އިއްޔެ ބޭއްވި ލ. ގަމު ކައުންސިލް މެންބަރުކަމުގެ ގޮނޑި އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ކާމިޔާބުކުރިއިރު ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންްސީ) އިން ވާދަކުރި ތިން ގޮނޑީގެ ތެރެއިން ދެ ގޮނޑި އެ ޕާޓީއަށް ގެއްލިއްޖެ އެވެ.
އިއްޔެ ބޭއްވީ ގަމު ކައުންސިލް މެންބަރު ކަމާއި, މ. މުލަކު ކައުންސިލްގެ އަންހެން މެންބަރު ކަމާއި, ކުޑަހުވަދޫ ކައުންސިލް ރައީސްގެ މަގާމަށް ބޭފުޅުން އިންތިހާބު ކުރުމުގެ އިންތިހާބެވެ. މި ތިން އިންތިހާބަށް ވެސް ޕީއެންސީން ނުކުތްއިރު އެމްޑީޕީން ވާދަކުރީ ކުޑަހުވަދޫ އަދި ގަމު ކައުންސިލަށެވެ.
ގަމު ކައުންސިލް މެންބަރު ކަމަށް ވާދަކުރި އެމްޑީޕީގެ ކެންޑިޑޭޓު އަފްސަލް ޖައުފަރު އިންތިހާބު ކާމިޔާބުކުރީ 250 ވޯޓުގެ ތަފާތުންނެވެ. އޭނާއަށް 894 ވޯޓު ލިބުނުއިރު ޕީއެންސީގެ ކެންޑިޑޭޓު އަލީ ނަޝީދަށް ލިބުނީ 644 ވޯޓެވެ.
މުލަކު ކައުންސިލްގެ އަންހެން މެންބަރުކަން ކާމިޔާބުކުރީ 336 ވޯޓާއެކު އަމިއްލަ ގޮތުން ވާދަކުރި ރީމާ ހުސައިން އެވެ. އޭނާއަކީ ޖުމްހޫރީ ޕާޓީގެ އަންހެނުންގެ ރޫހުގެ ރައީސް އެވެ. އޭނާއާ ދެކޮޅަށް ވާދަކުރި ޕީއެންސީގެ ކެންޑިޑޭޓު މިޒްނާ ތައުފީގަށް ލިބުނީ 282 ވޯޓެވެ.
ކުޑަހުވަދޫ ކައުންސިލްގެ ރައީސްގެ ގޮނޑި ޕީއެންސީގެ ޖާދުالله ހަމީދު ކާމިޔާބުކުރީ 826 ވޯޓުންނެވެ. އެމްޑީޕީން ވާދަކުރި އަބްދުالله ޖަމީލް 624 ވޯޓު ހޯދި އެވެ. ކުޑަހުވަދޫ ކައުންސިލުގައި ކުރިން ހުންނެވީ ޕީޕީއެމްއަށް ނިސްބަތްވާ ރައީސެކެވެ.
މި ކައުންސިލުތަކުގެ ބައި-އިލެކްޝަން ބާއްވަން ޖެހުނީ އޭގެ ތެރެއިން ބައެއް މެންބަރުން އިސްތިއުފާ ދިނުމާއި އެހެން މަގާމުތަކަށް ވަޑައިގަތުމުންނެވެ.
