ސަސް އިން މޮޅުވާން ދަނިކޮށް އޮޑި ސަލާމަތްކޮށްދިނީ ޖައު

އެފްއޭއެމް 19 އަހަރުން ދަށުގެ ޔޫތު ޗެމްޕިއަންޝިޕްގައި މިއަަދު ހަވީރު ކުޅުނު މެޗުގައި، ފަހު ވަގުތު އަހުމަދު ޖައުޝަން އަބްދުالله (ޖައު) ކާމިޔާބު ކޮށްދިން ގޯލުން ސުޕަ ޔުނައިޓެޑް ސްޕޯޓްސް (ސަސް) މޮޅުވިޔަ ނުދީ އޮޑި ސްޕޯޓްސް ކުލަބުން ހިފަހައްޓައިފި އެވެ.

އޮޑިން ފަހުކޮޅުގައި ޖެހި ގޯލާ އެކު، ސަސްއާ ކުޅުނު މި މެޗު ނިމުނީ 1-1 އިން އެއްވަރުވެގެންނެވެ.

މި މުބާރާތުގައި ސަސް އިން ކުޅުނު ފުރަތަމަ މެޗުގައި ބުރު ސްޕޯޓްސް ކުލަބްގެ މައްޗަށް ވަނީ ކުރިހޯދައިފަ އެވެ. އަދި އޮޑިން ކުޅުނު ފުރަތަމަ މެޗުގައި ޓީސީ ސްޕޯޓްސް ކުލަބް އަތުން ވަނީ ބަލިވެފަ އެވެ. އެހެންވެ މި މެޗަށް ނުކުތްއިރު, އޮޑި އަށް މި މެޗުން ނަތީޖާއެއް ނެރުން ވަނީ މަޖުބޫރުވެފަ އެވެ.

މި މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް, މެޗުގެ ވަކި ހިސާބަކުން ސަސް އިން ވަނީ އެ ޓީމުގެ އެޓޭކުތައް ވަރުގަދަކޮށް އޮޑީގެ ހާފަށް ބާރުބޮޑު ކޮށްފަ އެވެ. މެޗުގެ ފުރަތަމަ ހާފު ނިމުމުގެ ކުރިން ސަސް އަށް ލީޑު ނަގާދިނީ މުހައްމަދު އިޒާން އަލީ ކާމިޔާބުކުރި ގޯލުންނެވެ.

ސަސްގެ އިޒާން އަތުން އޮޑިގެ އައިހަމް ބޯޅަ ހޯދަނީ.--- ފޮޓޯ: އިމޭޖަސް،.އެމްވީ / ސުއާދު އަބްދުއްސައްތާރު (ޝޫ)

ދެވަނަ ހާފު ފަށައިގެންވެސް ސަސް އިން ވަނީ ފުރަތަމަ ހާފު ނިންމާލި ފޯމު ހިފަހައްޓައި އޮޑީގެ ފަހަތަށް ބާރުބޮޑު ކޮށްފަ އެވެ. އެކަމަކު، މެޗުގެ ފަހު ކޮޅު އޮޑިން ކުޅުން ރަނގަޅުކޮށް ވަނީ ސަސްގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލައިފަ އެވެ.

އެ ގޮތުން މެޗުގެ 76 ވަނަ މިނެޓުގައި އޮޑީގެ ކެޕްޓަން ޔޫސުފް ޝާއިފް ފޮނުވާލި ހިލޭ ޖެހުން ގޯލުގެ އަރިމަތީ ދަނޑި ކައިރިން ދިޔައީ ބޭރަށެވެ. އަދި އޭގެ ހަތަރު މިނެޓު ފަހުން އޮޑީގެ ޖައު އޭރިއާ ބޭރުން ފޮނުވާލި ނުރައްކާތެރި ހަމަލާ ވެސް ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.

މެޗުގެ 83 ވަނަ މިނެޓުގައި އޮޑި އަށް އެއްވަރުކޮށްދިނީ ޖައު ކާމިޔާބުކުރި ގޯލުންނެވެ. މިއީ އޭރިއާ ތެރެއިން މުޅިން ހުހަށް ހުރެ ޖައު ގޯލުގެ މަތީ ކަނަށް ބޯޅަ ފޮނުވާލައިގެން ކާމިޔާބުކުރި ގޯލެކެވެ.

އޭގެ ދެ މިނެޓު ފަހުން އޮޑި އަށް ލީޑު ނަގާދޭން މުހައްމަދު އައްލާމް އިބްރާހީމް ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑި އަށެވެ.

މި މުބާރާތުގައި މިރޭ ވެސް މެޗެއް ކުޅޭނެ އެވެ. މިރޭ ކުޅޭނީ، ގްރޫޕް އޭގެ ޓީސީ ސްޕޯޓްސް ކުލަބް އާއި ބުރު ސްޕޯޓްސް ކުލަބް ބައްދަލުކުރާ މެޗެވެ. މި މެޗުން މޮޅުވެ، ޓީސީ އަށް ސެމީން ޖާގަ ހޯދުމުގެ ފުރުސަތު އެބައޮތެވެ.