ގަލްސެންކާކަން (ޖޫން 16) - ޔޫރޯ ފުޓްބޯޅަ މުބާރާތުގެ ގުރޫޕް ސީގައި މިރޭ ސާބިއާއާ ދެކޮޅަށް އިންގްލެންޑް ނުކުންނައިރު، ސާބިއާ އަކީ ބަަލިކުރަން ފަސޭހަ ޓީމަކަށް ނުވާނެ ކަމަށް އިންގްލެންޑްގެ ކޯޗު ގެރެތު ސައުތުގޭޓް ބުނެފި އެވެ.
މެޗުގެ ކުރިން އޮތް ނޫސްވެރިން ބައްދަލުވުމުގައި ވާހަކަދައްކަމުން ސައުތުގޭޓް ބުނީ ސާބިއާ އަކީ ވަރަށް ވަރުގަދަ ޓީމެއް ކަމަށާއި އެ ޓީމު ބަލިކުރަން ފަސޭހައެއް ނުވާނެ ކަމަށެވެ.
"އިންޑިވިޖިއުލް ހުނަރަށް ބަލާއިރު މޮޅެތި ކުޅުންތެރިން ސާބިއާގައި އެބަތިބި. އަދި އެ ޓީމުގައި ވަރުގަދަ ރޫހެއް އެބައޮތް،" ސައުތުގޭޓް ބުންޏެވެ.
"އަހަރަމެންނަށް އެނގޭ ފުރަތަމަ މެޗު އުނދަގޫވާނެކަން. މެޗުން މޮޅުވެވޭނީ އަހަރަމެންނަށް އެންމެ ރަނގަޅު ކުޅުން ދައްކައިގެން."
މި ގުރޫޕްގައި ދެން އޮތީ ސްލޮވީނިއާ އަދި ޑެންމާކެވެ.
ސައުތުގޭޓް ބުނީ އިންގްލެންޑަށް ގުރޫޕް ސްޓޭޖު ފަހަނައަޅައި ގޮސް، މުބާރާތުގައި އިތުރަށް ކުރިއަށް ދެވޭނީ "ވަރަށް ތަފާތު ކުޅުމެއް" ދައްކައިގެން ކަމަށެވެ.
"މި މުބާރާތުގައި އެބައޮތް ވަރަށް މޮޅެތި ޓީމުތައް. އަހަރަމެންނަށް ގުރޫޕް ސްޓޭޖު ފަހަނައަޅައި، އެއަށްވުރެ ދުރަށް ދެވޭނީ ވަރަށް ތަފާތުވެގެން،" ސައުތުގޭޓް ބުންޏެެވެ.
މިއީ ސައުތުގޭޓްގެ އިރުޝާދުގެ ދަށުން އިންގްލެންޑުން ބައިނަލްއަޤްވާމީ މުބާރާތަކަށް ނުކުންނަ ހަތަރު ވަނަ ފަހަރެވެ. އިންގްލެންޑްގެ ކޯޗުކަމާ 2016 ވަނަ އަހަރު ހަވާލުވި ސައުތުގޭޓް، 53، ވަނީ ވޯލްޑް ކަޕް 2018، ޔޫރޯ 2020 އަދި ވޯލްޑް ކަޕް 2022ގައި އިންގްލެންޑަށް އިރުޝާދު ދީފަ އެވެ. ޔޫރޯ 2020ގެ ފައިނަލްގައި އިންގްލެންޑް ވާދަކުރިއެވެ.
މުބާރާތުގެ ފުރަތަމަ މެޗަސް ނުކުންނައިރު އިންގްލެންޑްގެ ސްކޮޑުގައި އަނިޔާގެ މައްސަލައެއް ނެތް ކަމަށް ސައުތުގޭޓް ބުނެފައިވެ އެެވެ.
"އެންމެންވެސް ފިޓު. ލޫކް ޝޯ ބެންޗުގައި ޖަހާނީތޯ ނުވަތަ ނޫންތޯ ސަުވާލު އުފެދުނު ކަމަކަށް އޮތީ. އެކަމަކު ހުރިހާ ކުޅުންތެރިންވެސް ތިބީ ފިޓުކޮށް،" ސައުގުތުގޭޓް ބުންޏެވެ.
ޔޫރޯ އިންގްލެންޑަށް ކާމިޔާބު ނުވެއްޖެނަމަ އެ ޓީމުގެ ކޯޗުގެ މަގާމުގައި ދެމިނުހުރެވޭނެ ކަމަށް ކުރިން މީޑިއާއާ ވާހަކަދައްކަމުން ސައުތުގޭޓް ވަނީ ބުނެފަ އެވެ.
ސައުތުގޭޓް އިންގްލެންޑާ އެކު ހަދާފައިވާ ކޮންޓުރެކްޓް ޑިސެމްބަރު މަހަށް ހަމަވާނެ އެވެ. އެކަމަކު އިނގިރޭސި އެފްއޭ އިން 2026 ވަނަ އަހަރުގެ ވޯލްޑް ކަޕްގެ ނިޔަލަށް އޭނާ ކޯޗުގެ މަގާގަމުގައި ބަހައްޓަން ބޭނުންވާ ކަމަށް ރިޕޯޓްތަކުން ބުނެ އެވެ.
މި ފަހަރުގެ ޔޫރޯ އަށް ތައްޔާރުވާން އިންގްލެންޑުން ކުޅުނު ފަހު މެޗުން އައިސްލެންޑް އަތުން 1-0 އިން ބަލިވުމުން ގިނަ ބަޔެއްގެ ފާޑުކިޔުމާއި ޕްރެޝަރު ވަނީ އަމާޒުވެފަ އެވެ. އިންގްލެންޑާއި ސާބިއާ ކުޅޭ މެޗު ފަށާނީ މިރޭ 12 ޖަހާއިރު އެވެ.
