މިއީ ނެދަލެންޑްސް އިން ޔޫރޯ ފުޓްބޯޅަ މުބާރާތުގައި ކުޅޭނެ 11 ވަނަ ފަަހަރެވެ. ނެދަލެންޑްސް އިން އެންމެ ފަހުން ޔޫރޯގައި ވާދަކުރީ އަށް އަހަރުގެ މެދުކެނޑުމަކަށް ފަހު އެވެ. ފްރާންސްގައި 2016 ވަނަ އަހަރު އޮތް ޔޫރޯ އަށް ނެދަލެންޑްސް ކޮލިފައިނުވެ އެވެ. މީގެ ކުރިން، ޔޫރޯ ފުޓްބޯޅަ މުބާރާތް 1988 ވަނަ އަހަރު ކާމިޔާބުކުރި ނެދަލެންޑަސް، އެންމެ ފަހުން ބޭއްވި މުބާރާތުން ކެޓީ ގަދަ 16 ބުރުގައި، ޗެކް ރިޕަބްލިކް އަތުންނެވެ.
ނެދަލެންޑްސް އިން މި ފަހަރުގެ ޔޫރޯ ފުޓްބޯޅަ މުބާރާތަށް ކޮލިފައިވީ، ކޮލިފައިން ގްރޫޕް ބީގެ ދެ ވަނަ ޓީމުގެ ގޮތުގަ އެވެ. އެ ގްރޫޕްގެ އެއް ވަނަ ޓީމުގެ ގޮތުގައި ޔޫރޯ އަށް ކޮލިފައިވީ ފްރާންސް އެވެ. މި ފަހަރުގެ ޔޫރޯގައި ވެސް ފްރާންސް ހިމެނެނީ، ނެދަލެންޑްސްއާ އެއް ގްރޫޕެއްގަ އެވެ. ނެދަލެންޑްސް އިން ކޮލިފައިންގައި ކުޅުނު އަށް މެޗުގެ ތެރެއިން ހަ މެޗުން މޮޅުވި އެވެ. ބަލިވި ދެ މެޗަކީ، ފްރާންސާ ދެކޮޅަށް ކުޅުނު ދެ މެޗުންނެވެ.
ހަ އަހަރު ތެރޭ ދެ ވަނަ ފަހަރަށް ކޯޗު ރޮނާލްޑް ކޫމަން، ނެދަލެންޑްސްއާ ހަވާލުވީ، 2023 ވަނަ އަހަރުގެ ޖެނުއަރީ މަހުގަ އެވެ. އޭނާ އަލުން ނެދަލެންޑްސް އަށް ގެނައީ، 2022 ވަނަ އަހަރުގެ ފީފާ ވޯލްޑް ކަޕަށް ފަހު ނެދަލެންޑްސްގެ ކޯޗުކަމުން ލުއީ ވެން ހާލް ވަކިވެ، ކޯޗިން އިން ރިޓަޔާކުރުމުންނެވެ.
ދެ ވަނަ ފަހަރަށް ނެދަލެންޑްސް ކޯޗުކަމާ ހަވާލުވެ، ކޫމަން އަށް ފުރަތަމަ ކުރަން ޖެހުނީ އުނދަގޫ މަސައްކަތްތަކެއް ކަމުގައި ވިޔަސް މަޑުމަޑުން ޓީމުގެ ހާލަތު ރަނގަޅުކުރި އެވެ. އެ ގޮތުން،އޭނާގެ ސިސްޓަމަށް ކުޅެން ޓީމަށް ބޭނުންވާނެ ރަނގަޅު ކުޅުންތެރިންނަށް ހިމަނައިގެން ގިނަ މެޗުތަކެއްގައި ނަތީޖާ ނެރެ އެ ޓީމު ކޮލިފައިކޮށްދިނެވެ.
ނެދަލެންޑްސް އަކީ އަބަދުވެސް މަޝްހޫރު ތަރިންނާ އެކު މުބާރާތްތަކަށް ނުކުންނަ ޓީމެކެވެ. މި ވަގުތު ނެދަލެންޑްސް ޓީމުގެ އެންމެ މުހިންމު އެއް ކުޅުންތެރިއަކީ، ކެޕްޓަން، ވާޖިލް ވެން ޑައިކް އެވެ. ދެން، މެމްފިސް ޑިޕާއި އާއި ކޯޑީ ގަކްޕޯ އަަދި ޓެއުމް ކޫޕްމައިނާސް ވެސް ހިމެނެ އެވެ.
