ލަންޑަން (ޖޫން 8) - ޔޫރޯ ފުޓްބޯޅަ މުބާރާތަށް ތައްޔާރުވާން ރޭ ކުޅުނު މެޗުތަކުން އިންގްލެންޑުން 1-0 އިން އައިސްލެންޑް އަތުން ބަލިވިއިރު، ޖަރުމަނުން ފަހަތުން އަރައި 2-1 އިން ގްރީސް އަތުން މޮޅުވެއްޖެ އެވެ.
ވެމްބްލީ ސްޓޭޑިއަމްގައި ރޭ ކުޅުނު މެޗުގައި ފެނިގެންދިޔަ ހަމައެކަނި ލަނޑު ޖެހީ 12 ވަނަ މިނިޓްގައި އައިސްލެންޑްގެ ޖޯން ޑާގޯ ތޯސްޓެއިންސަން އެވެ. އޭނާ ޖެހި ޝޮޓް އަމާޒުވީ ގޯލުގެ ތިރީ ކަނަށެވެ. އެ ބޯޅަ ހުއްޓުވަން އިންގްލެންޑްގެ ގޯލުގައި ރޭ ހުރި ކީޕަރު އާރޮން ރަމްސްޑޭލް އަށް މާ ބޮޑު ކަމެއް ނުކުރެވުނެވެ.
ރޭގެ މެޗުގައި އިންގްލެންޑްގެ އެޓޭކުގައި ހަރަކާތްތެރިވި ފިލް ފޯޑެން، ކޯލް ޕާމާ، އެންތަނީ ގޯޑަން އަދި ކެޕްޓަން ހެރީ ކޭން އަށް އައިސްލެންޑްގެ ޑިފެންސްގެ ތެރެއިން ޖާގައެއް ހޯދައި ގޯލެއް ނުޖެހުނެވެ.
އިންގްލެންޑްގެ ސްކޮޑު ފައިނަލު ކުރި ފަހުން ކުޅުނު މި މެޗުުން އެ ޓީމު ބަލިވިއިރު، ޔޫރޯއާ އެ ޓީމުން ކުރިމަތިލާނީ ދަށް ނަތީޖާ އަކަށް ފަހު އެވެ. އެހެންވެ، އެ ޓީމުގެ ކޯޗު، ގަރެތު ސައުތުގޭޓަށް ވަނީ ޕްރެޝަރު ބޮޑުވެފަ އެވެ.
ޖަރުމަނު ކޮޅަށް ރޭގެ މެޗުގެ 33 ވަނަ މިނިޓްގައި ގްރީސްގެ ޖިއޯޖަސް މަސޫރަސް ވަނީ ލަނޑެއް ޖަހައި އެ ޓީމަށް ލީޑުނަގައިދީފަ އެވެ. ގްރީސް އިން ފުރަތަމަ ހާފު ނިންމާލީ ލީޑުގައި އޮވެ އެވެ.
އެކަމަކު ދެ ވަނަ ހާފަށް ކުޅެން ނުކުމެ ޖަރުމަނުން ވަނީ ނަތީޖާ އަނބުރާލައިފަ އެވެ. ޖަރުމަނުން އެއްވަރުކުރީ ދެ ވަނަ ހާފު ފެށިގެން 11 ވަނަ މިިިނިޓްގައި ކައި ހަވާޓްޒް ޖެހި ލަނޑުންނެވެ. ހަވާޓްޒް މި ލަނޑު ޖެހީ ލެރޯއި ސާނޭ ދިން ބޯޅައަކުންނެވެ.
ޖަރުމަނު މޮޅުކޮށްދިން ލަނޑު ޖެހީ، މެޗުގެ ފަހު މިނިޓްގައި ޕަސްކާލް ގްރޮސް އެވެ.
މި މެޗުގެ ދެ ވަނަ ހާފުގައި ޖަރުމަނުން ވަނީ ލަނޑު ޖަހާނެ ގިނަ ފުރުސަތުތަކެއް ހޯދައިފަ އެވެ.
