ފްރާންސްގެ ކެޕްޓަނެއްގެ ގޮތުގަޔާއި ކޯޗެއްގެ ގޮތުގައި ޑިޑިއޭ ޑެޝޯމްޕްސް ވަނީ ފީފާ ވޯލްޑް ކަޕް ކާމިޔާބުކޮށްފަ އެވެ. އެއީ، 1998 ވަނަ އަހަރުގެ ވޯލްޑް ކަޕާއި 2018 ވަނަ އަހަރުގެ ވޯލްޑް ކަޕް އެވެ. ކުޅުންތެރިއެއްގެ ގޮތުގައި ޔޫރޯ ފުޓްބޯޅަ މުބާރާތުގެ ތަށި 2020 ވަނަ އަހަރު ހޯދި، ޑެޝޯމްޕްސް ކޯޗެއްގެ ގޮތުގައި 2016 ވަނަ އަހަރުގެ ޔޫރޯ ފައިނަލުގައި ވަނީ ބަލިވެފަ އެެވެ.
ކޯޗެއްގެ ގޮތުގައި، ޑެޝޯމްޕްސް އަށް މިހާރު ފްރާންސް ގޮވައިގެން މަދުވަނީ، ޔޫރޯގެ ތަށްޓެވެ. އަމިއްލަ ގައުމުގައި 2016 ވަނަ އަހަރު ހޯސްޓްކުރި ޔޫރޯ ފައިނަލުގައި ޕޯޗުގަލް އަތުން ހިތި ގޮތަކަށް ބަލިވި ހަނދާންތައް ޑެޝޯމްޕްސްގެ އެބަހުއްޓެވެ.
ޑެޝޯމްޕްސް މި ވަގުތު ކޮންޓްރެކްޓްގައި ހުރީ 2026 ވަނަ އަހަރުގެ ފީފާ ވޯލްޑް ކަޕްގެ ނިޔަލަށެވެ. އެހެންކަމަށްވުމާ އެކު، ޑެޝޯމްޕްސް އަށް ފްރާންސާ އެކު ޔޫރޯ އެއް ކާމިޔާބުކުރަން ލިބޭ ފަހު ފުުރުސަތަކީ މި ފަހަރެވެ.
ތި އެތުލެޓިކް އަށް ދިން އިންޓަވިއުއެއްގައި ވާހަކަ ދައްކަމުން ޑެޝޯމްޕްސް ބުނީ، އެއްވެސް ކަމެއްގެ ވަކި ޕްރެޝަރެއް ނުނަގައި އޭނާ ބޭނުންވަނީ އަމިއްލަ ނަފްސަށް އޮންނަ އިތުބާރާ އެކު ރަނގަޅު މަސައްކަތެއް ކުރުމަށް ކަމަށެވެ.
"މިއީ ފަހަރުގައި ވެސް އަހަރެން ބޭނުންނުވާތީއެއް ނޫން. އަހަންނަށް ނޭނގޭ ތިއަށް ދޭނެ ޖަވާބެއް. އަހަރެން އަމިއްލަ ނަފްސަށް މާ ބައިވަރު ސުވާލުތަކެއް ނުކުރާނަން. މި ވަގުތު ގައުމީ ޓީމަކާ އެކު ހޯދެން މި އޮތީ ތިން ތަށި، ފީފާ ވޯލްޑް ކަޕް، ނޭޝަންސް ލީގު، ދެން ޔޫރޯ، މީގެއިން ދެ ތަށި ލިބިއްޖެ. އަހަރެން އަބަދުވެސް މަސައްކަތް ކުރަނީ ފްރާންސް އަބަދުވެސް ކާމިޔާބު ހޯދައިދޭން، ފްރާންސްގެ ހައްގު މަގާމުގައި އެ ޓީމު ބާއްވަން،" ޑެޝޯމްޕްސް ބުންޏެވެ.
ފްރާންސްގެ ކޯޗު ޑެޝޯމްޕްސް: މި ފަހަރުގެ ޔޫރޯގެ ކުރިން ތަށްޓާ އެކު ނަގާފައިވާ ފޮޓޯއެއް.
