ބެލްޖިއަމް އަކީ މި ފަހަރުގެ މުބާރާތުގެ ހޯސްޓް ޖަރުމަނަށް ފަހު، މުބާރާތަށް ކޮލިފައިވި ފުރަތަމަ ޓީމެވެ. މިއީ، ބެލްޖިއަމް އިން ޔޫރޯ ފުޓްބޯޅަ މުބާރާތުގައި ވާދަކުރާނެ ހަތް ވަނަ ފަހަރެވެ. މިއީ، ބެލްޖިއަމް ފުޓްބޯޅަ ތާރީހުގައި، އެ ޓީމުން ޔޫރޯ ފުޓްބޯޅަ މުބާރާތުގެ ތިން މުބާރާތެއްގައި ޖެހިޖެހިގެން ކުޅޭނެ ފުރަތަމަ ފަހަރެވެ. އެ ޓީމުން، ވަނީ 2016 އާއި 2020 ވަނަ އަހަރުގެ މުބާރާތުގައި ވާދަކޮށްފަ އެވެ.
އަމިއްލަ ގައުމުގައި 1972 ވަނަ އަހަރު ޔޫރޯ ފުޓްބޯޅަ މުބާރާތް ބޭއްވިއިރު، ބެލްޖިއަމް އިން ވަނީ ތިން ވަނަ ހޯދައިފަ އެވެ. އެންމެ ފަހުން ދެ ފަަހަރު، ޔޫރޯ ފުޓްބޯޅަ މުބާރާތުގައި ވާދަކޮށް، ބެލްޖިއަމް ކެޓީ ކުއާޓާ ފައިނަލުންނެވެ.
ބެލްޖިއަމްގެ ފުޓްބޯޅައިގައި އޮތް ރަން ޖީލަށް ތަށްޓެއް ނުހޯދައިދެވުމުގެ ޒިންމާ ނަގައި، އެންމެ ފަހުން ބޭއްވި ފީފާ ވޯލްޑް ކަޕަށް ފަހު، ކޯޗު ރޮބާޓޯ މާޓީނޭޒް ވަނީ އެ ޓީމު ދޫކޮށްލައިފަ އެވެ. ޖަރުމަނުގެ ކްލަބްތަކުން ފާހަގަވި ކޯޗު، ޑޮމެނީކޯ ޓެޑެސްކޯ، ބެލްޖިއަމްގެ ކޯޗުކަމާ ހަވާލުވީ، މިދިޔަ އަހަރުގެ މިދިޔަ އަަހަރުގެ ފެބްރުއަރީ މަހުގަ އެވެ. އޭނާ އަށް ކޮންޓްރެކްޓް ދީފައި އޮތީ މި ފަހަރުގެ ޔޫރޯގެ ނިޔަލަށެވެ.
ނަން މަޝްހޫރު ތަރިން ގިނަ ބެލްޖިއަމް ޓީމަކީ، މި ފަހަރުގެ ޔޫރޯ އަށް މެޗަކުން ބަލިނުވެ ކޮލިފައިވި ޓީމެކެވެ. ކޮލިފައިން އަށް މެޗުގެ ތެރެއިން ހަ މެޗުން މޮޅުވެ، ދެ މެޗުން އެއްވަރުވިއިރު، ބެލްޖިއަމުން ވަނީ 22 ލަނޑު ޖަހައިފަ އެވެ. ބައިކޮޅަށް ވަނީ އެންމެ ހަތަރު ލަނޑެެވެ.
މި ފަހަރުގެ ޔޫރޯގައި ބެލްޖިއަމް ލައްވާލީ، ސްލޮވާކިއާ، ރުމޭނިއާ އަދި ޔޫކްެރެއިނާ އެއް ގްރޫޕެއްގަ އެވެ. މިއީ ބެލްޖިއަމަށް އުނދަގޫވާނެ ގްރޫޕެކެވެ. އެކަމަކު، ބެލްޖިއަމްގެ ކެޕްޓަން، ކެވިން ޑި ބްރޭނާ އާއި ފޯވާޑް ރޮމެލޫ ލުކާކޫ ފޯމުގައި ހުރެފިނަމަ އެ ޓީމަށް މާ އުނދަގޫ މެޗުތަކެއް ގްރޫޕް ސްޓޭޖުގައި ނެތެވެ.
