އިންޑިއާގެ ވެރިކަންކުރާ ބާރަތިޔާ ޖަނަތާ ޕާޓީ (ބީޖޭޕީ)އާއި އެގައުުމުގެ އާއްމު އިންތިހާބަށް އެޕާޓީން އެކުލަވައިލި ކޯލިޝަނަށް، ސަރުކާރެއް އެކުލަަވައިލެވޭ ވަރުގެ އަޣުލަބިއްޔަތެއް ނުލިބޭނެ ކަމަށް ބެލެވިއްޖެ އެވެ.
ބަރުލަމާނީ ނިޒާމު އޮންނަ އިންޑިއާގައި ޕާޓީއަކުން ނުވަތަ ކޯލިޝަނަކުން ސަރުކާރެއް އެކުލަވައިލެވޭނީ އެގައުމުގެ ޕާލަމެންޓްގެ ތިރިގެ ލޮކްޝަބާގެ 543 ގޮނޑީގެ ތެރެއިން 272 ގޮނޑި ކާމިޔާބުކޮށްގެންނެވެ.
ޑިމޮކްރަސީ އޮންނަ ގައުމުތަކުގެ ތެރެއިން އެންމެ ބައިބޯ ގައުމުކަމަށްވާ އިންޑިއާގެ އާއްމު އިންތިހާބުގައި ވޯޓުލާން ފެށީ އޭޕްރިލް 19، ގަ އެވެ. ހަތް ފިޔަވައްސަކަށް ބަހާލައިގެން ކުރިއަށް ގެންދިޔަ އެ އިންތިހާބުގައި ވޯޓުލައި ނިމުނީ މިދިޔަ ހޮނިހިރު ދުވަހު އެވެ.
އިންޑިއާގެ ބޮޑުވަޒީރުކަން ތިންވަނަ ދައުރަކަށް ކާމިޔާބުކުރުމަށް ޓަކައި ބޮޑުވަޒީރު ނަރެންދުރާ މޯދީ އިސްކޮށް ހުންނަަވައި، ބީޖޭޕީން އެކުލަވައިލި އެންޑީއޭ ކޯލިޝަނަށް ލޮކްޝަބާގެ ގިނަ ގޮނޑިތައް ކާމިޔާބުކުރެވޭނެ ކަމަށް އެ ކޯލިޝަނުގެ އެގްޒިޓް ޕޯލްތަކުން ދެއްކި އެވެ. އެހެން ނަމަވެސް އިންޑިއާގެ ނޫސްތަކާއި ބައިނަލް އަގުވާމީ ނޫސް އެޖެންސީތަކުން މީގެ ކުޑަ އިރުކޮޅެއް ކުރިން ބުނީ ކޮންގްރެސް ޕާޓީ އިސްކޮށް އޮތް އިންޑިއާ ބްލޮކް ކޯލިޝަނުން ގިނަ ގޮނޑި ކާމިޔާބުކުރާނެ ކަމަށް މިހާރު ބެލެވިފައިވާ ކަމަށެވެ.
އިންޑިއާގެ އިލެކްޝަންސް ކޮމިޝަނާ ހަވާލާދީ ނޫސްތަކުން ބުނި ގޮތުގައި މިފަހަރުގެ އާއްމު އިންތިހާބުގައި ވޯޓުލާން ރެކޯޑް އަަދަދަކަށް މީހުން ނުކުތެވެ. އެކޮމިޝަނުގެ ހިސާބުތައް ދައްކާ ގޮތުން މި އިންތިހާބުގައި 642 މިލިޔަން މީހުން ވޯޓުލި އެވެ.
