ޒަވީ ސިމޯންސް
21 އަހަރު
އެޓޭކިން މިޑްފީލްޑަރު
ނެދަލެންޑްސް/ އާރްބީ ލައިޕްޒިގު
ޔޫތު ކެރިއަރުގައި ބާސެލޯނާ އާއި ޕީއެސްޖީ އަށް ކުޅެފައިވާ ޒަވީ ސިމޯންސް، ގިނަ ބަޔެއްގެ ލޮލުގައި އަޅައިގަންނަން ފެށީ، 2022/2023 ވަނަ ސީޒަނުގައި ނެދަލެންޑްސްގެ ޕީއެސްވީ އަށް ކުޅުނުއިރު، އޭނާ ދެއްކި ތަފާތު މޮޅު ކުޅުމުންނެވެ. އެ ސީޒަނުގައި އޭނާ ވަނީ 19 ލަނޑު ޖަހައިފަ އެވެ. އެއާ އެކު، ޕީއެސްޖީން ވަނީ އޭނާ ޕީއެސްވީ އަށް ވިއްކާލިއިރު، ކޮންޓްރެކްޓްގައި ހިމެނި، ބައިބެކް ކްލޯސްގެ ބޭނުންހިފައި، އަލުން އޭނާ ގަނެފަ އެވެ.
ޕީއެސްޖީގެ ލޯން އެއްބަސްވުމެއްގެ ދަށުން ނިމިދިޔަ ސީޒަނުގައި ޖަރުމަނުގެ އާރްބީ ލައިޕްޒިގުގައި ވެސް މޮޅު ކުޅުމެއް ދެއްކި ޒަވީ ސިމޯންސް، ފުރަތަމަ ފަހަރަށް ނެދަލެންޑްސް ސީނިއާ ގައުމީ ޓީމުގައި ހިމެނީ، 2022 ވަނަ އަހަރުގެ ފީފާ ވޯލްޑް ކަޕާ ދިމާކޮށް، ނެދަލެންޑްސްގެ އޭރުގެ ކޯޗު ލުއީ ވެން ހާލް ނެގި ސްކޮޑުންނެވެ. އެ މުބާރާތުގައި ޒަވީ ސިމޯންސް ވަނީ، ގަދަ 16 ބުރުގައި، ނެދަލެންޑްސް އިން އެމެރިކާ ބަލިކުރި މެޗުގައި ކުޅެފަ އެވެ. އެއާ އެކު، ޒަވީ ސިމޯންސް ވެފައިވަނީ، ވޯލްޑް ކަޕްގެ ނޮކައުޓް މެޗެއްގައި ނެދަލެންޑްސް އަށް ކުޅުނު އެންމެ ޒުވާން ކުޅުންތެރިޔާ އަށެވެ.
ނެދަލެންޑްސްގެ ހުރިހާ އުމުރުފުރާއެއްގެ ގައުމީ ޓީމަށް ކުޅެފައިވާ ޒަވީ ސިމޯންސް އަކީ، މި ފަހަރުގެ ޔޫރޯގައި ރޮނާލްޑް ކޫމަންގެ އިރުޝާދުގެ ދަށުން ތަފާތު ދައްކާނެ ކުޅުންތެރިއެއް ކަމަށް ގިނަ ބަޔަކު އެއްބަސްވެ އެވެ. މި ފަހަރުގެ ޔޫރޯ ފުޓްބޯޅަ މުބާރާތުގައި ޒަވީ ސިމޯންސް އަށް ގިނަ މެޗުތަކަކުން ފުރުސަތު ލިބޭނެ ކަމަށް ބެލެެވެނީ، މި ސީޒަނުގައި ލައިޕްޒިގުގެ މެޗުތަކުގައި އޭނާ ދައްކަމުން އައި ރަނގަޅު ކުޅުމުގެ ސަބަބުންނެވެ.
