ސްޓުޓްގާޓް (ޖޫން 19) - ޔޫރޯ ފުޓްބޯޅަ މުބާރާތުގައި މިރޭ ހަންގޭރީ އަތުން 2-0 އިން މޮޅުވެ، ޖަރުމަނުން މުބާރާތުގެ ގަދަ 16 ޓީމު ވާދަކުރާ ބުރުގެ ޖާގައެއް ހޯދައިފި އެވެ.
ޖަރުމަނުން ގްރޫޕް އޭގައި ކުޅުނު ފުރަތަމަ މެޗުން ވަނީ 5-1 އިން ސްކޮޓްލެންޑް ބަލިކޮށްފަ އެވެ. ދެ ވަނަ މެޗުގައި މިރޭ ހަންގޭރީ އަތުން މޮޅުވިއިރު، މިރޭ ފަހު މެޗުގައި ސްވިޒަލެންޑުން ސްކޮޓްލެންޑް ބަލިކޮށްފިނަމަ، މި ގްރޫޕުން ބާކީ ދެ މެޗު އޮއްވައި ނޮކައުޓް ޖާގަތަށް ޖަރުމަނާއި ސްވިޒަލެންޑަށް ލިބޭނެ އެވެ.
ފުރަތަމަ ދެ މެޗުން މޮޅުވުމުން، ޖަރުމަނަށް މި ގްރޫޕްގެ ގަދަ ދެ ޓީމުގެ ތެރެއިން ނޮކައުޓްގެ ޖާގަ ނުލިބި ދިޔަސް، އެންމެ ރަނގަޅު ނަތީޖާ ނެރޭ ތިން ވަނަ އަށް ދާ ޓީމުތަކުގެ ތެރެއިން ނޮކައުޓަށް ދިއުުމުގެ ފުރުސަތު އެބައޮތެވެ.
ހަންގޭރީގެ ޗަލާއި (ކ) ފޮނުވާލާ ބޯޅައެއް ޖަރުމަނުގެ ކީޕަރު ނޯޔާ ދިފާއުކުރަނީ
ސްޓުޓްގާޓް އެރީނާގައި މިރޭ ކުޅުނު މެޗު ފަށައިގެން 15 ސިކުންތު ތެރޭގައި ހަންގޭރީ އަށް ލަނޑެއް ޖަހަން ފުރުސަތު ލިބުނެވެ.
އެ ޓީމުގެ، ރޮލަންޑް ޗަލާއި ވަނީ ޖަރުމަނު ފަހަތުން ދޫވި ބޯޅައެއް ހިފައިގެން އޭރިއާތެރެއަށް ވަދެފަ އެވެ. އެެހެން ނަމަވެސް، ޖަރުމަނު ކީޕަރު މެނުއަލް ނޯޔާގެ ހުށިޔާރުކަމުން އެ ބޯޅަ ސަލާމަތްކުރި އެވެ.
ޖަރުމަނުގެ ފުރަތަމަ ފުރުސަތު ލިބުނީ 12 ވަނަ މިނިޓްގައި ކައި ހަވާޓްޒް އަށެވެ. އޭނާ އޭރިއާތެރެއިން ފޮނުވާލި ބޯޅަ ހަންގޭރީގެ ކީޕަރު ޕީޓަ ގުލާޗީ ވަނީ މަތަކޮށްފަ އެވެ. އޭގެ 10 މިނިޓް ފަހުން، މެޗުގެ 22 ވަަނަ މިނިޓްގައި ޖަރުމަނުން ލީޑުނެގީ ޖަމާލް މުސިއާލާ ޖެހި ގޯލުންނެވެ.
މިއީ އޭރިއާތެރެއިން ޖަރުމަނުގެ ކެޕްޓަނ،ް އިލްކާއި ގުންޑޮގާން ދިން ބޯޅައަކުން މުސިއާލާ ޖެހި ގޯލެކެވެ. މި އެޓޭކުގައި ގުންޑޮގާން ހަންގޭރީގެ ވިލީ އޯބާން އަށް ފައުލުކުރިތޯ ބަލަން ވީޑިއޯ އެސިސްޓަންޓް ރެފްރީ (ވީއޭއާރް)ގެ އެހީ ހޯދި އެވެ.
ޖަރުމަނު ޓީމުގެ މުސިއާލާ އެ ޓީމުގެ ފުރަތަމަ ލަނޑު ޖެހުމަށް ފަހު އުފާފާޅުކުރަނީ.
އޭގެ ފަހުން، ވެސް މުސިއާލާ ވަނީ ރަނގަޅު ހަމަލާއެއް ފޮނުވާލައިފަ އެވެ. އަމާޒުވީ އަރިމަތީ ދާގަނޑަށެެވެ.
ހަންގޭރީގެ ކެޕްޓަން، ޑޮމިނިކް ސޮބޯސްލާއި ފުރަތަމަ ހާފުގައި ހިލޭ ޖެހުމަކުން ފޮނުވާލި ޝޮޓް ކީޕަރު ނޯޔާ މަތަކުރިއިރު، ދެން ލިބުނު އެޓޭކެއްގައި ޖެހި ޝޮޓެއް، ޖަރުމަނުގެ ޑިފެންޑަރު ޖޮނަތަން ޓާ ވަނީ ބްލޮކްކޮށްފަ އެވެ. އޭގެ ފަހުން، ސޮބޯސްލާއި ހިލޭ ޖެހުމަކުން ނެގި ބޯޅައަކުން، އޯބާން ބޮލުން ޖެހި ބޯޅަ ވެސް ނޯޔާ ވަނީ މަތަކޮށްފަ އެވެ. ނޯޔާ އަތުގައި ޖެހިފައި އެ ބޯޅަ ޗަލާއި އަށް ލިބުނު ވަގުުތު އޭނާ ބޮލުން ގޯލަށް ފޮނުވާލިއިރު، ވީއޭއާރް އިން އެ ގޯލު ކެންސަލްކުރި އެެވެ.
ދެ ވަނަ ހާފުގައި ހަންގޭރީގެ ބާނަބާސް ވާގާ އަށް ޖަރުމަނު އޭރިއާތެެރެއިން ލިބުނު ފުރުސަތެއްގައި ބޮލުން ޖެހި ބޯޅަ ދިޔައީ ހުރަސްދަނޑިމަތިންނެވެ.
ޖަރުމަނުން ދެ ވަނަ ގޯލު ޖެހީ މެޗުގެ 67 ވަަނަ މިނިޓްގަ އެވެ. މި ލަނޑު ޖެހީ، އެ ޓީމުގެ ފުލްބެކް، މެކްސިމިލިއަން މިޓެލްސްޓާޑް ނަގައިދިން ބޯޅަ ޓީމުގެ ކެޕްޓަން ގުންޑޮގާން ވަނީ ހަމަޖެހިލައިފައި ތިރިތިރިން ގޯލަށް ފޮނުވާލައިފަ އެވެ.
މެޗުގެ އިތުރު ވަގުތުގެ ފެށުނުތަނާ ހަންގޭރީގެ ކުޅުންތެރިން ކުރި އެޓޭކެއްގައި، ފޮނުވާލި ބޯޅައެއް ޖަރުމަނުގެ ޔޯސުއާ ކިމިކް ވަނީ ގޯލު ރޮނގުމަތިން ސަލާމަތްކޮށްފަ އެވެ.
