ރާއްޖޭގެ އިންޓަނޭޝަނަލް ބީޗްވޮލީ ރެފްރީ، ހުސައިން މުހައްމަދު (ވޮލީ ހުސެން) އަށް، މި އަހަރު ޗައިނާގައި ކުރިއަށްދާ އެފްއައިވީބީ 19 އަހަރުން ދަށުގެ ބީޗްވޮލީބޯޅަ މުބާރާތުގައި ރެފްރީކަން ކުރުމުގެ ފުރުސަތު ލިބިއްޖެ އެވެ.
މި މުބާރާތުގެ ފުރުސަތާ އެކު، ހުސެން އަށް މި ވަނީ ދުނިޔޭގެ މަތީ ފަންތީގެ ރެފްރީންނާ އެކު އިތުރު މުބާރާތެއްގައި މަސައްކަތްކުރުމުގެ ފުރުސަތު ލިބިފަ އެވެ.
އެ ގޮތުން، ހުސެން އަށް އެފްއައިވީބީ 19 އަހަރުން ދަށުގެ މުބާރާތުގެ ފުރުސަތު ލިބުނީ، ދުނިޔޭގެ ވޮލީބޯޅަ ފެޑެރޭޝަން، އެފްއައިވީބީގެ ނޮމިނޭޝަނަކުންނެވެ.
ނަވާރަ އަހަރުން ދަށުގެ ބީޗްވޮލީބޯޅަ މުބާރާތް އޮތީ އަންނަ އޮގަސްޓް މަހު، 27 އިން ސެޕްޓެމްބަރު 1 އަށް ޗައިނާގެ ޝަންގްލޫގަ އެވެ.
މިދިޔަ ސަރުކާރުގައި، މޯލްޑިވްސް ސްޕޯޓްސް ކޯޕަރޭޝަންގެ ޗެއާމަންގެ މަގާމު ވެސް ފުރުއްވާފައިވާ، ހުސެން އަށް ދެން މި އަހަރު ފުރުސަތު ލިބިފައިވަނީ އެފްއައިވީބީ ބީޗް ޓުއާ މުބާރާތަކުންނެވެ. އެއީ، ނޮވެމްބަރު މަހު ޗައިނާގެ ހައިކޫގައި އޮތް މުބާރާތަކުންނެވެ. އެއީ ވެސް، ދުނިޔޭގެ ފެޑެރޭޝަންގެ ނޮމިނޭޝަނަކުން ލިބުނު ފުރުސަތެކެވެ.
މިދިޔަ އަހަރު، ހުސެން ވަނީ އެފްއައިވީބީ ބީޗްޓުއާގެ ތިން މުބާރާތެއްގައި ރެފްރީކަން ކޮށްފަ އެވެ. އެއީ، ފިލިޕީންސްގެ ނުވާލީ އާއި ތައިލެންޑްގެ ޝިއަން މާއީ އަދި އިންޑިއާގެ ގޯއާގައި ކުރިއަށްދިޔަ މުބާރާތްތަކުގަ އެވެ. މިދިޔަ އަަހަރު ރާއްޖޭގައި ބާއްވަން އޮތް ބީޗްވޮލީ ޓުއާ މުބާރާތަށް ވެސް ހުސެން އަށް ނޮމިނޭޝަން ލިބުނެވެ. އެކަމަކު، އެ މުބާރާތް ވީ ކެންސަލް އެވެ.
މީގެ އިތުރުން މިދިޔަ އަހަރުގެ އޭވީސީ ސެންޓްރަލް ޒޯންގެ ކޮންޓިނެންޓަލް ކަޕްގައި ވެސް ހުސެން ވަނީ އިންސާފުކޮށްފަ އެވެ. އެއީ އޭޝިއަން ވޮލީބޯލް ކޮންފެޑެރޭޝަން (އޭވީސީ) އިން ދިން ފުރުސަތެއްގަ އެވެ.
އެފްއައިވީބީން ބިޗް ވޮލީ ރެފްރީން ގިންތި ކޮށްފައި އޮންނަނީ ކެންޑިޑޭޓް ލެވަލުން ފެށިގެން، ގްރޭޑް ޑީ، ސީ، ބީ އަދި އޭ އެވެ. ހުސެން މި ވަނީ ދެ ހަރުފަތް ކަނޑަތުކޮށްފަ އެވެ. ހުސެން، މިދިޔަ އަަހަރު ވަނީ ބޮޑު ކުރިއެރުމެއް ހޯދައި، ސީ ކެޓަގަރީ އަށް ޕްރޮމޯޓްވެފަ އެވެ.
ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ ޖެނެރަލް ސެކްރެޓަރީގެ މަގާމު ފުރި ހުސެން، 2012 ވަނަ އަހަރު ބެންކޮކުގައި ބީޗް ރެފްރީ ކޯސް ހެއްދެވުމަށް ފަހު ދެ އަހަރު ހޭދަކުރެއްވީ އެކްރެޑިޓް މެޗުތައް ހަމަކުރުމަށެވެ. އެއި ކެންޑިޑޭޓް ލެވަލްގަ އެވެ. އޭނާ ޑީ އަށް ޕްރޮމޯޓްވީ 2014 ވަނަ އަހަރު އެވެ.
