ލިވަޕޫލް (ޖޫން 11) - އިނގިރޭސި ޕްރިމިއާ ލީގުގެ އެވަޓަން ގަންނަން ޝައުގުވެރިވާ މަހުޖަނުންގެ ގުރޫޕުން 400 މިލިއަން ޕައުންޑްގެ ބިޑެއް ހުށަހަޅައިފި އެވެ.
މި ގުރޫޕްގައި ސައުދީ އަރަބިއްޔާގެ ޝާހީ އާއިލާގެ މެމްބަރެއްވެސް ހިމެނޭ ކަމަށް ރިޕޯޓްތަކުން ބުނެ އެވެ.
އެވަޓަންގެ މައި ހިއްސާދާރު ކަމަށްވާ، އީރާނުގެ ފަރުހާދު މޮޝީރީ ވަނީ އެ ކްލަބުގެ ހިއްސާ ކުންފުންޏަކަށް ވިއްކާލަން މިދިޔަ އަހަރުގެ ސެޕްޓެމްބަރު މަހު އެއްބަސްވެފަ އެވެ. އެކަމަކު، އެ ކުންފުންޏަށް އެ ޑީލް ނިންމާލެވޭ ގޮތެއްނުވި އެވެ. އެހެންކަމުން، އެވަޓަން ގަންނަން ޝައުގުވެރިވާ އެހެން ފަރާތްތަކަށް އެ ދޮރު އޮތީ ހުޅުވިފަ އެވެ.
އެވަޓަން ގަންނަ 400 މިލިއަން ޕައުންޑްގެ ބިޑެއްކޮށްފައިވާ ގުރޫޕްގައި އިސްކޮށް ހަރަކާތްތެރިވަނީ ލަންޑަންގައި މަސައްކަތްކުރާ ވިޔަފާރިވެރިޔާ އަދި ގާނޫނީ ވަކީލެއް ކަމަށްވާ ވަޗޭ މަނޯކިއަން އެވެ. އޭނައާ އެކު ބިޑްގައި އެމެރިކާގެ މުއްސަނދި އާއިލާތަކެއް އަދި ސައުދީގެ ޝާހީ އާއިލާއެއް މެމްބަރެއް ބައިވެރިވެފައިވާ ކަމަށް ރިޕޯޓްތަކުން ބުނެ އެވެ. އެކަމަކު، އެއީ ސައުދީގެ ޝާހީ އާއިލާގެ ކޮން މެމްބަރެއް ކަމެއް ނޭނގެއެވެ.
ރިޕޯޓްތަކުން ބުނާގޮތުގައި މި ގުރޫޕުން ހުށަހަޅާފައިވަނީ އެވަޓަންގެ ދަރަނި އިތުރަށް ބޮޑުނުކޮށް، ކްލަބުގެ ކޮންޓުރޯލް ނެގުމަށެވެ. އަދި ދެމެހެއްޓެނިވި ގޮތެއްގައި، ދިގު ރާސްތާ ޕްލޭންތަކާއެކު ކްލަބުގެ ހިންގުން ހަރުދަނާ ކުރުމެވެ.
މި ގުރޫޕުން ގަބޫލްކުރާ ގޮތުގައި އެވަޓަންއަކީ ދުނިޔޭގެ އެންމެ ވަރުގަދަ ކްލަބުތަކުގެ ތެރޭގައި ހިމެނެންޖެހޭ ކްލަބެކެވެ
މީގެ އިތުރުން ދެ ވިޔަފާރިވެރިން ކަމަށްވާ އޭންޑީ ބެލް އަދި ޖޯޖް ޑައުނިން އަދި އެމްއެސްޕީ ސްޕޯޓްސް ކެޕިޓަލް އިންވެސް އެވަޓަން ގަންނަ ޝައުގުވެރިވެ އެވެ.