މި ފަހަރުގެ ޔޫރޯގެ އެންމެ ބޮޑު ފޭވަރިޓުންގެ ތެރޭގައި ފްރާންސްގެ ނަން ގުނުމަކީ، އެ ވާހަކަތަކަށް ޖަވާބު ނުދީ ދޫކޮށްލެވޭނެ ކަމެއް ނޫންކަން ޑެޝޯމްޕްސް ވެސް ގަބޫލުކުރެ އެވެ. އޭނާ ބުނީ، ފްރާންސަކީ ފޭވަރިޓެއްކަން އެއީ ގަބޫލުކުރަން ޖެހޭ ހަގީގަތެއް ކަމަށެވެ.
"އަހަރެމެންނަކީ 2018ގެ ވޯލްޑް ކަޕްގެ ޗެމްޕިއަނުން، 2022ގެ ވޯލްޑް ކަޕްގެ ރަނަރަޕް، އެހެންވީމަ، ޔަގީނުން ވެސް އަހަރެމެން ފޭވަރިޓުންގެ ގޮތުގައި ގުނާނެ،" ޑެޝޯމްޕްސް ބުންޏެވެ. "ދެން، ބަލަންޖެހޭ ހަގީގަތެއް އެއީ، ޔޫރޯގައި އެބަކުޅޭ ފީފާ ރޭންކިންގެ ގަދަ 10 ގެ ތެރެއިން އަށް ގައުމު، އެހެންވީމަ އެބަ އެނގޭ މި މުބާރާތުގެ އުނދަގޫކަން،" ޑެޝޯމްޕްސް ބުންޏެވެ.
އޭނާ ބުނީ މީގެ ކުރިން ޔޫރޯ ފުޓްބޯޅަ މުބާރާތްތައް ނަމަ، ފޯމަކަށް އެޅެން މެޗުތަކެއް ލިބިދާނެ ކަމަށެވެ. އެކަމަކު، މިހާރު ޔޫރަޕްގެ ފުޓްބޯޅަ އޮތް ލެވަލަށް ބަލާއިރު، ފުރަތަމަ މެޗުން ފެށިގެން ކަންކަން ރަނގަޅަށް ނުގޮސްފިނަަމަ އޭގެ ގެއްލުން، ޓީމަށް ކުރާނެ ކަމަށް ޑެޝޯމްޕްސް ވަނީ ބުނެފަ އެވެ.
މި ފަހަރުގެ ޔޫރޯގައި ފްރާންސް އިން އެންމެ ބޮޑަށް ބަރޯސާވާނެ ކުޅުންތެރިއަކީ ކީލިއަން އެމްބާޕޭ ކަމާ މެދު ސުވާލެއް ވެސް ނެތް ކަމަށް ޑެޝޯމްޕްސް ވަނީ ބުނެފަ އެވެ. އެމްބާޕޭ އަށް ފުޓްބޯޅަ ދުނިޔޭގެ ސަމާލުކަން މާ ބޮޑަށް ހުއްޓުމަކީ، ފްރާންސަށް ވެސް އޮތް ޕްރެޝަރެއްގެ ގޮތުގައި ގިނަ ބަޔަކު ފާހަގަކުރިޔަސް، ޑެޝޯމްޕްސް ބުނީ، އެ ހުރިހާ ކަމަކާ ކުރިމަތިލާނެ ފެންވަރު އެބަހުރި ކަމަށެވެ.
މި ފަހަރުގެ ޔޫރޯގައި ފްރާންސް ކުޅޭ ފުރަތަމަ މެޗުގައި މިރޭ 12 ޖަހާއިރު ބައްދަލުކުރާނީ އޮސްޓްރިއާއާ ދެކޮޅަށް ކަމަށެވެ. އެ ގްރޫޕްގައި ކުޅުނު ފުރަތަމަ މެޗުން ނެދަލެންޑްސް ވަނީ 2-1 އިން ޕޮލެންޑް ބަލިކޮށްފަ އެވެ.
އޮސްޓްރިއާ އާއި ފްރާންސް ވަނީ 25 ފަހަރު ބައްދަލުކޮށްފަ އެވެ. ފްރާންުސުން 13 މެޗު ކާމިޔާބުކުރިއިރު، އޮސްޓްރިއާ އިން ނުވަ މެޗުން މޮޅުވި އެވެ. އަނެއް ތިން މެޗު ނިމުނީ އެއްވަރުވެގެންނެވެ.
