ވަައިގެ މަގުން މިދިޔަ ދެ މަހު އެންމެ ގިނައިން އެތެރެކުރަން އުޅުނީ ސިންތެޓިކް ޑްރަގްސްކަން މޯލްޑިވްސް ކަސްޓަމްސް ސާވިސްގެ ތަފާސްހިސާބުތަކުން ދައްކައިފި އެވެ.
ކަސްޓަމްސްގެ ތަފާސްހިސާބުތައް ދައްކާ ގޮތުން "ސިންތެޓިކް ކެތިނޯން" ގެ 180 ގްރާމު އެޕްރިލް 9، ގައި ވައިގެ މަގުން އެތެރެކޮށްގެން ހިފެހެއްޓިއިރު، މެއި 5، ގައި އިތުރު 1،690 ގްރާމު އެތެރެކުރަން އުޅެނިކޮށް ވަނީ ހިފަހައްޓާފަ އެވެ.
މީގެއިތުރުން އެޕްރިލް 2، ގައި "ކޮކެއިން" ގެ 5،670 ގްރާމު އެތެރެކުރަން އުޅެނިކޮށް ވެސް ކަސްޓަމްސްއިން ވަނީ ހިފަހައްޓާފަ އެވެ.
ކަސްޓަމްސްއިން ވަނީ މެއި 25، ގައި ރާއްޖެ އެތެރެކުރަން އުޅުނު ހެރޮއިންގެ 300 ގްރާމު ވެސް ހިފަހައްޓާފަ އެވެ.
ކަސްޓަމްސްއިން ވަނީ ގަތަރުގެ ދޯހާއިން ރާއްޖެއަށް ވައިގެ މަގުން އެތެރެވާން އުޅުނު ޕާކިސްތާނުގެ ފަސިންޖަރެއްގެ ލަގެޖުން ފަސް ކިލޯއަށް ވުރެ ގިނަ މަސްތުވާތަކެތި މާޗު މަހު އަތުލައިގަނެފަ އެވެ.
މި އަހަރު ފުލުހުން ހިންގި 56 އޮޕަރޭޝަނެއްގައި 19 ކިލޯގެ މަސްތުވާތަކެތި އަތުލައިގަތް ކަމަށް އެ އިދާރާއިން ވަނީ މެއި 13، ގައި ބުނެފަ އެވެ.
ސްޓްރީޓް ވެލިއުށް ބަލާނަމަ އެ ތަކެތީގެ އަގު 104 މިލިއަން ދިވެހި ރުފިޔާއަށް އަރާނެ ކަމަށް ފުލުހުން ބުނެ އެވެ.
