ސްޕެއިނުން ވަނީ މީގެ ކުރިން، 11 ފަަހަރު ޔޫރޯ ފުޓްބޯޅަ މުބާރާތުގައި ވާދަކޮށް، ތިން ފަހަރު މުބާރާތުގެ ތަށި ހޯދައިފަ އެވެ. ޖަރުމަނަށް ފަހު، މި ފަހަރުގެ ޔޫރޯ ފުޓްބޯޅަ މުބާރާުތުގައި ވާދަކުރާ އެހެން ގައުމުތަކަށް ބަލާއިރު، އެންމެ ގިނަ ފަަހަރު ވާދަކުރި ޓީމަކަށް ދެން އޮތީ ސްޕެއިން އެވެ. މިއީ، ސްޕެއިން ޔޫރޯގައި ފެންނާނެ 12 ވަނަ ފަހަރެވެ.
ޕޯޗުގަލްގައި 2004 ވަނަ އަހަރު ބޭއްވި ޔޫރޯ ފުޓްބޯޅަ މުބާރާތުން ކެޓީ ސްޕެއިން ވަނީ ދެން ޖެހިގެން އައި ދެ ފަހަރު ޔޫރޯ މުބާރާތް ކާމިޔާބުކޮށްފަ އެވެ. އެއީ، 2008 އާއި 2012 ވަނަ އަހަރު އެވެ. އެކަމަކު، ފްރާންސްގައި ބޭއްވި ޔޫރޯގެ ގަދަ 16 އިން ކެޓިއިރު، އެންމެ ފަހުން ބޭއްވި ޔޫރޯގައި ނާކާމިޔާބުވީ ސެމީ ފައިނަލާ ހަމައިންނެވެ.
ސްޕެއިނުން މި ފަހަރުގެ ޔޫރޯ ފުޓްބޯޅަ މުބާރާތަށް ކޮލިފައިވީ، ކޮލިފައިން ގްރޫޕް އޭގެ އެއް ވަނަ ޓީމުގެ ގޮތުގަ އެވެ. ކޮލިފައިން ބުރުގައި ކުޅުނު އަށް މެޗުގެ ތެރެއިން ހަތް މެޗުން ސްޕެއިން މޮޅުވި އެވެ. އެ ޓީމު ބަލިވީ، ގްރޫޕްގެ ދެ ވަަނަ ހޯދައިގެން ޔޫރޯ އަށް ކޮލިފައިވި ސްކޮޓްލެންޑް ދަނޑުގައި ކުޅުނު މެޗުންނެވެ.
ލުއިސް އެންރީކޭގެ ކޯޗުކަމުގައި އެންމެ ފަހުން ބޭއްވި ޔޫރޯ ފުޓްބޯޅަ މުބާރާތުގައި ސްޕެއިނުން ވާދަކުރިއިރު، ރެއާލް މެޑްރިޑްގެ ކުޅުންތެރިއަކަށް ފުރުސަތު ނުދޭ މައްސަލައިގައި ގިނަ ސަޕޯޓަރުންގެ ނުރުހުން އަމާޒުވި އެވެ. އުނދަގޫ ހަރުފަތްތަކެއް ގިރާކުރުމަށް ފަހު ވެސް އެންރީކޭ ވަނީ ސްޕެއިން، ސެމީ ފައިނަލާ ހަމައަށް ގެންގޮސްދީފަ އެވެ.
ސްޕެއިނާ މި ވަގުތު ހަވާލުވެ ހުރި ކޯޗު، ލުއިސް ޑެ ލަ ފުއެންޓޭ، އެ ޓީމުގެ ޒިންމާ ނެގި ފަހުން، އަލުން އެ ޓީމުން އަންނަނީ ކުރީގެ ރަނގަޅު ޓްރެކަށް އެޅެން މަސައްކަތް ކުރަމުންނެވެ. ޑެ ލަ ފުއެންޓޭގެ ޕްލޭނުގައި އެންމެ އިސް ޒިންމާއެއް ދީފައި އޮތް ކުޅުންތެރިއަކީ، ފޯވާޑް އަލްވާރޯ މޮރާޓާ އެވެ. ނިސްބަތުން ބަލާއިރު، ސްޕެއިން އޮތީ މަރުގެ ގްރޫޕްގަ އެވެ. އެ ގްރޫޕްގައި ދެން ހިމެނެނީ، އިޓަލީ އާއި ކްރޮއޭޝިއާ އަދި އަލްބޭނިއާ އެވެ.
