ފްލޯރިއަން ވާޓްޒް
20 އަހަރު
ވިންގް ފޯވާޑް
ޖަރުމަނު/ ބަޔާ ލެވަކޫސަން
ޔޫރަޕް ފުޓްބޯޅައިގައި މި ސީޒަނުގައި އެންމެ ނަން ހިނގި އެއް ކްލަބަކީ ބަޔާ ލެވަކޫސަން އެވެ. އެ ޓީމުން ވަނީ ބަލިނުވެ، 51 މެޗު ހަމަކޮށްފަ އެވެ. ފުރަތަމަ ފަހަރަށް ބަލިވީ، ޔޫރޮޕާ ލީގުގެ ފައިނަލުގަ އެވެ. ޖަރުމަނު ލީގުގެ ޗެމްޕިއަންކަން، މެޗަކުން ބަލިނުވެ، ލެވަކޫސަނުން ހޯދިއިރު، އެންމެ ތަފާތު ކުޅުމެއް ދެއްކި އެއް ކުޅުންތެރިއަކީ، ފްލޯރިއަން ވާޓްޒް އެވެ. އޭނާ ވަނީ ލީގުގެ މޮޅު ކުޅުންތެރިޔާގެ މަގާމު ވެސް ހޯދައިފަ އެވެ.
ޒަބީ އަަލޮންސޯގެ ކޯޗުކަމުގައި، ލެވަކޫސަނުގައި އެންމެ އާދަޔާހިލާފު ކުޅުމެއް ދައްކަމުން އަންނަ އެއް ކުޅުންތެރިއަކީ ވާޓްޒް އެވެ. ގޯލު ޖެހުމާއި ގޯލު ޖަހަން ފުރުސަތު ތަނަވަސްކޮށްދިނުމަށް ބެލިޔަސް، ވާޓްޒް ފެންނަނީ މުހިންމު ކުޅުންތެރިއެއްގެ ގޮތުގަ އެެވެ. ޔޫރަޕްގެ ވަރުގަދަ ފަސް ލީގަށް ބަލާއިރު، މި ސީޒަނުގައި ލަނޑު ޖަހަން އެންމެ ގިނަ ފުރުސަތު ތަަނަވަސްކޮށްދިން ކުޅުންތެރިއަކީ ވާޓްޒް އެވެ.
ޖަރުމަނު ގައުމީ ޓީމަށް ވާޓްޒް ފުރަތަމަ ފަހަރަށް މެޗެއް ކުޅުނީ، 2021 ވަނަ އަހަރުގެ މާޗް މަހު، ފީފާ ވޯލްޑް ކަޕް ކޮލިފައިން މެޗެއްގަ އެެވެ. ކަކުލަށް ލިބުނު އަނިޔާއެއްގެ ސަބަބުން ވާޓްޒް އަށް 2022 ވަނަ އަހަރުގެ ވޯލްޑް ކަޕްގެ ފުރުސަތު ގެއްލުނެވެ. އެއީ، އޭނާ ޖަރުމަނު ސްކޮޑުގައި ހިމަނަން އޭރުގެ ކޯޗު ހަންސީ ފްލިކް، ޝައުގުވެރިކަން ފާޅުކޮށްފައިވަނިކޮށެވެ. މި ސީޒަނުގައި ތަފާތު ފޯމެއްގައި ހުރި ވާޓްޒް ދާދި ފަހުން ވަނީ އެކުވެރިކަމުގެ މެޗެއްގައި ފްރާންސް ކޮޅަށް ހަތް ސިކުންތު ތެރޭގައި ލަނޑެއް ޖަހައި، ދުނިޔޭގެ ފުޓްބޯޅައިގައި ދެ ވަނަ އަށް އެންމެ އަވަސް ލަނޑު ޖަހައިފަ އެވެ. މިހާރު ވާޓްޒް ހުރި ފޯމަށް ބަލާއިރު، ޔޫރޯގައި ގިނަ ޓީމުތަކަށް އޭނާގެ ނުރައްކާ ބޮޑުވާނެ އެވެ.
