ނަން: ޓޯނީ ކްރޫސް
އުފަން ތާރީހް: 4 ޖެނުއަރީ 1990 (34 އަހަރު)
ޤައުމު: ޖަރުމަން
މަގާމް: މިޑްފީލްޑަރު
ކްލަބް: ރެއާލް މެޑްރިޑް
ގައުމީ ޓީމަށް ކުޅެން ފެށީ: 2010 ވަނަ އަހަރު
ޖަރުމަންގެ ގައުމީ ޓީމާއި ރެއާލް މެޑްރިޑްގެ މިޑްފީލްޑަރު ޓޯނީ ކްރޫސް އަކީ ފަހުގެ ތާރީހެއްގައި އުފެދުނު އެންމެ މޮޅު މިޑްފީލްޑަރެވެ. ހުނަރާއި ވިސްނުމުގެ ގޮތުން ތަފާތު ކުޅުންތެރިއެކެވެ.
ކްރޫސްގެ ކެރިއަރު ފެށީ ޖަރުމަންގެ އެންމެ ބޮޑު ކްލަބު ކަމަށްވާ ބަޔާން މިއުނިކް އިންނެވެ. އެ ކްލަބުގެ ސީނިއާ ޓީމަށް އޭނާ 2007 ވަނަ އަހަރު ކުޅެން ފެށީ އުމުރުން 17 އަހަރުގަ އެވެ. ބަޔާންގައި ކްރޫސް ވަނީ ޖަރުމަން ލީގު ތިން ފަހަރު، ޗެމްޕިއަންސް ލީގު އަދި ޖަރުމަން ކަޕް ދެ ފަހަރު ހޯދައިފަ އެވެ.
ބަޔާން ދޫކޮށް ރެއާލަށް ކްރޫސް ،34، ބަދަލުވީ 2014 ވަނަ އަހަރެވެ. ރެއާލްގައި ކްރޫސް ހޭދަކޮށްފައިވަނީ ކާމިޔާބު އަހަރުތަކެކެވެ. އެ ކްލަބުގައި އޭނާ ވަނީ ޖުމްލަ 21 ތަށި ހޯދައިފަ އެވެ. އޭގެ ތެރޭގައި ޗެމްޕިއަންސް ލީގުގެ ހަތަރު ތަށި ހިމެނެ އެވެ.
ޖަރުމަންގެ ގައުމީ ޓީމަށް 2010 ވަނަ އަހަރު ކްރޫސް ކުޅެންފެށީ އުމުރުން 20 އަހަރުގަ އެވެ. އަދި އޭގެ ފަހުން އޭނާ ވަނީ ބައިނަލްއަޤްވާމީ ހަ މުބާރާތެއްގައި ޤައުމު ތަމްސީލުކޮށްފަ އެވެ. ޖަރުމަނުން 2014 ވަނަ އަހަރު ވޯލްޑް ކަޕް ކާމިޔާބުކުރިއިރު، ކްރޫސް ވަނީ މުހިންމު ދައުރެއް އަދާކޮށްފަ އެވެ. އެ މުބާރާތުގައި އެންމެ ގިނަ އެސިސްޓްކުރި ކުޅުންތެރިއަކީ ކްރޫސް އެވެ. އަދި އެ އަހަރު ޖަރުމަންގެ އެންމެ މޮޅު ކުޅުންތެރިޔާގެ މަގާމު އޭނާ އަށް ލިބުނެވެ.
ޔޫރޯ 2020ގައި ޖަަރުމަންގެ ޓީމު ކެޓުމާ އެކު، ކްރޫސް އަށް އަމާޒުވި ފާޑުކިއުންތަކާ ގުޅިގެން އޭނާ ވަނީ ގައުމީ ޓީމަށް ކުޅުން ހުއްޓާލައިފަ އެވެ. އެކަމަކު އަމިއްލަ ގައުމުގައި އޮންނަ 2024 ވަނަ އަހަރުގެ ޔޫރޯއަށް އެ ނިންމުން ބަދަލުކޮށް، އޭނާ ވަނީ އަލުން ގައުމީ ޓީމަށް ކުޅެން ފަށައިފަ އެވެ.
އެންމެ މަތީ ލެވެލްގައި ގިނަ އަހަރުތަކެއް ހޭދަކުރުމަށް ފަހު ކްރޫސް ވަނީ ޔޫރޯ 2024 އަށް ފަހު ކުޅުން ހުއްޓާލުމަށް ނިންމައިފައެވެ. އެހެންކަމުން، ކެރިއަރު ފަހު މުބާރާތުގައި ޖަރުމަނަށް ތަށި ހޯދުމަކީ ކްރޫޒްގެ ބޮޑު އަމާޒަކަށްވާނެ އެވެ.
