ރިއޯ ޑި ޖަނެއިރޯ، ބްރެޒިލް (ޖޫން 16) - ބްރެޒިލްގައި މިހާރު އޮތް ފުޓްބޯޅަ ޓީމަށް އެ ޓީމުގެ ކުރީގެ ލެޖެންޑް، ރޮނާލްޑީނިއޯ ފާޑުކިޔާފައިވަނީ އިސްތިހާރެއްގެ ބައެއްގެ ގޮތުގައި ކަމަށް ބުނެފި އެވެ.
ބްރެޒިލްގެ ޔޫޓިއުބް ޗެނަލަކަށް ދިން އިންޓަވިއުއެއްގަޔާއި ސޯޝަލް މީޑިއާގައި އާންމުކުރި ޕޯސްޓެއްގައި، ރޮނާލްޑިނިއޯ، 44، ވަނީ ވަރަށް ބޮޑަށް ބްރެޒިލްގެ ގައުމީ ފުޓްބޯޅަ ޓީމާއި ކުޅުންތެރިންނަށް ފާޑުކިޔައިފަ އެވެ. އެކަމާ ބްރެޒިލްގެ މީޑިއާ އާއި ދުނިޔޭގެ އެކި މީޑިއާތަކުގެ ސަމާލުކަން ރޮނާލްޑީނިއޯ އަށް ހުއްޓުނެވެ.
ބްރެޒިލްގެ ގައުމީ ޓީމުގެ ކުޅުންތެރިން ވެސް ރޮނާލްޑީނިއޯގެ ވާހަކަތަކަށް ރައްދުދޭން ފެށުމާ އެކު، އިންސްޓަގްރާމްގައި ކުރި ޕޯސްޓެއްގައި ރޮނާލްޑީނިއޯ ބުނީ، ކުރިން ދެއްކި ވާހަކަތަކަކީ އިސްތިހާރަކާ ގުޅިގެން އާންމުކުރި ވާހަކަތަކެއް ކަމަށެވެ.
"އަހަރެން ދުވަަހަކު ވެސް ބްރެޒިލަށް ސަޕޯޓްކުރުން ހުއްޓައެއް ނުލާނަން، އަހަރެން ކުރިިން ޕޯސްޓްގައި ބްރެޒިލް މެޗުތައް ނުބަލާނެ ކަމަށް ބުނެފައިވަނީ، ސަޕޯޓަރުންގެ ޝުއޫރުތައް ހުންނާނެ ގޮތުގެ އިސްތިހާރެއް ކުޅެން ވެގެން، އެއީ ޑިއޯޑަރެންޓްގެ އިސްތިހާރެއްގެ ބައެއް. މުބާރާތެއްގެ ކުރިން މި ކަހަލަ ވާހަަކަތަކެއް ކުޅުންތެރިންނަށް އިވުމަކީ މޮޓިވޭޝަނަށް އަސަރުކުރާނެ ކަމެއް އަހަރެން އެ ފަދަ ކަމެއް ނުކުރާނަން،" ރޮނާލްޑީނިއޯ ބުންޏެވެ.
އޭނާ ބުނީ، ފުޓްބޯޅައިގައި ވެސް ކޮންމެ ކަމެއްގައި ވެސް އެންމެ އިސް ރޯލެއް ކުޅެނީ ސަޕޯޓަރުން ކަމަށެވެ.
ބްރެޒިލް ޓީމުގެ ކުޅުންތެރިޔާ، ރަފީނިއާ އަށް އަމާޒުވި ސުވާލެއްގެ ޖަވާބުގައި އޭނާ ބުނީ، ރޮނާލްޑީނިއޯ، ބްރެޒިލް ޓީމަށް ފާޑުކިޔުން އެއީ އިސްތިހާރެއްގެ ކަމަކަށް ވެދާނެ ކަމަށެވެ. އެއީ ދާދި ފަހުން، ރޮނާލްޑީނިއޯ ވަނީ މި ފަހަރުގެ ކޮޕަ އެމެރިކާގައި ބްރެޒިލް ކުޅޭ މެޗުތަކުގެ ޓިކެޓް ހޯދަން ވިނީޝިއުސް ޖޫނިއާ ކައިރީގައި ވާހަކަ ދައްކާފައިވާ ކަމަށް ރަފީނިއާ ބުނެފައިވެ އެވެ.
ބުރާސްފަތި ދުވަހު އެމެރިކާގައި ފަށާ، ކޮޕަ އެމެރިކާގައި ބްރެޒިލް ކުޅޭ ފުރަތަމަ މެޗުގައި މި މަހު 25 ގައި ކުޅޭނީ ކޮސްޓަ ރިކާއާ އެެވެ. ދެ ވަނަ މެޗުގައި، މި މަހު 29 ގައި ޕެރަގުއޭއާ ކުޅުމަށް ފަހު، ގްރޫޕް ފަހު މެޗުގައި، އަންނަ މަހުގެ ތިން ވަނަ ދުވަހު، ކޮލަމްބިއާއާ ބައްދަލުކުރާނެ އެވެ.
