މި ފަހުން ސިޔާސީ ހަރަކާތްތަކާ ގުޅުނު އިންޑިއާގެ މަޝްހޫރު ފިލްމީ ތަރި ކަންގަނާ ރަނާވަތު, 37, އިންޑިއާގެ ބަރުލަމާނީ އިންތިހާބުގައި ވާދަކޮށް ގޮނޑިއެއް ކާމިޔާބުކޮށްފި އެވެ.
އިންޑިއާގައި މިހާރު ވެރިކަންކުރާ ބީޖޭޕީގެ ޓިކެޓުގައި ވާދަކުރި ކަންގަނާ އިންތިހާބުވީ އޭނާގެ އުފަން ދާއިރާގެ ގޮނޑިއަށެެވެ. އެއީ ހިމަޗަލް ޕްރަޑޭޝް މަންޑީގެ ގޮނޑިއެވެ.
އެ ގޮނޑިއަށް އިދިކޮޅު ކޮންގްރެސް ޕާޓީގެ ލީޑަޝިޕުގައި ހިމެނޭ، ވިކްރަމަދިތާ ސިންހު ވާދަކުރި ނަމަވެސް ކަންގަނާ އިންތިހާބު ކާމިޔާބުކުރީ 74،000 އަށްވުރެ ގިނަ ވޯޓުގެ ތަފާތަކުންނެވެ.
ބަރުލަމާނީ ނިޒާމު އޮންނަ އިންޑިއާގައި ޕާޓީއަކުން ނުވަތަ ކޯލިޝަނަކުން ސަރުކާރެއް އެކުލަވައިލެވޭނީ އެގައުމުގެ ޕާލަމެންޓްގެ ތިރިގެ ލޮކްޝަބާގެ 543 ގޮނޑީގެ ތެރެއިން 272 ގޮނޑި ކާމިޔާބުކޮށްގެންނެވެ.
ކަންގަނާ އޭނާގެ ގޮނޑި ކާމިޔާބު ކުރި ނަމަވެސް ނަތީޖާ ދައްކާ ގޮތުން ވެރިކަންކުރާ ބީޖޭޕީއަށް މިފަހަރު ޕާލިމެންޓުގެ މެޖޯރިޓީ ގެއްލޭނެ އެވެ. ބެލެވޭ ގޮތުގައި އިންޑިއާގެ ބޮޑުވަޒީރު ނަރެންދުރަ މޯދީ ތިންވަނަ ދައުރަކަށް ސަރުކާރެއް އެކުލަވާލަން ޖެހޭނީ ބީޖޭޕީއިން އިސްވެ އުފައްދާފައިވާ އެންޑީއޭ ކޯލިޝަނުންގެ އެހެން ޕާޓީތަކާ ގުޅިގެންނެވެ.
އެންމެ ފަހުގެ ނަތީޖާތައް ދައްކާ ގޮތުން، މޯދީގެ އެންޑީއޭ ކޯލިޝަނުން ކަށަވަރުކޮށްފައިވަނީ 141 ގޮނޑި އެވެ. އިތުރު 142 ގޮނޑިއެއްގައި އެ ކޯލިޝަނުން ދަނީ ކުރި ހޯދަމުންނެވެ. އެއާއެކު ޖުމްލަ 283 އަށް އަރާނެ އެވެ.
އިދިކޮޅު ކޮންގްރެސް ޕާޓީގެ ކޯލިޝަނުން 104 ގޮނޑިއެއް ކަށަވަރުކޮށްފައިވާއިރު އެ ކޯލިޝަނުން ދަނީ 118 ގޮނޑިއެއްގައި ލީޑުކުރަމުންނެވެ. އެކު ޖުމްލަ އެއީ 222 ގޮނޑި އެވެ. މި ނަތީޖާތައް އެނބުރިދާނެ ކަމަށް ބައިނަލްއަގުވާމީ މީޑިއާތަކުން ދަނީ ބުނަމުންނެވެ.
ނަމަވެސް، މީގެ ކުޑަވަގުތުކޮޅެއް ކުރިން ބޮޑުވަޒީރު މޯދީ ވަނީ ބީޖޭޕީގެ މައި ހަރުގޭގައި އެ ޕާޓީގެ އިސްވެރިންނާ ބައްދަލުކޮށް ކާމިޔާބީގެ ހިތާބެއް ދީފަ އެވެ.
އިންޑިއާގެ އިލެކްޝަންސް ކޮމިޝަނާ ހަވާލާދީ ނޫސްތަކުން ބުނި ގޮތުގައި މިފަހަރުގެ އާއްމު އިންތިހާބުގައި ވޯޓުލާން ރެކޯޑް އަަދަދަކަށް މީހުން ނުކުތެވެ. އެކޮމިޝަނުގެ ހިސާބުތައް ދައްކާ ގޮތުން މި އިންތިހާބުގައި 642 މިލިޔަން މީހުން ވޯޓުލި އެވެ.
