އިންގްލެންޑަކީ އެންމެ ފަހުން ބޭއްވި ބައިނަލްއަގުވާމީ މުބާރާތްތަކަށް ބަލާއިރު، އެންމެ ރަނގަޅު ނަތީޖާތަކެއް ނެރުނު އެއް ޓީމެވެ. އެންމެ ފަހުން ބޭއްވި ޔޫރޯ ފުޓްބޯޅަ މުބާރާތުގެ ފައިިނަލުގައި އިންގްލެންޑް ބަލިވީ އަމިއްލަ ގައުމުގައި އިޓަލީއާ ވާދަކޮށް ޕެނަލްޓީ ޖަހައިގެންނެވެ.
މިއީ އިންގްލެންޑުން ޔޫރޯ ފުޓްބޯޅަ މުބާރާތުގައި ވާދަކުރާނެ 11 ވަނަ ފަހަރެވެ. އިންގްލެންޑުން މީގެ ކުރިން ވާދަކުރި ފަހަރުތަކުގައި ދެ ފަހަރެއްގެ މަތިން ވަނީ ތިން ވަަނަ ލިބިފަ އެވެ. އެއީ، އިޓަލީގައި 1968 ގައި ބޭއްވި މުބާރާތާއި އަމިއްލަ ގައުމުގައި 1996 ވަނަ އަހަރު ބޭއްވި މުބާރާތުގަ އެވެ.
ގަތެރު ސައުތުގޭޓްގެ ކޯޗުކަމުގައި ކުޅޭ އިންގްލެންޑުން މި ފަހަރުގެ ޔޫރޯ ފުޓްބޯޅަ މުބާރާތަށް ކޮލިފައިވީ، ކޮލިފައިން ގްރޫޕް ސީގެ އެއް ވަނަ ޓީމުގެ ގޮތުގަ އެވެ. އިޓަލީ އާއި ޔޫކްރެއިން ފަހަތަށް ޖައްސާލުމަށް ފަހު، އިންގްލެންޑުން ކޮލިފައިން ގްރޫޕް ނިންމާލީ މެޗަކުން ބަލިނުވެ އެވެ. އަށް މެޗު ކުޅުނުއިރު، ހަ މެޗުން މޮޅުވި އެވެ. އެއްވަރުވީ، ރަށުންބޭރުގައި ނޯތު މެސެޑޯނިއާ އާއި ޔޫކްރެއިނާ ދެކޮޅަށް ކުޅުނު މެޗުތަކުގަ އެވެ.
ކުޅުންތެރިންގެ ފެންވަރާއި މަޝްހޫރު ކަމަށް ބަލާއިރު، އިންގްލެންޑަށް ކާމިޔާބެއް ނުލިބޭތީވެ، އެ ޓީމުގެ ކޯޗު ސައުތުގޭޓަށް އޮންނަނީ ޕްރެޝަރު ބޮޑުވެފަ އެވެ. މި ފަަަހަރުގެ ޔޫރޯ އަކީ ސައުތުގޭޓަށް އިންގްލެންޑްގައި ކާމިޔާބު ހޯދަން ލިބޭ ފަހު ފުރުސަތަށް ވުމުގެ ޖާގަ އެބައޮތެވެ.
އިންގްލެންޑް މި ފަހަރުގެ ޔޫރޯގައި ހިމެނޭ ގްރޫޕަށް ބަލާއިރު، އެ ޓީމަށް ނިސްބަތުން ބަލާއިރު ކޮންމެ ޓީމެއް ވެސް ޗެލެންޖް ބޮޑުވާނެ އެވެ. އެ ގޮތުން، ސްލޮވީނިއާ، ސާބިއާ އަދި ޑެންމާކަކީ، ކުޅުންތެރިންގެ ފެންވަރަށް ބަލާއިރު، ތަފާތު ދެއްކިދާނެ ފަދަ ޓީމުތަކެކެެވެ.
މި ފަހަރުގެ ޔޫރޯގައި އިންގްލެންޑް ޓީމުން އެންމެ ފާހަގަކޮށްލެވޭނެ ދެ ކުޅުންތެރިންނަކީ، ރެއާލް މެޑްރިޑްގައި ތަފާތު ދަައްކަމުން އަންނަ، ޖޫޑް ބެލިންހަމް އާއި އިނގިރޭސި ޕްރިމިއާ ލީގުގެ މޮޅު ކުޅުންތެރިޔާގެ މަގާމު ހޯދި މެންޗެސްޓާ ސިޓީގެ ފިލް ފޯޑެން އެވެ.
