އެންޓޯނިއޯ ސިލްވާ
20 އަހަރު
ޑިފެންޑަރު
ޕޯޗުގަލް/ ބެންފީކާ
މި ފަހަރުގެ ޔޫރޯ ފުޓްބޯޅަ މުބާރާތުގައި ޒުވާން ޑިފެންޑަރުންނަށް ބަލާއިރު، ގިނަ ބަޔެއްގެ ސަމާލުކަން ހޯދާނެ ކަމަށް ބެލެވޭ އެއް ކުޅުންތެރިއަކީ، ޕޯޗުގަލްގެ 20 އަހަރުގެ ޑިފެންޑަރު، އެންޓޯނިއޯ ސިލްވާ އެވެ.
ބެންފީކާގެ ވަރުގަދަ ޔޫތު ސެޓަޕްގެ ތެރެއިން، ކުރިއެރުން ހޯދަމުން އައި އެންޓޯނިއޯ ސިލްވާ، އެންމެ ފުރަތަމަ ޕޯޗުގަލް ޓީމަށް މެޗެއް ކުޅެފައިވަނީ، 2022 ވަނަ އަހަރުގެ ނޮވެމްބަރު މަހުގަ އެވެ. އެއީ، ނައިޖީރިއާއާ ދެކޮޅަށް ކުޅުނު އެކުވެރިކަމުގެ މެޗެއްގަ އެވެ. އެ ފަހުން، 2022 ވަނަ އަހަރުގެ ފީފާ ވޯލްޑް ކަޕްގައި ވާދަކުރި ޕޯޗުގަލް ޓީމުން ފުރުސަތު ހޯދައި، ގްރޫޕް ސްޓޭޖުގެ ފަހު މެޗުގައި ދެކުނު ކޮރެއާއާ ދެކޮޅަށް ސިލްވާ ވަނީ ކުޅެފަ އެވެ. އެ މެޗުގައި ކުޅުމާ އެކު، ސިލްވާ ވެފައިވަނީ ޕޯޗުގަލް އަށް ވޯލްޑް ކަޕެއްގައި ކުޅުނު އެންމެ ޒުވާން ކުޅުންތެރިޔާ އަށެވެ. އޭރު ސިލްވާގެ އުމުރަކީ، 19 އަހަރާއި އެއް މަސް އަދި ތިން ދުވަހެވެ.
ޕޯޗުގަލްގެ ކޯޗު ކަމަށް ރޮބާޓޯ މާޓީނޭޒް ހަވާލުވުމަށް ފަހު، ސިލްވާ އަށް އަންނަނީ ގިނަ ފުރުސަތުތަކެއް ދެމުންނެވެ. އެ ގޮތުން، ޕޯޗުގަލްގެ ފަހަތުގައި، ރުބެން ޑިއާސްއާ އެކު، ޕާޓްނާޝިޕެއް ހަދައި، ވަރުގަދަ ޓީމެއް އެކުލަވާލުމުގައި ސިލްވާގެ ބޭނުން ވަރަށް ރަނގަޅަށް ހިފި އެވެ.
މި ފަހަރުގެ ޔޫރޯ އަށް ފަހު އެންމެ ޑިމާންޑް ބޮޑުވާނެ ކުޅުންތެރިންގެ ލިސްޓުގެ ކުރިން ސިލްވާ ވަނީ ޖާގަ ހޯދައިފަ އެވެ. އޭނާ އަށް މިހާރު ވެސް ގިނަ ކްލަބްތަކެއް އޮފާ ވަނީ ލިބިފަ އެވެ.
