ޖޫޑް ބެލިންހަމް
20 އަހަރު
މިޑްފީލްޑް
އިންގްލެންޑް/ ރެއާލް މެޑްރިޑް
މި ފަހަރުގެ ޔޫރޯ ފުޓްބޯޅަ މުބާރާތުގައި އިންގްލެންޑްގެ އުންމީދުތައް އެންމެ ބޮޑަށް ގުޅިފައި އޮންނާނެ އެއް ކުޅުންތެރިއަކީ، ރެއާލް މެޑްރިޑަށް ކުޅެމުން އަންނަ ތަރި، ޖޫޑް ބެލިންހަމް އަށެވެ.
ބާމިންހަމްގެ އެކެޑަމީން ފުޓްބޯޅަ ކެރިއަރު ފަށައި، ސީނިއާ ޓީމަށް ޕްރޮމޯޓްވި ބެލިންހަމް އަށް ގިނަ ޓީމުތަކެއްގެ ހުށަހެޅުން ލިބިފައިވަނިކޮށް، ޒުވާން އުމުރުގައި އޭނާ ވަނީ އިނގިރޭސި ފުޓްބޯޅަ ދޫކޮށް ޖަރުމަނުގެ ގަދަބާރު، ބޮރޫޝިއާ ޑޯޓްމަންޑަށް ބަދަލުވެފަ އެެވެ. ޑޯޓްމަންޑްގައި ބެލިންހަމް ކުރިއަރައިގެން ގޮސް، އޭނާ އަށް އިނގިރޭސި ގައުމީ ޓީމުން ފުރުސަތު ލިބެން ފެށި އެވެ.
ބެލިންހަމް، އެންމެ ފުރަތަމަ އިނގިރޭސި ގައުމީ ޓީމަށް މެޗެއް ކުޅެފައިވަނީ، 2020 ވަނަ އަހަރުގެ ނޮވެމްބަރު މަހު އެވެ. އަޔަލެންޑާ ދެކޮޅަށް ބަދަލަކަށް ކުޅެން އެރި، ބެލިންހަމް އަކީ އިނގިރޭސި ޓީމަށް ކުޅުނު ތިން ވަނަ އަށް އެންމެ ޒުވާން ކުޅުންތެރިޔާ އެވެ. އެއީ އުމުރުން 17 އަހަރުގަ އެވެ. ބެލިންހަމް އަށް ވުރެ ހަނގު އުމުރެއްގައި އިނގިރޭސި ޓީމަށް ކުޅުނީ، ވޭން ރޫނީ އާއި ތެއޯ ވޮލްކޮޓް އެވެ.
އެންމެ ފަހުން ބޭއްވި ޔޫރޯ ފުޓްބޯޅަ މުބާރާތާއި ފީފާ ވޯލްޑް ކަޕްގައި ބެލިންހަމް ވަނީ އިނގިރޭސި ޓީމުގައި ހިމެނިގެން މޮޅު ކުޅުމެއް ދައްކައިފަ އެވެ. އަދި މި ސީޒަނުގައި، ޑޯޓްމަންޑް ދޫކޮށް ރެއާލް މެޑްރިޑަށް ބަދަލުވުމަށް ފަހު، ބެލިންހަމް ހުރީ އާދަޔާހިލާފު ފޯމެއްގަ އެވެ. އެހެންވެ، މި ފަަހަރުގެ ޔޫރޯ ފުޓްބޯޅަ މުބާރާތުގައި އިންގްލެންޑުން ވަރަށް ބޮޑަށް ބެލިންހަމް އަށް ބަރޯސާވާނެ އެވެ.
