ލަންޑަން (ޖޫން 4) - މި މަހު ފަށާ ޔޫރޯ ފުޓްބޯޅަ މުބާރާތަށް ތައްޔާރުވުމުގެ ގޮތުން، ރޭ ކުޅުނު މެޗުތަކުން އިންގްލެންޑުން 3-0 އިން ބޮސްނިއާ ބަލިކުރިއިރު، ޖަރުމަނުން ޔޫކްރެއިނާ ދެކޮޅަށް ކުޅުނު މެޗު ލަނޑެއް ނުޖެހި 0-0 އިން އެއްވަރުވެއްޖެ އެވެ.
އިންގްލެންޑުން ރޭ ބޮސްނިއާ ކޮޅަށް ތިން ގޯލު ވެސް ޖެހީ މެޗުގެ ދެ ވަނަ ހާފުގަ އެވެ. ގިނަ ބަދަލުތަކާ އެކު ކުޅުނު އިންްގްލެންޑަށް ރޭގެ މެޗުގައި ލީޑުނަގައިދިނީ، 60 ވަނަ މިނިޓްގައި ޕެނަލްޓީ އަކުން ކޯލް ޕާމާ އެވެ. މިއީ، ޗެލްސީގައި މި ސީޒަނު މޮޅު ކުޅުމެއް ދެއްކި ޕާމާ، އިންގްލެންޑުގެ ސީނިއާ ޓީމަށް ޖަހައިދިން ފުރަތަމަ ގޯލެވެ. މި ޕެނަލްޓީ ދިނީ، ބޮސްނިއާގެ ކުޅުންތެރިން، އިނގިރޭސި ޑިފެންޑަރު، އެޒްރީ ކޮންސާ ޖޯޒީގައި ހިފެހެއްޓުމުން، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފަ އެެވެ.
މެޗުގައި، އިނގިރޭސި ކޯޗު، ގަރެތު ސައުތުގޭޓް ގިނަ ބަދަލުތަކެއް ގެނައިއިރު، އެ ޓީމުން، ފަހު ދެ ލަނޑު ޖެހީ، މެޗުގެ ފަހު ފަސް މިނިޓް ތެރޭގަ އެވެ. އެ ގޮތުން، މެޗުގެ 85 ވަނަ މިނިޓްގައި އިންގްލެންޑްގެ ދެ ވަނަ ލަނޑު ޖެހީ، ޓްރެންޓް އަލެކްސަންޑަ އާނޯލްޑް އެވެ. އާނޯލްޑް، މެޗު ފެށީ މެދުތެރެއިންނެވެ. އެކަމަކު، މެޗު ނިންމާލިއިރު، ކުޅުނީ، އޭނާ އާންމުކޮށް ކުޅޭ މަގާމު ކަމަށްވާ ކަނާތު ބެކަށެވެ.
އިންގްލެންޑްގެ ފަހު ގޯލު ޖެހީ، 89 ވަނަ މިނިޓްގައި ހެރީ ކޭން އެވެ. ކޭން ކުޅެން ނުކުތީ ދެ ވަނަ ހާފުގައި ބަދަލަކަށެވެ.
އަމިއްލަ ދަނޑުގައި ކުޅުނު ޖަރުމަނު ޓީމަށް ރޭގެ މެޗުގައި ލަނޑު ޖަހައިދޭން، އިލްކާއި ގުންޑޮގާން އާއި މެކްސިމިލިއަން ބާއިއާ އަށް ރަނގަޅު ފުރުސަތުތަކެއް ލިބިގެންދިޔަ އެެވެ. މީގެ ތެރެއިން، ބާއިއާ އަށް ލިބުނު ފުރުސަތުގައި ޖެހި ބޯޅަ، ޔޫކްރެއިންގެ ކީޕަރު، އަނަޓޯލީ ޓްރޫބިން ވަނީ މަތަކޮށްފަ އެވެ.
މިއީ ޔޫކްރެއިނާ އެކު މިހާތަނަށް ޖަރުމަނުން ކުޅުނު 10 މެޗުގެ ތެރެއިން ލަނޑެއް ނުޖެހި ނިންމާލަން ޖެހުނު ދެ ވަަނަ ފަހަރެވެ. ގަތަރުގައި 2022 ވަނަ އަހަރުގެ ބޭއްވި ފީފާ ވޯލްޑް ކަޕަށް ފަހު ޖަރުމަނުން ކުޅުނު 14 މެޗުގެ ތެރެއިން މޮޅުވީ އެންމެ ފަސް މެޗުންނެވެ. އަނެއްކޮޅުން، ޔޫކްރެއިންގެ ކޯޗުކަމަށް ސާހެއި ރެބްރޯވް ހަވާލުވި ފަހުން، އެ ޓީމުން ކުޅުނު 11 މެޗުގެ ތެރެއިން ބަލިވީ އެންމެ ފަހަރަކު އެވެ.
