ރިއޯ ޑި ޖަނެއިރޯ، ބްރެޒިލް (ޖޫން 16) - އަންނަ ބުރާސްފަތި ދުވަހު އެމެެރިކާގައި ފަށާ ކޮޕަ އެމެރިކާ ފުޓްބޯޅަ މުބާރާތުގައި ބްރެޒިލް ކުޅޭ އެއްވެސް މެޗެއް ނުބަލާނެ ކަމަށް އެ ގައުމުގެ ފުޓްބޯޅަ ލެޖެންޑް ރޮނާލްޑީނިއޯ ބުނެފި އެވެ.
ބްރެޒިލުން 2019 ވަނަ އަހަރުގެ ކޮޕަ އެމެރިކާ ކާމިޔާބުކުރި ފަހުން، އެ ޓީމަށް އަދި ބައިނަލްއަގުވާމީ މުބާރާތެއްގެ ތަށީގައި އަތްނުލެވެ އެވެ. ކޮޕަ އެމެރިކާ އަށް ތައްޔާރުވާން ބްރެޒިލުން އެންމެ ފަހުން ކުޅުނު މެޗުން އެމެރިކާއާ 1-1 އިން އެއްވަރުވިއިރު، އެ ނަތީޖާއާ އެކު، ބްރެޒިލް ޓީމަށް ގިނަ ބަޔަކުގެ ފާޑުކިޔުން އަމާޒުވި އެވެ.
ދާދިފަހުން ބްރެޒިލްގެ ޔޫޓިއުބް ޗެނަލަކަށް ދިން އިންޓަވިއުއެއްގައި ރޮނާލްޑީނިއޯ، 44، ބުނީ ކޮޕަ އެމެރިކާ ނުބަލާނެ ކަމަށެެވެ.
"އަހަރެން އެ މީހުންގެ (ބްރެޒިލްގެ) އެންމެ މެޗެއް ވެސް ނުބަލާނަން، އެ މީހުންގެ ކިބައިގައި (ބްރެޒިލްގެ) އެއްވެސް ކަމެއް ނެތް. ބްރެޒިލްގެ ފުރިހަމަކަމާ އެކު ރީތި ފުޓްބޯޅައެއް އެ މީހުން ނުކުޅޭ. އަހަރެން ބްރެޒިލްގެ މެޗުތައް ބެލުން ހުއްޓާލައިފިން. ކަންތައްތައް ދަނީ ރަނގަޅަކަށް ނޫން، ޓީމުގެ ކިބައިގައި ބޭނުންވާ ކަންކަން ފުރިހަމައެއް ވެސް ނޫން،" ހިތްހަމަނުޖެހިފައި ހުރި ރޮނާލްޑީނިއޯ ބުންޏެވެ.
ބްރެޒިލާ އެކު، ކޮޕަ އެމެރިކާ، ފީފާ ވޯލްޑް ކަޕް އަދި ފީފާ ކޮންފެޑެރޭޝަން ކަޕް ކާމިޔާބުކުރި ރޮނާލްޑީނިއޯ، ފަހުން ވަނީ ސޯޝަލް މީޑިއާގައި ވެސް ބްރެޒިލްގެ މިހާރުގެ ފުޓްބޯޅަ އަށް ފާޑުކިޔައިފަ އެވެ.
ރޮނާލްޑީނިއޯ ބުނީ ބްރެޒިލް ފުޓްބޯޅަ މިހާރު އޮތީ ހީނުކުރާހާ ދަށް ލެވަލަކަށް ވެއްޓިފައި ކަމަށާއި ޒަމާނުއްސުރެ އޮތް ވަރުގަދަ، ހުނަރުވެރި ބްރެޒިލް ޓީމެއް މިހާރު ނުފެންނަ ކަމަށެވެ. އަދި ބްރެޒިލްގެ ލެވަލް ކުޅުންތެރިން ގައުމީ ޓީމުގައި ވެސް މަދު ކަމަށާއި ބައެއް ކުޅުންތެރިންގެ ކިބައިގައި ލީޑަޝިޕް ވެސް ނެތް ކަމަށް ރޮނާލްޑީނިއޯ ބުނެފައިވެ އެވެ.
ބްރެޒިލުން ކޮޕަ އެމެރިކާގައި ހޯދާ އެއްވެސް މޮޅެއްގައި އުފާފާޅުނުކުރާނެކަން ފާހަގަކޮށް ރޮނާލްޑީނިއޯ ބުނީ، ބްރެޒިލް ފުޓްބޯޅަ މިހާރު އެ ވެއްޓެމުންދާ ހާލަތާ މެދު ކަންބޮޑުވެ، ލަދުގަންނަ ކަމަށެވެ.
ރޮނާލްޑީނިއޯގެ މި ވާހަކަތަކާ ހެދި ގިނަ ނޫސްވެރިން އަންނަނީ ބްރެޒިލްގެ މި ވަގުތުގެ ސްކޮޑުގައި ތިބި ކުޅުންތެރިން ދެކޭ ގޮތް އޮޅުންފިލުވަމުންނެވެ.
އެ ގޮތުން، މީޑިއާ އިން ކުރި ސުވާލަކަށް ދިން ޖަވާބުގައި ބްރެޒިލްގެ ވިންގް، ރަފީނިއާ ބުނީ، ރޮނާލްޑީނިއޯ އަކީ އަބަދުވެސް ޓީމަށް ހިތްވަރު ދެމުން އަންނަ ލެޖެންޑެއް ކަމަށާއި ބްރެޒިލްގެ ގިނަ ކުޅުންތެރިން ދެކެނީ އެއީ އައިޑަލްއެއްގެ ގޮތުގައި ކަމަށެވެ. އަދި އެ ފަދަ ލެޖެންޑެއްގެ ފަރާތުން ބްރެޒިލްގެ މިހާރުގެ ޓީމާ ބެހޭގޮތުން، އެ އިވުނު ވާހަކަތަކާ އެކު، ޓީމުގެ ކުޅުންތެރިންނަށް ޝޮކެއް ލިބިފައިވާ ކަމަށް ރަފީނިއާ ވަނީ ބުނެފަ އެވެ.
ކޮޕަ އެމެރިކާގައި ބްރެޒިލް ކުޅޭ ފުރަތަމަ މެޗުގައި މި މަހު 25 ގައި ކުޅޭނީ ކޮސްޓަ ރިކާއާ އެެވެ. ދެ ވަނަ މެޗުގައި، މި މަހު 29 ގައި ޕެރަގުއޭއާ ކުޅުމަށް ފަހު، ގްރޫޕް ފަހު މެޗުގައި، އަންނަ މަހުގެ ތިން ވަނަ ދުވަހު، ކޮލަމްބިއާއާ ބައްދަލުކުރާނެ އެވެ.
