ލަމީން ޔަމާލް
16 އަހަރު
ފޯވާޑް
ސްޕެއިން/ ބާސެލޯނާ
ސްޕެއިން ގައުމީ ފުޓްބޯޅަ ޓީމާއި ބާސެލޯނާގެ ޒަމީންވީ ފުޓްބޯޅަ ތާރީހުގައި ގޯލެއް ޖެހި އެންމެ ޒުވާން ކުޅުންތެރިޔާގެ ރެކޯޑް ހޯލްޑަރު، ލަމީން ޔަމާލް، އޭނާގެ 17 ވަނަ އުފަން ދުވަސް ފާހަގަކުރާނީ މި ފަހަރުގެ ޔޫރޯ ފުޓްބޯޅަ މުބާރާުތުގެ ފައިނަލް މެޗުގެ އެއް ދުވަސް ކުރިންނެވެ.
ބާސެލޯނާގައި ޒުވާން އުމުރުގައި ކުޅެން ލިބުނު ފުރުސަތުތަކުގެ ބޭނުންހިފައި، ޔަމާލް ވަނީ ވަރަށް ބޮޑު ކުރިއެރުންތަކެއް ހޯދައިފަ އެވެ. ސްޕެއިނުގެ ކޯޗު، ޑެ ލަ ފުއެންޓޭ، ދިން އިންޓަވިއުއެއްގައި ބުނެފައިވަނީ، ކޮންމެ މެޗެއްގައި ވެސް ޔަމާލް އާ ކަންތައްތަކެއް ދަސްކުރަމުން އަންނަ ކަމަށާއި، ކޮންމެ ތަޖުރިބާއަކާ އެކު، އޭނާ އަކީ މޮޅު ކުޅުންތެރިއަކަށްވާނެ ކަމަށެވެ.
ޔަމާލް، އަށް މިހާތަނަށް ސްޕެއިނުން ދިން ކޮންމެ ފުރުސަތެއްގެ ވެސް ބޭނުން ވަނީ ހިފައިފަ އެވެ. އެޓޭކިން ހާފުގެ އެކި މަގާމުތަކަށް ޔަމާލް ބޭނުންކުރެވުމަކީ، ސްޕެއިނަށް އޭގެ ފައިދާ ނެގޭނެ ކަމެކެވެ. ސްޕެއިނުގެ ކޯޗު، ފުއެންޓޭ ވަނީ ވަރަށް ބޮޑަށް ޔަމާލް ބޭނުންކުރުމުގައި ސަމާލުވާނެ ކަމަށް ބުނެފަ އެެވެ.
ބާސެލޯނާގެ ކޯޗު ޒަވީ ހެނާންޑޭޒް ވަނީ، ޒުވާން އުމުރުގައި، ލީޑަޝިޕް ނަގައިގެން، ކުޅެން ޔަމާލް ދަސްކުރަމުން އަންނާތީ، އެއީ ސްޕެއިނުގެ ފުޓްބޯޅަ އަށް ވެސް ރަނގަޅު ކަމެއްގެ ގޮތުގައި ފާހަގަކޮށްފަ އެވެ.
މިހާތަނަށް ސްޕެއިނަށް ކުޅެދިން ހަ މެޗުން ޔަމާލް ވަނީ ދެ ގޯލު ޖަހައިފަ އެވެ. މި ފަހަރުގެ ޔޫރޯ ފުޓްބޯޅަ މުބާރާތަކީ، ޔަމާލަށް ބައިނަލްއަގުވާމީ ލެވަލްގައި ސްޕެއިނަށް ކުޅެލަން ލިބޭ ފުރަތަމަ ބޮޑު މުބާރާތެވެ.
