ދިވެހިންނަކީ އިހު ޒަމާނުއްސުރެ ފޯރީގައި އީދު ފާހަގަކުރަމުން އައި ބަޔެކެވެ. ހާއްސަކޮށް ބޮޑު އީދު ފާހަގަކުރުމުގައި ގިނަ ކުޅިވަރުތައް ކުޅެ، ރަށް ރަށުގެ އެންމެން ބައިވެރިވެގެން މަޖާ ނަގާ، އުފާ ފާޅުކުރުމަކީ ރާއްޖޭގެ ހުރިހާ ރަށެއްގައިވެސް އެކި ސިފައިގައި ކުރަމުން އަންނަ ކަމެކެވެ.
މިގޮތުން ރާއްޖޭގައި އެންމެ ކުލަގަދަކޮށް އީދު ފާހަގަކުރާ އެއް ރަށެއްގެ ގޮތުގައި މަޝްހޫރުވެފައިވާ ނ. ވެލިދޫގެ ރައްޔިތުން މި އަހަރުވެސް ތައްޔާރުވަމުން ދަނީ ކުލަގަދަ އީދެއް ފާހަގަކުރުމަށެވެ.
"މި އަހަރު ގެ އީދު އެހެން އަހަރުތަކާއި މާ ބޮޑު ތަފާތެއް ނެތަސް ރަށަށް ޒިޔާރަތްކުރާ ފަރާތްތަކާއި ރަށުގެ ރައްޔިތުންނާއި އާއިލާތަކަށް އުފާވެރި މަޖާ އީދަކަށް މި އީދު ވެގެންދާނެކަމަށް އުންމީދުކުރަން،" ވެލިދޫ ކައުންސިލްގެ ރައީސް އާތިފް ހުސެއިން "އަދަދު" އާ ވާހަކަ ދައްކަވަމުން ވިދާޅުވި އެވެ.
ޒަމާނާއެކު އީދު ކުޅިވަރުތައްވެސް ބަދަލުވަމުން، ފަހުގެ ކުލަތަށް ޖެހެމުން ދިޔަ ނަމަވެސް ވެލިދޫގެ އީދަކީ އަބަދުވެސް އެންމެ އިހުގެ ސަގާފަތްތަކާއި ކުޅިވަރުތައް ހިމެނޭ ގޮތަށް އިންތިޒާމުވެގެން އަންނަ އީދެކެވެ.
ވެލިދޫ އީދު ކުޅިވަރުތައް
ވެލިދޫގައި އީދު ކުޅިވަރުތައް ފެށަނީ އީދު ވިލޭރޭ އެވެ. އެގޮތުން, އިރާކޮޅު ރަންފޮށި އުފުލުމާއި އީދު މަޅިޖެހުން، އަދި މެންދަމު އީދު ނެރުމަކީ ވެލިދޫގައި ވޭތުވެދިޔަ 50 އަކަށް އަހަރުވެސް، ކޮންމެ ބޮޑު އީދެއް ފެށުމުގެ ގޮތުން މެދުކެނޑުމެއްނެތި ހިންގި ހަރަކާތްތަކެކެވެ.
ވޭތުވެދިޔަ ދަހަރުގެ ހުރިހާ އަހަރެކޭ އެއްގޮތަށް، މޫސުން ތަންދޭނަމަ މިފަހަރުވެސް ވެލިދޫގައި އީދު ނަމާދު ކުރުން އޮންނާނީ ރަށުގެ ފުޓުބޯޅަ ދަނޑުގައި ބޮޑު ޖަމާއަތުގަ އެވެ. އެއަށްފަހު ރައްޔިތުންނާއި އީދަށް ޒިޔާރަތް ކުރާ އެންމެނަށް އެ ސަރަހައްދުގައި އީދު ސައި އޮންނާނެ އެވެ.
ސަގާފީ ގޮތުން ދިވެހިން އީދާއި ގުޅުވައިގެން ކުޅޭ އެކި ކުޅިވަރުތަކުގެ މުބާރާތްތައް ވެސް ވެލިދޫގެ އީދު ހަރަކާތްތަކުގެ ތެރޭގައި ހިމެނިގެން ކުރިއަށްގެންދެ އެވެ. އޭގެ ތެރޭގައި މި އަހަރު ބޭއްވުމަށް ހަމަޖެހިފައިވަނީ ފައިގަތަޅާ އަދި ވާދެމުމުގެ މުބާރާތެކެވެ. ޒަމާނީ ކުޅިވަރުތަކަށް ބަލާއިރު ބައިސްކަލް އަދި ސައިކަލް ރޭސް ހިމެނެ އެވެ.
މިދިޔަ އަހަރު އީދުގެ ތެރެއިން ވެލިދޫގައި ކުރިއަށް ގެންދިޔަ ކަލާ ރަންގެ ތެރެއިން - ފޮޓޯ: ވެލިދޫ ކައުންސިލް
އޭގެއިތުރުން، އީދުގެ ފުރަތަމަ ތިން ރޭ ސްޓޭޖް ޝޯ ބޭއްވުމަށް ހަމަޖެހިފައިވާއިރު، އީދު ދުވަހުގެ ރޭ ވެލިދޫގައި އީދުގެ އުފާ ފާޅުކުރުމަށް ހަވާ އެރުވުމަށްވެސް ވަނީ ހަމަޖެހިފަ އެވެ. އީދު ޝޯތައް ދޭ ގްރޫޕުތަކުގެ ތެރޭގައި ހިޔަލަ ގްރޫޕް، ޝަމްވީލް އެންޑް ބޭންޑް، އަދި އެކަތި ބޮޑުބެރު ގްރޫޕް ހިމެނެ އެވެ.
ޒަމާނުއްސުރެ އީދު ފާހަގަކުރުމަށް ހިންގޭ ހަރަކާތްތަކުގެ ތެރެއިން، ބޮޑުމަސް ދުއްވުން، ދަފިނެގުން، ކޯޑި ކުޅުން، ދެލިމާލި ހެދުންފަދަ އެތައް ހަރަކާތެއްވެސް މި އަހަރު ވެލިދޫގައި ކުރިއަށް ގެންދިއުމަށް ވަނީ ހަމަޖެހިފަ އެވެ.
މި އަހަރު ވެލިދޫގެ އީދު ހަރަކާތްތަކާއި، ތައްޔާރީތައް އަދި އީދު ކުރިއަށްދާ ގޮތް "އަދަދު" އިން ގެނެސްދެމުން ގެންދާނެ އެވެ.
ދެހާސް ފަސް ސަތޭކައަށްވުރެ މީހުންގެ އެކުވެރި އާބާދީއެއް އޮންނަ ވެލިދޫއަކީ އީދު ފާހަގަކުރުމުގައި އަބަދުވެސް ފާހަގަކޮށްލެވޭ ރަށެކެވެ. އީދުގެ ދުވަސްތަކަށް ވެލިދޫއަށް ކޮންމެ އަހަރަކު މާލެއިން އަދި އަތޮޅުގެ ރަށްރަށާއި ކައިރި އަތޮޅުތަކުން އެތައް ހާސް މެހެމާނުންނެއް ވެލިދޫއަށް ޒިޔާރަތްކުރެ އެވެ.
