދެ ޓީމު މިރޭ ކުޅޭ މެޗު ފަށާނީ 12 ޖަހާއިރު އެވެ.
