މިއުނިކް (ޖޫން 18) - މި ފަހަރުގެ ޔޫރޯ ފުޓްބޯޅަ މުބާރާތުގައި ކުޅުނު ފުރަތަމަ މެޗުގައި ސްކޮޓްލެންޑްގެ ޑިފެންޑަރު ރިޔާން ޕޯޓެއުސް އަށް ސީދާ ރަތް ކާޑެއް ދެއްކިއިރު ޑިސިޕްލިނަރީ ކޮމިޓީން ބަލާފައި އޭނާގެ ސަސްޕެންޝަން ދެ މެޗަށް ބަދަލުކުރުމާ އެކު، ދެން މުބާރާތުގައި އޭނާ ފެނުމުގެ ފުރުސަތު ކުޑަވެއްޖެ ކަމަށް ރިޕޯޓްތައް ބުނެފި އެވެ.
ޖަރުމަނު އަތުން 5-1 އިން ސްކޮޓްލެންޑް ބަލިވި މެޗުގައި ޕޯޓެއުސް އަށް ފުރަތަމަ ހާފުގައި ރަތް ކާޑު ދެއްކީ އޭރިއާތެރެއިން ޖަރުމަނުގެ ކެޕްޓަން އިލްކާއި ގުންޑޮގާން އަށް ކުރި ނުރައްކާތެރި ފައުލަކަށެވެ.
މި ރަތް ކާޑު ދެއްކީ ވީޑިއޯ އެސިސްޓަންޓް ރެފްރީ (ވީއޭއާރް) އިން ވެސް ކަށަވަރުކުރުމަށް ފަހު އެވެ.
ޕޯޓެއުސް (ކ) ފުރަތަމަ މެޗުގައި ގުންޑޮގާން އަށް ކުރި ފައުލު.
އިނގިރޭސި ދެ ވަނަ ޑިވިޝަނުގެ ވަޓްފޯޑަށް ކުޅޭ ޕޯޓެއުސްގެ މި ފައުލުގެ ކަންކަން ޔުއެފާ ޑިސިޕްލިނަރީ ކޮމީޓީން ބެލުމަށް ފަހު، މިއީ ވަރަށް ނުރައްކާތެރި ފައުލެއް ކަމަށް ނިންމައި، ސަސްޕެންޝަން ބޮޑުކުރީ އެވެ.
މިއާ އެކު، ދެން މި ފަހަރުގެ ޔޫރޯގައި ޕޯޓެއުސް ފެނުމުގެ ފުރުސަތު ވަނީ ކުޑަވެފަ އެވެ. އެއީ ގްރޫޕް ސްޓޭޖުގެ ބާކީ ދެ މެޗަށެވެ. ޕޯޓެއުސް ދެން ފެންނާނީ ސްކޮޓްލެންޑަށް ގްރޫޕް ސްޓޭޖު ފަހަނައަޅައި ދެވިއްޖިއްޔާ އެކަންޏެވެ.
ސްކޮޓްލެންޑަށް އަދި އެ ގައުމުގެ ފުޓްބޯޅަ ތާރީހުގައި ބޮޑު މުބާރާތެއްގެ ގްރޫޕް ސްޓޭޖު ފަހަނައަޅައި ނުދެވެ އެވެ. އެހެންވެ، ޕޯޓެއުސް އަށް މިހާރު މުބާރާތް ނިމުނީ ކަމަށް ދެކޭ މީހުން ގިނަ އެވެ.
ސްކޮޓްލެންޑް ބޮޑު ތަފާތަކުން ފުރަތަމަ މެޗުން ބަލިވިއިރު، ދެން އެ ޓީމުން ކުޅެން ޖެހޭނީ، މި ގްރޫޕްގެ ދެ ވަނަ މެޗުން ހަންގޭރީ ބަލިކުރި ސްވިޒަލެންޑާ އެވެ.
