ރައްޔިތުންގެ މަޖިލީހުގެ ރައީސްގެ ހައިސިއްޔަތުން ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ، އަދި ރައްޔިތުންގެ މަޖިލީހުން ކަނޑައެޅި މެންބަރުގެ ހައިސިއްޔަތުން މާފުށި ދާއިރާގެ މެންބަރު ހުސައިން ރިޒާ އާދަމް، ޖުޑީޝަލް ސާވިސް ކޮމިޝަން (ޖޭއެސްސީ) ގެ މެންބަރު ކަމުގެ ހުވާ ކުރައްވައިފި އެވެ.
ގާނޫނު އަސާސީގައި ޖޭއެސްސީގެ އެކުލެވުން ބަޔާންކޮށްފައި އޮންނަ ގޮތުން އެ ކޮމިޝަނުގައި މަޖިލީހުގެ ރައީސް އިންނަވަން ޖެހެ އެވެ. އަބްދުއްރަހީމް، ކޮމިޝަނުގެ މެންބަރުގެ ހުވާ ކުރެއްވީ އެހެންވެ އެވެ. އަދި މަޖިލީހުން ކަނޑައަޅާ މެންބަރަކު ވެސް ހިމެނެ އެވެ. ރިޒާއަކީ 20 ވަނަ މަޖިލީހުން ކަނޑައެޅި މެންބަރެވެ.
ރައީސް އޮފީހުގައި ބޭއްވި ރަސްމިއްޔާތެއްގައި އަބްދުއްރަހީމާއި ރިޒާއަށް އެ މަގާމުގެ ހުވާ ލައިދެއްވީ ސުޕްރީމް ކޯޓުގެ ފަނޑިޔާރު ޑރ. މުހައްމަދު އިބްރާހީމެވެ. މަގާމަށް އައްޔަން ކުރައްވައި މަގާމުގެ ލިޔުންކޮޅު ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
މިއާ އެކީ، ޖޭއެސްސީގައި މިހާރު ސަރުކާރުގެ ހަތަރު މެމްބަރުން ތިއްބަވާނެ އެވެ. ރައީސުލްޖުމްހޫރިއްޔާގެ މެންބަރުގެ ހައިސިއްޔަތުން އެ ކޮމިޝަނުގައި ވަކީލު މުހައްމަދު ސަމީރު އިންނަވަ އެވެ. އަދި ބަންޑާރަ ނައިބު އަހުމަދު އުޝާމް ވެސް އެ ކޮމިޝަނުގައި އިންނަވަ އެވެ.
ވިހިވަނަ ރައްޔިތުންގެ މަޖިލީހުގެ ސުޕަ މެޖޯރިޓީ ޕީއެންސީއަށް އޮތް އިރު، އާ މަޖިލީހުން އާންމުންގެ ތެރެއިން މީހަކު ވެސް ޖޭއެސްސީއަށް ކަނޑައަޅަން ޖެހެ އެވެ. އެ މަސައްކަތް މި މަޖިލީހުން އަދި ކުރިއަކަށް ނުގެންދެ އެވެ.
ޖޭއެސްސީ އެކުލެވިގެންވާ ގޮތާއި މިހާރު ތިބި މެންބަރުން
- ރައްޔިތުންގެ މަޖިލީހުގެ ރައީސް (އަބްދުއްރަހީމް އަބްދުﷲ)
- ރައްޔިތުންގެ މަޖިލީހުގެ މެންބަރެއް (ހުސައިން ރިޒާ އާދަމް)
- މަޖިލީހުން ކަނޑައަޅާ އާންމު މީހެއް (ކުރީގެ މަޖިލީހުން ކަނޑައެޅި ޑރ. އުލްމުކުލްސޫމް)
- ސިވިލް ސާވިސް ކޮމިޝަންގެ ރައީސް (މުހައްމަދު ނާސިހު)
- ބަންޑާރަ ނައިބު (އަހުމަދު އުޝާމް)
- ރައީސުލްޖުމްހޫރިއްޔާ އައްޔަންކުރައްވާ ވަކީލެއް (މުހައްމަދު ސަމީރު)
- ވަކީލުން އިންތިހާބުކުރާ ވަކީލެއް (އަލީ އަބްދުއްލަތީފް)
- ސުޕްރީމް ކޯޓުގެ ފަނޑިޔާރެއް (ފަނޑިޔާރު ހުސްނުއްސުއޫދު)
- ހައި ކޯޓުގެ ފަނޑިޔާރެއް (ފަނޑިޔާރު މުހައްމަދު ނިޔާޒު)
- ދަށު ކޯޓުތަކުން ފަނޑިޔާރެއް (ފަނޑިޔާރު އަލީ ޝަރީފް)
ޖުޑިޝަލް ސާވިސް ކޮމިޝަނަކީ ފަނޑިޔާރުންގެ ސުލޫކީ ކަންކަން ބެލުމާއި މަގާމުގެ ކުރިއެރުން ދިނުމާއި ވަކިކުރުމާއި އާ ފަނޑިޔާރުން އައްޔަން ކުރުމުގެ މަސައްކަތްތައް މަތިކޮށްފައި އޮންނަ މުއައްސަސާ އެވެ. އެ ކޮމިޝަނުގައި ސިޔާސީ ބޭފުޅުން ތިއްބަވާތީ އެ ކޮމިޝަން މެދުވެރިކޮށް ކޯޓުތަކަށް ސިޔާސީ ނުފޫޒު ފޯރުވުމަކީ، ކޮންމެ ވެރިކަމެއްގައި ވެސް އަމާޒުވާ ތުހުމަތެކެވެ.
މިޔަ ސަރުކާރުން ވެސް ވައުދުވެފައިވާ ގޮތަށް އެކަމަކު ނުފުއްދާފައިވާ އެ ވައުދު ފުއްދުމަކީ ރައީސް ޑރ. މުހައްމަދު މުއިއްޒުގެ ވެސް ވައުދުފުޅެކެވެ. އެމަނިކުފާނު ވިދާޅުވެފައިވަނީ އެ ކޮމިޝަނުގައި މަގާމުގެ ހައިސިއްޔަތުން އަންނަ އެއްވެސް މީހަކު ނުހިމެނޭ ގޮތަށް ކޮމިޝަނުގެ އެކުލެވުން ބަދަލުކުރާނެ ކަމަށެވެ.
ބެލެވޭ ގޮތުގައި ސަރުކާރުގެ ލެޖިސްލެޓިވް އެޖެންޑާގައި އެ ބިލު ހިމަނާނެ އެވެ. އެޖެންޑާ އަދި ބަންޑާރަ ނައިބުގެ އޮފީހުން އާންމެއް ނުކުރެ އެވެ.
