ބާލިން (ޖޫން 21) - ޔޫރޯ ފުޓްބޯޅަ މުބާރާތުގައި ކުރިއަށްދާން ބޭނުންނަމަ މިރޭ ޕޮލެންޑާ ދެކޮޅަށް ކުޅޭ މެޗުގައި މޮޅެއް ނޫން ކަމަކަށް ވިސްނާނެ ޖާގައެއް ނެތް ކަމަށް އޮސްޓްރިއާގެ ކޯޗު ރަލްފް ރަންގްނިކް ބުނެފި އެެވެ.
ޕޮލެންޑް ކެޕްޓަން، ރޮބަޓް ލެވަންޑޯސްކީ އޮސްޓްރިއާ މެޗުގައި ކުޅުނަސް, އޮސްޓްރިއާ އިން ޖެހިލުންނުވާނެ ކަމަށާއި, ޕްލޭނާ އެއް ގޮތައް ކުޅެފިނަމަ ކާމިޔާބުވާނެ ކަމުގެ ޔަގީންކަން އެބައޮތް ކަމަށް ވެސް ރަންގްނިކް ވަނީ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ބުނެފަ އެވެ.
މި ފަހަރުގެ ޔޫރޯގައި އޮސްޓްރިއާ އިން ކުޅުނު ފުރަތަމަ މެޗުން ވަރުގަދަ ފްރާންސް އަތުން 1-0 ގެ ނަތީޖާ އަކުން ވަނީ ބަލިވެފަ އެވެ. އެ މެޗުން އޮސްޓްރިއާ ބަލިވި ނަމަވެސް އެ ޓީމުގެ ކުޅުމަށް ގިނަ ބަޔަކު ވަނީ ތައުރީފު ކޮށްފަ އެވެ.
އޮސްޓްރިއާ އިން ގްރޫޕް ސްޓޭޖުގެ ދެ ވަނަ މެޗުގައި ޕޮލަންޑާ ދެކޮޅަށް ނުކުންނައިރު, މި މެޗުން މޮޮޅުވުން ނޫން ގޮތެއް އެ ޓީމަށް ނެތެވެ. އަދި މިއީ މި މުބާރާތުގައި އިތުރަށް ކުރިއަށް ދާން ލިބޭނެ ފަހު ފުރުސަތު ކަމަށް ރަންގްނިކް ދެކެ އެވެ.
"މިއީ ދިރިހުރުމާ މަރުގެ މެޗެއް. އަހަރެންގެ ޓީމުން މި މެޗަށް ތައްޔާރު ބޭނުންވަނީ ޕްލޭނާ އެއްގޮތައް ކުޅެން އަދި ޕްލޭނާ އެއް ގޮތައް ކުޅެފިނަމަ ކާމިޔާބުވާނެ ކަމުގެ ޔަގީންކަން އެބައޮތް" ރަގްނިކް ބުންޏެވެ.
އަނިޔާގެ ސަބަބުން ލެވަންޑޯސްކީ ފުރަަތަމަ މެޗުން ނުފެނުނު ނަމަވެސް މި މެޗުގެ ކޮންމެވެސް ހިސާބަކުން ފެނިދާނެ ކަމަށް ރަންގްނިކް ގަބޫލުކުރެ އެވެ. އަދި އެކަމަށް އޮސްޓްރިއާ އިން ސަމާލުވާނެ ކަމަށް ވެސް އޭނާ ވަނީ ބުނެފަ އެވެ.
އެހެން ނަމަވެސް، ލެވަންޑޯސްކީ، ޕޮލެންޑްގައި ހުރުން އެއީ އޮސްޓްރިއާ އިން ޖެހިލުންވާނެ ކަމެއް ނޫން ކަމަށް ރަގްނިކް ބުނެފައިވެ އެވެ.
"ލެވަންޑޯސްކީ އަކީ ބޮސް ތެރޭގައި ކިހާ ފެންވަރެއްގެ ކުޅުންތެރިއެއްކަން އަހަރެން ނުޖެހޭނެ ކިޔާދޭކަށް. އެކަމަކު އޭނާ ހުއްޓުވާނެ ފޯމިއުލާ އަހަރެންގެ ކުޅުންތެރިންނަށް އެނގޭނެ" ރަގްނިކް ބުންޏެވެ.
ޕޮލެންޑް އާއި އޮސްޓްރިއާ ވަނީ 10 ފަހަރު ބައްދަލުކޮށްފަ އެވެ. ޕޮލެންޑް ފަސް ފަހަރު މޮޅުވެފައިވާއިރު، އޮސްޓްރިއާ މޮޅުވީ ތިން މެޗުންނެވެ. ދެ މެޗު ވަނީ އެއްވަރުވެފަ އެވެ. ޕޮލެންޑުން މީގެ ކުރިން ޔޫރޯއެއްގެ ފުރަތަމަ ދެ މެޗުން ބަލިވެފައިނުވެ އެވެ. އޮސްޓްރިއާ އާއި ޕޮލެންޑް ކުޅޭ މެޗު ފަށާނީ މިރޭ 9 ޖަހާއިރު އެވެ.
