ރައްޔިތުންގެ މަޖިލީހުގެ ރައީސް އަދި ނައިބު ރައީސް ނެތް ހާލަތެއްގައި 20 ވަނަ މަޖިލީހުގެ ރިޔާސަތު ބަލަހައްޓަވާނެ ފަސް މެންބަރުންގެ ނަންތައް ތަރުތީބުކޮށް މިއަދު އިއުލާނުކޮށްފި އެވެ.
މި ފަސް މެންބަރުންގެ ނަން އިއުލާނުކުރެއްވީ މަޖިލީހުގެ ރައީސް އަބްދުއްރަހީމް އަބްދުﷲ އެވެ.
މަޖިލީހުގެ ގަވާއިދު ބުނާގޮތުން ރިޔާސަތު ބަލަހައްޓާ ފަސް މެންބަރުން ކަނޑައަޅާނީ މަޖިލީހުގައި މެދުނުކެނޑި އެންމެ ގިނަ ދުވަހު މަސައްކަތް ކޮށްފައިވާ މެންބަރުންގެ ތަރުތީބުންނެވެ. ހިދުމަތުގެ މުއްދަތު އެއްވަރު ވެއްޖެނަމަ ބަލާނީ މެންބަރުންގެ އުމުރަށެވެ.
20 ވަނަ މަޖިލީހުގެ ރިޔާސަތު ބަލަހައްޓަވާ ފަސް މެންބަރުން
- މީދޫ ދާއިރާގެ މެންބަރު އަހުމަދު ސިޔާމް މުހައްމަދު (ފެބްރުއަރީ 27، 2005 އިން ފެށިގެން މެދުނުކެނޑި 19 އަހަރާއި ތިން މަސް ދުވަސް)
- މާމިގިލި ދާއިރާގެ މެންބަރު ގާސިމް އިބްރާހިމް (މެއި 28، 2009 އިން ފެށިގެން މެދުނުކެނޑި 15 އަހަރު)
- އޭދަފުށީ ދާއިރާގެ މެންބަރު އަހުމަދު ސަލީމް (މެއި 28، 2009 އިން ފެށިގެން މެދުނުކެނޑި 15 އަހަރު)
- ހަނިމާދޫ ދާއިރާގެ މެންބަރު އަބްދުލްގަފޫރު މޫސާ (މެއި 28، 2009 އިން ފެށިގެން މެދުނުކެނޑި 15 އަހަރު)
- މަހިބަދޫ ދާއިރާގެ މެންބަރު އަހުމަދު ތޯރިގު (މެއި 28، 2014 އިން ފެށިގެން މެދުނުކެނޑި 10 އަހަރު)
އެޕްރީލް 21، ގައި ބޭއްވި މަޖިލިސް އިންތިހާބުގައި ޕީއެންސީއިން 66 ގޮނޑި ކާމިޔާބު ކުރި އިރު، އަމިއްލަ ގޮތުން ވާދަކޮށް އިންތިހާބު ކާމިޔާބު ކުރި އަށް މެންބަރަކު ވަނީ ޕީއެންސީއާ ގުޅިފަ އެވެ. އޭގެ ތެރޭގައި ސަރުކާރުގެ ތާއީދު އޮވެގެން ވާދަކުރި މީހުން ވެސް ހިމެނެ އެވެ. މި މެންބަރުންނާއެކު އެކު ޖުމްލަ މިވަގުތު ޕީއެންސީގެ 75 މެންބަރަކު މަޖިލީހުގައި އެބަތިއްބެވެ.
ހަމައެހެންމެ ޖޭޕީގެ ލީޑަރު ގާސިމް އިބްރާހިމް އާއި އެމްއެންޕީގެ ލީޑަރު މުހައްމަދު ނާޒިމްގެ އިތުރުން އެމްޑީއޭގެ ލީޑަރު އަހުމަދު ސިޔާމް މުހައްމަދުގެ އިތުރުން އެ ޕާޓީއަށް ނިސްބަތްވާ ވެލިދޫ ދާއިރާގެ މެންބަރު މުހައްމަދު އައްބާސް ވެސް މަސައްކަތް ކުރައްވަނީ ސަރުކާރާ އެކީގަ އެވެ.
މިއާއެކު 20 ވަނަ މަޖިލީހުގައި ސަރުކާރުން ބޭނުންވާ ގޮތަށް ވޯޓު ދޭން މަޖިލީހުގައި ތިބޭނެ މެމްބަރުންގެ އަދަދު ވަނީ 79 އަށް އަރަ އެވެ. މިއީ މިދިޔަ މަޖިލީހުގައި އެމްޑީޕީއަށް ލިބުނު ވަރަށް ވުރެ ވެސް ބޮޑު އަގުލަބިއްޔަތެކެވެ. އިދިކޮޅު އެމްޑީޕީއަށް މިފަހަރުގެ މަޖިލިސް އިންތިހާބުގައި ކާމިޔާބު ކުރެވިފައިވަނީ އެންމެ 12 ގޮނޑި އެވެ.
