އިންޑިއާގެ ގައުމީ ފުޓްބޯޅަ ޓީމުގެ ކޯޗުކަމުން ވަކިކުރި ކްރޮއޭޝިއާގެ އިގޯ ސްޓިމަކް، އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް) އަށް އިންޒާރެއް ދިނުމަށް ފަހު، އިންޑިއާގެ ފުޓްބޯޅަ ރައީސް، ކަލްޔާން ޗޯބޭ އާއި އިންޑިއާގެ ސްޕޯޓްސް މިނިސްޓްރީ އަށް ފާޑުކިޔައިފި އެވެ.
މިދިޔަ ހޯމަ ދުވަހު، އިންޑިއާ ފުޓްބޯޅަ ފެޑެރޭޝަނުން ސްޓިމަކް، 56، އެ ޓީމުގެ ކޯޗުކަމުން ވަކިކުރީ އޭނާއާ އެކު ހަދާފައިވާ އެއްބަސްވުމުގައި ބާކީ އެއް އަހަރު އޮއްވަ އެވެ. ކޮންޓްރެކްޓާ މެދު އަމަލުކުރާނެ ގޮތަކާ މެދު މަޝްވަރާ ކުރަނިކޮށް، ސްޓިމަކް ވަކިކޮށް، މީޑިއާގައި އެކަން ހިއްސާކުރުމުން، އޭނާ ވަނީ އެކަމާ ހިތްހަަމަ ނުޖެހުން ފާޅުކޮށްފަ އެވެ.
ނިއުސް އެޖެންސީ، ޕީޓީއައި އަށް ދިން އިންޓަވިއުއެއްގައި ސްޓިމަކް ބުނީ، އޭނާގެ ކޮންޓްރެކްޓްގެ ބާކީ މުއްދަތަށްވާ ފައިސާ 10 ދުވަސް ތެރޭ ހަމަޖައްސައިނުދީފިނަމަ ފީފާ އަށް މައްސަަލަ ހުށަހަޅާނެ ކަމަށެވެ.
"އަހަންނަށް ދޭން ޖެހޭ ފައިސާ ވާްން ޖެހޭނީ ކޮންޓްރެކްޓްގައި މި އޮތް ބާކީ މުއްދަތަށް އެއްކޮށް ދައްކަން ޖެހޭ އަދަދަށް، އެ އަށް ބަދަލެއް އައިސްގެން ނުވާނެ. އެހެން ނޫންނަމަ އަހަރެން ފީފާ ޓްރިބިއުނަލްގައި މި މައްސަލަ ކުރިއަށްގެންދާނަން،" 2019 އިން ފެށިގެން އިންޑިއާގެ ކޯޗުކަން ކުރަމުން އަންނަ ސްޓިމަކް ބުންޏެވެ.
ސްޓިމަކް، އިންޑިއާ ކޯޗުކަމުން ވަކިކުރަން ފުޓްބޯޅަ ފެޑެރޭޝަނުން ދެއްކި ސަބަބަކީ، ވޯލްޑް ކަޕް ކޮލިފައިން ތިން ވަނަ ބުރަށް ކޮލިފައިނުވުމެވެ. އަދި އިންޑިއާގެ ފުޓްބޯޅަ ރައީސް ޗޯބޭ ވަނީ، ސްޓިމަކް އަކީ ޒިންމާ ނުނެގޭ ވަރަށް ޝަކުވާ ބޮޑު ކޯޗެއް ކަމަށް ވިދާޅުވެ، އިންޓަވިއުދީފަ އެވެ.
އެ އަށް ރައްދުދީ، ސްޓިމަކް ބުނީ، ޗޯބޭ، އިންޑިއާގެ ފުޓްބޯޅަ ރައީސްކަމަށް އައި ފަހުން، އެ ގައުމުގެ ފުޓްބޯޅައިގެ ކަންކަމަށް ނުރަނގަޅު ނުފޫޒު ފޯރުވައި، ކޯޗުގެ ޒިންމާ އަދާކުރަން ބުރޫ އަރާގޮތަށް އަމަލުކޮށްފައިވާ ކަމަށެވެ.
"އިންޑިއާގެ ފުޓްބޯޅަ ރައީސް ޗޯބޭ، އާއި ސްޕޯޓްސް އޮތޯރިޓީ އޮފް އިންޑިއާ އިން ވަނީ އަހަރެން އޭޝިއަން ގޭމްސް އަށް ނެގި ސްކޮޑަށް ބަދަލު ގެނެސްފައި. އަހަރެން ބޭނުންވި ސީނިއާ ތިން ކުޅުންތެރިންގެ ބަދަލުގައި އިންޑިއަން ސުޕަ ލީގުގެ ކްލަބްތަކުން ބޭނުންވާ ކުޅުންތެރިން ލައިގެން ޓީމު ހެދީ،" ސްޓިމަކް ބުންޏެވެ.
"ޓީމު ޗައިނާ އަށް ގެންދިޔަ ގޮތް އެއީ އެއްގޮތަކަށް ވެސް ގަބޫލުކުރެވޭނެ ކަމެއް ނޫން،"
އޭޝިއަން ކަޕްގައި އިންޑިއާގެ ދަށް ނަތީޖާތަކަށް ފަހު، މީޑިއާއާ އެކު ސްޓިމަކް ބާއްވަން އުޅުނު ނޫސްވެރިންގެ ބައްދަލުވުން ކެންސަލްކުރީ ވެސް ޗޯބޭ ކަމަށް ސްޓިމަކް ވަނީ ބުނެފަ އެވެ.
ކްރޮއޭޝިއާ ގައުމީ ޓީމަށް ކުޅެ، ފަހުން އެ ޓީމުގެ ކޯޗަކަށް މަސައްކަތްކުރި ސްޓިމަކް ބުނީ، އިންޑިއާ ޓީމުގައި މަސައްކަތްކުރަން ޖެހުނު ގޮތުން އޭނާގެ ސިއްހަތަށް ވެސް ނުރަނގަޅު އަސަރުކޮށްފައިވާ ކަމަށެވެ. ދެން އިތުރަށް މި ކަންކަމާ ހުރެ، ހާލަތު ގޯސްކުރަން ބޭނުންނުވާ ކަމަށާއި މީގެ ފަހުން އޭނާގެ ފަރާތުން މީޑިއާ އާއި ނޫނީ އެހެން ފަރާތްތަކާ ވާހަކަދައްކާނީ ވަކީލު، ރަޑިކް މެދުވެރިކޮށް ކަމަށެވެ.
ސްޓިމަކް ވަނީ، އިންޑިއާ ފުޓްބޯޅައިގައި މައްސަލަ ހުރީ ހިންގުމުގައި ކަމަށާއި ފުޓްބޯޅަ ފެޑެރޭޝަންގައި އޮތީ މުޅިން އަމިއްލަ މަސްލަހަތު ކަމަށެވެ.
