ނަން: ހެރީ ކޭން
އުފަން ތާރީހް: 28 ޖުލައި 1993 (30 އަހަރު)
ޤައުމު: އިންގްލެންޑް
މަޤާމް: ފޯވަޑް
ކްލަބް: ބަޔާން މިއުނިކް
ޤައުމީ ޓީމަށް ކުޅެން ފެށީ: 2015 ވަނަ އަހަރު
އިންގްލެންޑްގެ ކެޕްޓަން ހެރީ ކޭން އަކީ ދުނިޔޭގެ އެންމެ މަތީ ލެވެލްގައި ހިމެނޭ ފޯވަޑެކެވެ. ގޯލު ޖެހުމުގެ ހުނަރުގެ އިތުރުން، އޭނާ ފާހަގަކުރެވިފައިވަނީ ލީޑަރެއްގެ ގޮތުގައެވެ. ކޭން އަކީ 2018 ވަނަ އަހަރުން ފެށިގެން އިންގްލެންޑްގެ ގައުމީ ޓީމުގެ ކެޕްޓަނެވެ.
ޓޮޓެންހަމް ހޮޓްސްޕާގެ އެކެޑަމީގައި އުޅުމަށްފަހު، އެ ކްލަބުގެ ސީނިއާ ޓީމަށް ކޭން ކުޅެން ފެށީ 2009 ވަނަ އަހަރެވެ. ލޯނުގެ ގޮތުގައި ބައެއް ކްލަބުތަކަށް ކުޅުމަށްފަހު، ޓޮޓެންހަމްގެ ސީނިއާ ޓީމުގައި ކޭންގެ ރޯލު ބޮޑުވީ 2014 ވަނަ އަހަރުން ފެށިގެންނެވެ. ޓޮޓެންހަމްގައި ހޭދަކުރި ފުރަތަމަ ފުލް ސީޒަންގައި، ކޭން ވަނީ ޕީއެފްއޭ އިން ހޮވި އެންމެ މޮޅު ޒުވާން ކުޅުންތެރިޔާގެ މަގާމު ހޯދައިފައެވެ.
ޓޮޓެންހަމްގެ ކެޕްޓަންކަންވެސް ކުރި ކޭން ވަނީ އެ ޓީމަށް ކުޅުނު 317 މެޗުގައި 213 ލަނޑު ޖަހައިފައެވެ. އެ ކްލަބު ދޫކޮށް ޖަރުމަންގެ ބަޔާން މިއުނިކް އަށް ކޭން 2023 ވަނަ އަހަރު ބަދަލުވީ 110 މިލިއަން ޔޫރޯއަށެވެ. ބަޔާންގައި ކޭން ހޭދަކުރި ފުރަތަމަ ސީޒަންގައި އެ ޓީމަށް ތައްޓެއް ނުލިބުނު ނަމަވެސް، އޭނާ ވަނީ 36 ލަނޑު ޖަހައިފައެވެ.
އިންގްލެންޑްގެ ގައުމީ ޓީމަށް ކޭން ކުޅެން ފެށީ 2015 ވަނަ އަހަރެވެ. އިންގްލެންޑްގެ ކެޕްޓަންގެ ގޮތުގައި ކޭން ވަނީ 2018 ވަނަ އަހަރު ރަޝިއާގައި އޮތް ވޯލްޑް ކަޕްގައި މޮޅު ކުޅުމެއް ދައްކައިފައެވެ. އެ މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމު ހޯދީ ކޭންއެވެ.އަދި އޭގެ ފަހުން 2020 ވަނަ އަހަރުގެ ޔޫރޯގެ ފައިނަލަށް އިންގްލެންޑް ދަތުރުކުރިއިރު، އެ މުބާރާތުގައިވެސް ކޭން މުހިންމު ރޯލެއް އަދާކުރިއެވެ.
އިންގްލެންޑްގެ ގައުމީ ޓީމަށް 60 އަށްވުރެ ގިނަ ލަނޑު ކާމިޔާބުކޮށްދީފައިވާ ކޭން އަކީ މި ފަހަރުގެ ޔޫރޯގައިވެސް އިންގްލެންޑްގެ ޓީމު ލީޑުކުރާނެ ކުޅުންތެރިޔާއެވެ. ބައިނަލްއަޤްވާމީ ތައްޓަކަށް އިންގްލެންޑް އިން ކުރަމުންދާ ދިގު އިންތިޒާރު ނިންމާލުަމަކީ ކޭންގެ އުންމީދެކެވެ.
