މެންޗެސްޓާ (ޖޫން 12) - މެންޗެސްޓާ ޔުނައިޓެޑްގެ ކޯޗުގެ މަގާމުގައި އެރިކް ޓެން ހާގް ބަހައްޓަން އެ ކްލަބުން ނިންމައިފި އެވެ.
ޔުނައިޓެޑުން މި ގޮތަށް ނިންމާފައިވަނީ، އެ ކްލަބްގެ ފުޓްބޯޅައިގެ ކަންކަމުގެ ޒިންމާއާ ހަވާލުވި އިނިއޯސް ކުންފުނިން ކުރިއަށްގެންދިޔަ ރިވިއު ނިންމާލުމަށް ފަހު އެވެ. އެ ގޮތުން، ޔުނައިޓެޑުން މިހާރު މަސައްކަތް ކުރަމުން އަންނަނީ، ޓެން ހާގް، 54، ގެ ކޮންޓްރެކްޓް އާ ކުރުމުގެ މަޝްވަރާތައް ފެށުމަށެވެ.
މީގެ ދެ އަހަރު ކުރިން، އަޔަކްސް ދޫކޮށް ޔުނައިޓެޑްގެ ކޯޗުކަމާ ހަވާލުވި ޓެން ހާގް، މި ވަގުތު ހުރި ކޮންޓްރެކްޓް އަންނަ ސީޒަނުގެ ނިިޔަލަށް ހަމަވާނެ އެވެ. އެ އެއްބަސްވުމުގައި ހިމަނާފައިވާ ގޮތުން، ޔުނައިޓެޑުން ޓެން ހާގާ އެކު އިތުރު އެއް އަހަރަށް ކޮންޓްރެކްޓް އާ ކުރަން މަޝްވަރާ ކުރެވޭނެ އެވެ.
އެކަމަކު، ރިޕޯޓްތައް ބުނާގޮތުގައި ޓެން ހާގްއާ އެކު ޔުނައިޓެޑުން ކުރިއަށްގެންދަނީ އިތުރު ތިން އަހަރުގެ ކޮންޓްރެކްޓެއްގެ މަޝްވަރާ އެވެ.
ބަޔާން މިއުނިކްގައި ވެސް ކޯޗިން ސްޓާފެއްގެ ގޮތުގައި މަސައްކަތްކުރި ޓެން ހާގް ވަނީ ޔުނައިޓެޑާ އެކު މަސައްކަތްކުރި ދެ ސީޒަނުގައި ވެސް ތަށި ހޯދައިފަ އެވެ. ފުރަތަމަ ސީޒަނުގައި ލީގު ކަޕް ހޯދިއިރު، ދެ ވަނަ ސީޒަން ނިންމާލީ އެފްއޭ ކަޕްގެ ތަށްޓާ އެކު އެވެ.
ޓެން ހާގް، މަގާމުން ވަކިކުރުމުގެ ވާހަކަތައް ކުރިއަށްދާ އެންމެ ބޮޑު ސަބަބަކީ އެ ޓީމަށް އިނގިރޭސި ޕްރިމިއާ ލީގުގައި ނަތީޖާ ނުނެރެވޭތީ އެވެ. ޔުނައިޓެޑުން މިދިޔަ ސީޒަނުގައި ލީގު ނިންމާލީ އަށް ވަނައިގައި އޮވެ އެވެ.
