އިންޑިއާގައި މިހާރު ވެރިކަންކުރާ ބީޖޭޕީއަށް ޕާލަމެންޓުގެ މެޖޯރިޓީ ގެއްލުނު ނަމަވެސް، އެ ޕާޓީ އިސްވެ ހަދާފައިވާ އެންޑީއޭ ކޯލިޝަނުން އިންތިހާބު ކާމިޔާބުކޮށް، ނަރެންދުރަ މޯދީ އިންޑިއާގެ ބޮޑުވަޒީރުކަމުގެ ތިންވަނަ ދައުރެއް ކަށަވަރުކޮށްފި އެވެ.
ނިމިދިޔަ ދައުރުގައި ބީޖޭޕީއިން އިންޑިއާގެ ޕާލަމެންޓްގެ ތިރިގެ ލޮކްޝަބާގެ ސާފު މެޖޯރިޓީ ދެމެހެއްޓި ނަމަވެސް، މިފަހަރުގެ އިންތިހާބުގައި އެ މެޖޯރިޓީ ގެއްލޭނެ ކަމަށް ބެލެވެ އެވެ.
ޕާޓީއަކަށް މެޖޯރިޓީ ލިބޭނީ ލޮކްޝަބާގެ 543 ގޮނޑީގެ ތެރެއިން 272 ގޮނޑި ކާމިޔާބުކޮށްގެންނެވެ. ނާތީޖާ ދައްކާ ގޮތުން މިފަހަރުގެ އިންތިހާބުގައި ބީޖޭޕީއަށް ލިބޭނީ 240 ގޮނޑި އެވެ. ބީޖޭޕީއަށް ލޮކްޝަބާގެ މެޖޯރިޓީ ގެއްލިފައި މިވަނީ ދަހަރެއް ފަހުންނެވެ.
ބީޖޭޕީގެ އިތުރުން ދެން އެ ކޯލިޝަނުގައި ހިމެނޭ އެހެން ޕާޓީތަކާ އެކު އެންޑީއޭއިން ލޮކްޝަބާގެ 292 ގޮނޑި ކާމިޔާބު ކުރާނެ ކަމަށް އިންޑިއާގެ ބައެއް މީޑިއާތަކުން ދަނީ ރިޕޯޓުކުރަމުންނެވެ.
ސާފު މެޖޯރިޓީ ގެއްލުނު ނަމަވެސް، މޯދީ ވަނީ ބީޖޭޕީގެ މައި ހަރުގެއަށް ވަޑައިގެން ޕާޓީގެ އިސްވެރިންނާއެކު އިންތިހާބުގެ ކާމިޔާބީ އިއުލާނުކުރައްވާފަ އެވެ. އެގޮތުން ކާމިޔާބީގެ ހިތާބުގައި މޯދީ ވަނީ އިންޑިއާގެ ރައްޔިތުންގެ އިތުބާރު އޭނާގެ ޕާޓީއަށް އެބައޮތް ކަމަށާއި މިއަދުގެ ނަތީޖާއަކީ ރައްޔިތުންނަށް ލިބުނު ކާމިޔާބީއެއް ކަމަށް ވިދާޅުވެފަ އެވެ.
މިއީ 1962 ގެ ފަހުން އިންޑިއާގައި ސަރުކާރަކުން ތިންވަނަ ދައުރެއް ކާމިޔާބުކުރި ފުރަތަމަ ފަހަރަކަންވެސް ފާހަގަކުރައްވައި މޯދީ ވަނީ އާ ސަރުކާރު އެކުލަވާލުމުގެ މަސައްކަތް ވަރަށް އަވަހަށް ފަށްޓަވާނެ ކަމަށް ވިދާޅުވެފަ އެވެ.
އިންޑިއާގެ އިދިކޮޅު ކޮންގްރެސް ޕާޓީ އިސްކޮށް އޮތް އިންޑިއާ ބްލޮކް ކޯލިޝަނުން މިފަހަރުގެ އިންތިހާބުގައި ވަނީ މޯދީގެ ސަރުކާރު ސިއްސުވާލާ، 222 ގޮނޑި ކަށަވަރުކުރުމާ ގާތަށް ޖެހިފަ އެވެ. ކޮންގްރެސް ޕާޓީން އެކަނި 100 އާ ގާތްކުރާ އަދަދަކަށް ގޮނޑި ކާމިޔާބު ކުރާނެ ކަމަށް ނަތީޖާއިން ދައްކަ އެވެ.
އެގޮތުން، އިންޑިއާގެ ވިޔަފާރީގެ މައި ސިޓީ މުމްބާއީގެ ހަ ގޮނޑީގެ ތެރެއިން ހަތަރު ގޮނޑިއެއްގައި ލީޑުކުރަމުން ދަނީ ކޮންގްރެސް ކޯލިޝަނުގެ ކެންޑިޑޭޓުންނެވެ. 2019 ގައި އެ ހަ ގޮނޑިވެސް ކާމިޔާބުކުރީ ބީޖޭޕީ ކޯލިޝަނުންނެވެ.
އިންޑިއާގެ އިލެކްޝަންސް ކޮމިޝަނާ ހަވާލާދީ ނޫސްތަކުން ބުނި ގޮތުގައި މިފަހަރުގެ އާއްމު އިންތިހާބުގައި ވޯޓުލާން ރެކޯޑް އަަދަދަކަށް މީހުން ނުކުތެވެ. އެކޮމިޝަނުގެ ހިސާބުތައް ދައްކާ ގޮތުން މި އިންތިހާބުގައި 642 މިލިޔަން މީހުން ވޯޓުލި އެވެ.
