ނަން: ކީލިއަން އެމްބާޕޭ
އުފަން ތާރީހް: 20 ޑިސެމްބަރ 1998 (25)
ޤައުމު: ފްރާންސް
މަގާމް: ފޯވަޑް
ކްލަބް: ޕީއެސްޖީ
ގައުމީ ޓީމަށް ކުޅެން ފެށީ: 2017 ވަނަ އަހަރު
ފްރާންސްގެ ތަރި ކީލިއަން އެމްބާޕޭ އަކީ މި ވަގުތު ފުޓްބޯޅައިގައި ހުރި އެންމެ މޮޅު އެއް ކުޅުންތެރިޔާ ޢެވެ. ވަރަށް ހަގު އުމުރެއްގައި ވިދާލައި، އޭނާ ވަނީ ފްރާންސްގެ ޓީމުގެވެސް މުހިންމު ކުޅުންތެރިއަކަށްވެފަ އެވެ. ފްރާންސްގެ ގައުމީ ޓީމަށް 2017 ވަނަ އަހަރު އެމްބާޕޭ ކުޅެންފެށިއިރު، އޭނާގެ އުމުރަކީ 18 އަހަރެވެ.
ވޯލްޑް ކަޕް 2018 ގައި ލަނޑު ޖަހައި، އެމްބާޕޭ ވަނީ ވޯލްޑް ކަޕެއްގައި ލަނޑު ޖެހި ފްރާންސްގެ އެންމެ ޒުވާން ކުޅުންތެރިޔާ އަަށްވެފަ އެވެ. އެ އަހަރުގެ ވޯލްޑް ކަޕް ފްރާންސް އިން ކާމިޔާބުކުރިއިރު، މުބާރާތުގައި އެންމެ ގިނަ ލަނޑު ޖެހި ކުޅުންތެރިންގެ ތެރޭގައި އެމްބާޕޭ ހިމެނުނެވެ. އެ މުބާރާތުގައި އެމްބާޕޭ ވަނީ ތަފާތު މޮޅު ކުޅުމެއް ދައްކައިފައެވެ. އެ އަހަރުގެ ވޯލްޑް ކަޕްގައި ދެއްކި މޮޅު ކުޅުމާ އެކު އޭނާ ވަނީ ވޯލްޑް ކަޕްގެ އެންމެ މޮޅު ޒުވާން ކުޅުންތެރިޔާގެ މަގާމާއި ފްރާންސްގެ އެންމެ މޮޅު ކުޅުންތެރިޔާގެ މަގާމު ހޯދައިފަ އެވެ.
އެމްބާޕޭ ވަނީ ފްރާންސްއާ އެކު 2021 ވަނަ އަހަރުގެ ނޭޝަންސް ލީގުވެސް ކާމިޔާބުކޮށްފަ އެވެ. އެންމެ ފަހުން 2022 ވަނަ އަހަރު ބޭއްވި ވޯލްޑް ކަޕްގައި ވެސް އެމްބާޕޭ މޮޅު ކުޅުމެއް ދެއްކިއެވެ. ފްރާންސް ފައިނަލަށް ދަތުރުކުރި ނަމަވެސް، ފައިނަލްގައި އާޖެންޓީނާ އަތުން ފްރާންސް ވަނީ ބަލިވެފަ އެވެ.
އެމްބާޕޭ ވަނީ ޔޫރޯ 2020 ގައި ފްރާންސްގެ ގައުމީ ޓީމަށް ކުޅެފަ އެވެ. އެކަމަކު، އެ މުބާރާތުގެ ދެ ވަނަ ބުރުން ފްރާންސް ވަނީ ކަޓައިފަ އެވެ.
ފްރާންސްގެ މޮނާކޯ އިން 2015 ވަނަ އަހަރު ސީނިއާ ކެރިއަރު ފެށި އެމްބާޕޭ އެ ޓީމާއެކު 2016/2017 ވަނަ އަހަރުގެ ފްރާންސް ލީގު ކާމިޔާބުކޮށްފައެވެ. އަދި އެއަށްފަހު، 2017 ވަނަ އަހަރު އޭނާ ވަނީ ޕީއެސްޖީ އަށް ބަދަލުވެފަ އެވެ. ޕީއެސްޖީގައި އަހަރުތަކެއް ހޭދަކުރުމަށްފަހު، 2023/2024 ވަނަ އަހަރުގެ ސީޒަނަށް ފަހު އެ ކްލަބު ދޫކޮށްލަން އެމްބާޕޭ ވަނީ ނިންމައިފަ އެވެ. އެމްބާޕޭ އެ ކްލަބާ ވަކިވާނީ އެ ކްލަބުގެ ތާރީހުގައި އެންމެ ގިނަ ލަނޑު ޖެހި ކުޅުންތެރިޔާގެ ގޮތުގަ އެވެ. އެމްބާޕޭ ވަނީ އެ ޓީމަށް ކުޅުނު 308 މެޗުގައި 256 ލަނޑު ޖަހައިފަ އެވެ.
