އިޒްރޭލުގެ ޕާސްޕޯޓުގައި ރާއްޖެއަށް އެތެރޭ ނުވެވޭނެ ގޮތަށް އެ ޕާސްޕޯޓު މަނާ ކުރަން ސަރުކާރުން ނިންމުމާއެކު، އެމެރިކާއިން ރާއްޖެއަށް ދޭ އެހީ މެދުކަނޑައިލަން އެ ގައުމުގެ ކޮންގްރެސަށް ބިލެއް ހުށަހަޅަނީ އެމްޑީޕީގެ ރައީސް އަބްދުﷲ ޝާހިދު އަޑީގައި ހުންނަވައިގެން ކަމަށް މައްޗަންގޮޅި އުތުރު ދާއިރާގެ މެންބަރު އިބްރާހިމް މުހައްމަދު ތުހުމަތުކުރައްވައިފި އެވެ.
އެމެރިކާގެ ކޮންގްރެސަށް އެ ބިލު ހުށަހަޅަން އުޅޭ ހަބަރު ނޫހަކުން ހިއްސާކުރަން ކުރި އެކްސް ޕޯސްޓަށް ރިޕްލައި ދެއްވައި އިބްރާހިމް ލިޔުއްވީ، "މީގެ ފަހަތުގައި ތިބީ އެމްޑީޕީން އަބްދުﷲ ޝާހިދު ކަމަށް މައުލޫމާތު ލިބޭ؟ އިތުރަށް ބަލަންޖެހޭ،" މިހެންނެވެ.
ނަމަވެސް އިތުރު އެއްވެސް ތަފުސީލެއް ނުދެއްވަ އެވެ. އިބްރާހިމްގެ ކޮމަންޓެއް ހޯދުމަށް ގުޅުމުން އަދި މެސެޖު ކުރުމުން ޖަވާބެއް ނުދެއްވާތީ އޭނާއަށް ޝާހިދާ ގުޅޭގޮތުން އެފަދަ މައުލޫމާތެއް ލިބުނު ގޮތް ސާފުވެފައެއް ނުވެ އެވެ.
އިޒްރޭލު ޕާސްޕޯޓު މަނާކުރަން ގާނޫނަށް ގެންނަންޖެހޭ އިސްލާހު ގެނައުމަށް ސަރުކާރުން ނިންމީ، ފަލަސްތީނުގެ ރައްޔިތުންނާ ދެކޮޅަށް ހިންގާ ގަތުލުއާންމާ ގުޅިގެންނެވެ. މިއީ ދިވެހި އާންމުން ވޭތުވެދިޔަ ހަ މަހެއްހާ ދުވަހު ގޮވާލަމުންދިޔަ ކަމެކެވެ.
މި ނިންމުމާ ގުޅިގެން އެމެރިކާގެ ކޮންގްރެސްގެ ތިރިގެއަށް ބިލެއް ހުށަހަޅަން ނިންމާފައިވަނީ ވެރިކަންކުރާ ޑިމޮކްރެޓުންގެ ރެޕްރެސެންޓޭޓިވް ޖޯޝް ގޮޓްހެއިމާ އެވެ. އޭނާ އަކީ އިޒްރޭލުގެ ގަތުލުއާންމަށް ތާއީދުކޮށް، އެމެރިކާގެ ކޮންގްރެސްގައި އިޒްރޭލު ދިފާއުކުރުމުގައި އެންމެ އިސްކޮށް ހަރަކާތްތެރިވާ އެކަކެވެ.
އޭނާއާ ހަވާލާދީ އެމެރިކާގެ އެކްސިއޯސް ނޫހުން ރިޕޯޓުކޮށްފައިވާ ގޮތުން، "ޕްރޮޓެކްޓިން އެލައިޑް ޓްރެވަލް ހިއާ" ގެ ނަމުގައި ހުށަހަޅާ މި ބިލުގެ މަސައްކަތުގައި ވެރިކަންކުރާ ޑިމޮކްރެޓުންގެ އިތުރުން މެންބަރުން ވެސް ގޮޓްހެއިމާ އާއެކު ދަނީ މަސައްކަތް ކުރަމުންނެވެ.
"އިޒްރޭލުގެ ރައްޔިތުން ވަނުން މަނާކުރާ ގައުމަކަށް އެމެރިކާގެ ރައްޔިތުންގެ ޓެކްސް ފައިސާ ދެވިގެން ނުވާނެ، އިޒްރޭލަކީ އަހަރުމެންގެ އެންމެ ގާތް އެއް ގައުމު، ދިވެހިރާއްޖޭގެ މި ނިންމުމަކީ ޔަހޫދީންނާ ދެކޮޅަށް ނިންމި ނިންމުމެއް،" ގޮޓްހެއިމާ ނެރުނު ބަޔާނެއްގައި ބުނެފައިވެ އެވެ.
ރާއްޖޭގެ ނިންމުމާއެކު އިޒްރޭލުން ވަނީ މި ވަގުތު ރާއްޖޭގައި ތިބި އިޒްރޭލުގެ އެންމެން މިތަން ދޫކޮށް ދިޔުމަށާއި، ރާއްޖެއަށް ޒިޔާރަތް ނުކުރުމަށް އިލްތިމާސްކޮށްފަ އެވެ.
އިޒްރޭލުގެ ފޮރިން މިނިސްޓްރީއާ ހަވާލާދީ ދަ ޓައިމްސް އޮފް އިޒްރޭލްގައި ބުނެފައި ވަނީ މި ވަގުތު ރާއްޖޭގައި ތިބި އިޒްރޭލު މީހުން ފުރައިގެން ދިޔުމަށް އެދެނީ ނުރައްކަލެއް ކުރިމަތިވެދާނެ ހާލަތެއްގައި އެހީތެރިވުމަށް ދަތިވާނެތީ ކަމަށެވެ.
