މިއުނިކް (ޖޫން 17) - މިހާރު ކުރިއަށްދާ ޔުއެފާ ޔޫރޯ ފުޓްބޯޅަ މުބާރާތުގައި ޔޫކްރެއިން އިން ކުޅޭ ފުރަތަމަ މެޗުގައި ރުމޭނިއާ އާއި ދެކޮޅަށް ނުކުންނައިރު ޔޫކްރެއިނުން އެދެނީ އެ ގައުމަށް މިހާރު ވެސް ލިބެމުން އަންނަ ސަޕޯޓް ތަކުރާރުވުމަށް ކަމަށް ސާހޭއި ރެބްރޯވް ބުނެފި އެވެ.
ރެބްރޯވް ބުނީ މި މުބާރާތައް ޔޫކްރެއިނުން ނުކުންނައިރު، އެ ގައުމު އޮތީ ވަރަށް ހާލުގައި ކަމަށެވެ. ރަޝިއާ އާއި ޔޫކްރެއިން ހަނގުރާމައިގެ ސަބަބުން ޓީމުގެ ހާލަތު އެންމެ ރަނގަޅު ނޫން ކަމަށް ރެބްރޯވް ވަނީ ބުނެފަ އެވެ.
"އަހަރެން އެދެނީ މި މެޗަށް ޔޫކްރެއިން ނުކުންނައިރު, ރަޝިއާ އާއި ޔޫކްރެއިން ހަނގުރާމައިގައި މުޅި ޔޫރަޕުން ޔޫކްރެއިން އަށް އެ ދޭ ސަޕޯޓް މި މެޗުގައި ވެސް ފެނުމަށް. އަހަރެންގެ ކުޅުންތެރިން މި ވަގުތު މި ތިބީ އެންމެ ރަނގަޅަކަށް ނޫން." ރެބްރޯވް ބުންޏެވެ.
އެންމެ ފަހުގެ ޔޫރޯގައި ޔޫކްރެއިން ވަނީ ކުއާޓާ ފައިނަލްގައި ކުޅެފަ އެވެ. އެއީ ޔޫކްރެއިން ތާރީހުގައި ވެސް އެ ޓީމުން ޔޫރޯގައި ހޯދި އެންމެ ބޮޑު ކާމިޔާބީ އެވެ.
"މި ފަހަރުގެ ޔޫރޯ އަށް އަހަރެމެން ނުކުންނައިރު، އަހަރެންގެ ކުޅުންތެރިން މުޅިން މި މުބާރާތައް ފޯކަސް އެއް ނޫން. ހެނދުނު ހޭލާ ގޮތައް މި ބެލެނީ ޔޫކްރެއިން ރަޝިއާ ހަނގުރާމައިގެ ހާލަތު. ކުޅުންތެރިންގެ އާއިލާ މީހަކަށް އަނިޔާވިތޯ ނޫނީ އާއިލާ ހާލަތު ރަނގަޅުތޯ މި ބެލެނީ" ރެބްރޯވް ބުންޏެވެ.
ހާލަތު ކޮންމެ ގޮތަކަށް އޮތް ނަމަވެސް ޔޫކްރެއިން ކުޅުންތެރިން ރުމޭނިއާ އާއި ދެކޮޅަށް ނުކުންނާނީ މެޗުން މޮޅުވެ, މޮޅަކާ އެކު ޔޫރޯ ފެށުމަށް ކަމަށް ރެބްރޯވް ވަނީ ބުނެފަ އެވެ.
ޔޫކްރެއިން ގައުމީ ޓީމަށް ކުރިން ކުޅުނު ރެބްރޯވް ބުނީ، މިހާތަނަށް ކުރެވުނު މަސައްކަތުގައި ސްކޮޑު އެކުލަވާލައި ރަނގަޅު ފަރިތަކުރުންތަކެއް ކުރެވިއްޖެ ކަމަށެވެ. އަދި މި ވަގުތު ހުރިހާ ކުޅުންތެރިންވެސް ކުރިއަށް އޮތް މެޗަށް ފޯކަސް ކުރުމަށް އިރުޝާދުދީފައިވާނެ ކަމަށް އޭނާ ބުނެފައިވެ އެވެ.
މިއީ ބައިނަލްއަގުވާމީ ބޮޑު މުބާރާތެއްގައި ޔޫކްރެއިނާއި ރުމޭނިއާގެ ފުރަތަމަ ކުރިމަތިލުމެވެ. މި ދެ ޓީމުން މީގެ ކުރިން ކުޅުނު އެކުވެރިކަމުގެ މެޗުތަަކަށް ބަލާއިރު، ހަ މެޗު ކުޅުނުއިރު، ތިން މެޗުން ރުމޭނިއާ މޮޅުވެފައިވެ އެވެ. ޔޫކްރެއިން ދެ މެޗުން މޮޅުވިއިރު، އެއް މެޗު ނިމުނީ އެއްވަރުވެގެންނެވެ.
މިރޭ މި ދެ ޓީމު ކުޅޭ މެޗު ފަށާނީ 6 ޖަހާއިރު އެވެ.
