އިންޑިއާގައި ބާބްރީ މިސްކިތް ތަޅާލި އުއްތަރު ޕްރަދޭޝްގެ އަޔޯދިޔާ ސްޓޭޓާއި ލަކްޝަދީބުން އިންޑިއާގެ ބޮޑުވަޒީރު ނަރެންދުރަ މޯދީގެ ކޯލިޝަނަށް އާންމު އިންތިހާބުގައި ނާކާމިޔާބީއާ ކުރިމަތިލާން ޖެހިއްޖެ އެވެ.
ގާތްގަނޑަކަށް 16 ވަނަ ގަރުނުގައި އެޅި ބާބްރީ މިސްކިތް ތަޅާލައި އެތަނުގައި "ރާމް ޓެމްޕަލް" ނަމުގައި ފައްޅިއެއް އަޅައި ހުޅުވާފައި ވަނީ މިދިޔަ ޖެނުއަރީ މަހުގެ ތެރޭގަ އެވެ. އަދި ފައްޅި ހުޅުވައިދެއްވީ މޯދީ އެވެ.
އިންޑިއާގެ އާންމު އިންތިހާބުގައި އަޔޯދިޔާ ސްޓޭޓުން މޯދީގެ ބީޖޭޕީގެ ކެންޑިޑޭޓު ލައްލު ސީންހު ބަލިވީ އެސްޕީގެ ކެންޑިޑޭޓު އަވަދޭޝް ޕްރަސާދުއާ ވާދަކޮށްގެންނެވެ.
އިންޑިއާގައި އެންމެ ގިނަ މީހުން ވޯޓުލި އެއް ސްޓޭޓު ކަމަށްވާ އުއްތަރު ޕްރަދޭޝްއިން މޯދީގެ ނިސްބަތްވާ އެންޑީއޭގެ ކޯލިޝަނަށް 36 ގޮނޑި ލިބުނުއިރު، އިންޑިއަން ނެޝަނަލް ކޮންގްރެސްއާއި އެސްޕީގެ ކޯލިޝަނުން ވަނީ 43 ގޮނޑި ކާމިޔާބުކޮށްފަ އެވެ.
އެންޑީއޭއިން ވަނީ 2014 ގެ އިންތިހާބުގައި އުއްތަރު ޕްރަދޭޝްއިން 71 ގޮނޑި ކާމިޔާބުކޮށްފަ އެވެ. އަދި 2019 ގެ އިންތިހާބުން އެންޑީއޭއިން ވަނީ އުއްތަރު ޕްރަދޭޝްއިން 62 ގޮނޑި ކާމިޔާބުކޮށްފަ އެވެ.
ލަކްޝަދީބުގައި މޯދީގެ ކޯލިޝަންގައި ހިމެނޭ ނެޝަނަލިސްޓް ކޮންގްރެސް ޕާޓީގެ ކެންޑިޑޭޓާ ވާދަކޮށް އިންޑިއަން ނެޝަނަލް ކޮންގްރެސް ޕާޓީގެ ކެންޑިޑޭޓު ހަމްދުﷲ ސައީދު ގޮނޑި ކާމިޔާބުކުރީ 52 ޕަސަންޓަށްވުރެ ގިނައިން ވޯޓު ހޯދައިގެންނެވެ.
މޯދީގެ ސަރުކާރުން މުސްލިމުންނަށް ދަތި ކުރުމަށް ސިޔާސަތުތަކެއް ލަކްޝަދީބުގައި ގެންގުޅެ، ތިމާވެއްޓަށް ގެއްލުންވާ ގޮތަށް ޓޫރިޒަމް ޕްރޮޖެކްޓުތައް ފެށުމުން ލަކްޝަދީބުގެ ރައްޔިތުން އެކަމާ ދެކޮޅަށް އަޑުއުފުލި އެވެ.
މީގެ އިތުރުން ކުރީއްސުރެ މުސްލިމުން ގިނަ ލަކްޝަދީބުގައި ހުކުރު ދުވަސް ބަންދު ދުވަހެއް ގޮތުގައި އޮންނަނީ ކަނޑައަޅާފަ އެވެ. ނަމަވެސް ސަރުކާރުން އެކަން ވެސް ބަދަލު ކުރުމުން ސަރުކާރަށް ފާޑު ކިޔުން އަމާޒުވި އެވެ.
މޯދީގެ ކޯލިޝަނަށް އަޔޯދިޔާގެ އިތުރުން ލަކްޝަދީބު ގެއްލިފައި ވަނީ ސަރުކާރުން މުސްލިމުންނާ ދެކޮޅަށް ގެންގުޅުނު ހަރުކަށި އުސޫލުގެ ސަބަބުން ކަމަށް ގިނަ ބަޔަކު އަންނަނީ ބުނަމުންނެވެ.
މިފަހަރުގެ އިންތިހާބުގައި 2019 ގައި ގާނޫނު ހަދާ މަޖިލީހުގެ މެޖޯރިޓީ ހޯދި މޯދީގެ ބީޖޭޕީއަށް މެޖޯރިޓީ ލިބިފައެއް ނުވެ އެވެ. ނަމަވެސް މޯދީ ނިސްބަތްވާ އެންޑީއޭގެ ކޯލިޝަނުން ވަނީ މެޖޯރިޓީ ހޯދާ އިންތިހާބު ކާމިޔާބުކޮށްފަ އެވެ.
