ޑޯޓްމަންޑް (ޖޫން 18) - ޔޫރޯ ފުޓްބޯޅަ މުބާރާތުގެ ގްރޫޕް އެފްގައި މިރޭ ޖޯޖިއާއާ ދެކޮޅަށް ތުުރުކީ ނުކުންނައިރު، ތުރުކީގެ ސަޕޯޓަރުން މަޔޫސް ނުކުރާނެ ކަމަށް އެ ޓީމުގެ ކޯޗު، އިޓަލީގެ ވިންޗެންޒޯ މޮންޓެލާ ބުނެފި އެވެ.
ޖަރުމަންގައި ޔޫރޯ ކުޅޭތީ ގިނަ އަދަދެއްގެ ތުރުކީ ސަޕޯޓަރުުން ދަނޑަށް ވަންނާނެ ކަމަށް ބެލެވެ އެވެ. ޖަރުމަންގައި ތުރުކީގެ ގިނަ ރައްޔިތުންނާއި ތުުރުކީގެ ދަރިކޮޅު މީހުން ދިރިއުޅެއެވެ. އެހެންކަމުން ޖަރުމަންގައި ތުރުކީން ކުޅޭ މެޗުތަކަކީ އެ ޓީމުގެ ހޯމް މެޗުތަކެއްގެ ގޮތުގައިވެސް ސިފަކޮށްފައި އެބަހުއްޓެވެ.
ޑޯޓްމަންޑްގެ ސިގްނަލް އިޑޫނާ ޕާކުގައި މިރޭ ޖޯޖިއާއާ ދެކޮޅަށް ތުރުކީ ނުކުންނައިރު، ދަނޑުގައި ގިނަ އަދަދެއްގެ ސަޕޯޓަރުން ތިބޭނީ ތުރުކީ އަށް ހިތްވަރު ދިނުމަށް ކަމަށް މީޑިއާ އިން ސިފަކުރެ އެވެ.
ޖަރުމަންގައި ތުރުކީއަށް އޮންނަ ސަޕޯޓް ތުރުކީގެ ކޯޗު މޮންޓެލާ އަށް ވެސް ވަނީ ތަޖުރިބާކުރެވިފަ އެވެ. މިދިޔަ އަހަރުގެ ނޮވެމްބަރު މަހު ޖަރުމަންއާ ދެކޮޅަށް ބާލިންގައި ކުޅުނު އެކުވެރިކަމުގެ މެޗަށް ވެސް ތުރުކީގެ ގިނަ އަދަދެއްގެ ސަޕޯޓަރުން ވަނެވެ.
އިޓަލީ ގައުމީ ޓީމުގެ ކުރީގެ ފޯވާޑް މޮންޓެއްލާ: ތުރުކީގެ ފުޓްބޯޅަ ބަދަލުކޮށްލަން ވަނީ އަމާޒުހިފައިފައި.
މޮންޓެލާ ބުނީ ސަޕޯޓަރުންގެ ފަރާތުން ލިބޭ ތަރުހީބު ބަލައިގަންނަ ކަމަށާއި ސަޕޯޓަރުން މާޔޫސްނުކުރާނެ ކަމަށެވެ. އަދި މިރޭގެ މެޗަކީ ތުރުކީއަށް "ހޯމް މެޗެއް" ފަދަ ކަމަށެވެ.
"ދަނޑު ތިބި ސަޕޯޓަރުންވެސް އަދި ގައުމުގައި މެޗު ބަލަން ތިބި ސަޕޯޓަރުންވެސް މާޔޫސްނުކުރާނަން. އެންމެ ފަހުގެ ވަގުތާ ޖެހެންދެންވެސް ތުރުކީގެ ދިދައަށް އިހުތިރާމްކުރާނަން،" ކުރިން އިޓަލީގެ ގައުމީ ޓީމަށް ކުޅުނު މޮންޓެލާ ބުންޏެވެ.
އެންމެ ފަހުން ކުޅުނު ދެ ޔޫރޯގައި ވެސް ތުރުކީއަށް ގުރޫޕް ސްޓޭޖް ފަހަނައަޅައި ނުދެވުނެވެ. އެކަމަކު މި ފަހަރު މޮންޓެލާގެ އަމާޒަކީ އެކަން ބަދަލުކޮށްލުމެވެ.
"އަނިޔާގެ ބައެއް ކުޅުންތެރިންނަށް މި ފަހަރުގެ މުބާރާތް ނުކުޅެވުނު އެކަަމަކު މިހާރު ވިސްނަންވީ މިތަނަށް މި އައި ސްކޮޑާމެދު. މި އޮތީ ޒުވާން މޮޅެތި ކުޅުންތެރިންތަކާއެކު ތަޖުރިބާކާރު ކުޅުންތެރިން ހިމެނޭ ރަނގަޅު ސްކޮޑެއް. މި ފަހަރުގެ އަމާޒަކީ ދެވަނަ ބުރަށް ދިއުން،" މޮންޓެލާ ބުންޏެވެ.
ޖޯޖިއާ އާއި ތުރުކީ ފަސް ފަހަރެއްގެ މަތިން މީގެ ކުރިން ބައްދަލުކުރި އެވެ. ތިން މެޗުން ތުރުކީ މޮޅުވިއިރު، އެއް މެޗު ބަލި އަދި އެއް މެޗުން އެއްވަރުވެފައިވެ އެވެ.
ޖޯޖިއާ އާއި ތުރުކީ ބައްދަލުކުރާ މެޗު ފަށާނީ މިރޭ 9 ޖަހާއިރު އެވެ.
