ރާއްޖޭގެ މަސްވެރިކަން ކުރިއެރުވުމަށާއި ދިވެހި ކަނޑުގެ ދިރާސާތައް ކުރުމުގައި އެހީތެރިކަން ފޯރުކޮށްދިނުމާ ގުޅޭގޮތުން ޗައިނާގެ ޝަންހާއި އޯޝަން ޔުނިވާސިޓީއާއެކު ފިޝަރީޒް މިނިސްޓަރީން މިއަދު ބައްދަލުވުމެއް ބާއްވައިފި އެވެ.
ޝަންހާއީ އޯޝަންގެ ފަރާތުން އެ ޔުނިވާސިޓީގެ ޗެއާމަން، ވަންގް ހޮންޒޫއާއި ބައެއް އިސްވެރިން ބައިވެރިވެވަޑައިގެންނެވި އެ ބައްދަލުވުމުގައި ރާއްޖޭގެ ފަރާތުން ބައިވެރިވެވަޑައިގެންނެވީ ސްޓޭޓް މިނިސްޓަރު، ޑރ. އަޒްމަރު އަހުމަދާއި ޑެޕިއުޓީ މިނިސްޓަރު، އަހުމަދު ޝާފިއު އެވެ.
މިއަދުގެ ބައްދަލުވުމުގައި ވަންގް ހޮންޒޫ ވަނީ ރާއްޖޭގެ މަސްވެރިކަމުގައ ދާއިރާއާއި ކަނޑުގެ ދިރާސާތަކަށް ފަންނީ ގޮތުންނާއި އެހެނިހެން ގޮތްގޮތުން އެހީތެރިކަން ފޯރުކޮށްދިނުމަށް ޝައުގުވެރިކަން ފާޅުކުރައްވައި މަސްވެރިކަމާ ގުޅޭ ގޮތުން ކިޔަވާ ދިވެހި ދަރިވަރުންނަށް ޝަންހާއީ އޯޝަންގެ ޑިގްރީ ކޯސްތަކުގައި ކިޔެވުމަށް ދައުވަތު ދެއްވައިފަ އެވެ.
އެ ވާހަކަތަކުގެ ތެރެއިން ހޮންޒޫ ވަނީ ދިވެހި ޒުވާނުން މަސްވެރިކަމާއި ކަނޑުގެ ދިރާސާތައް ކުރުމަށް ޝައުގުވެރި ކުރުވުމުގެ ގޮތުން އެކްސްޗޭންގު ޕްރޮގުރާމުތަކެއް ހިންގުމުގެ ހިޔާލު ފާޅު ކުރައްވައި އެފަދަ ޕްރޮގުރާމުތަކަށް އެ ޔުނިވާސިޓީން މަރުހަބާ ކިޔާނެ ކަމަށް ވިދާޅުވެފަ އެވެ.
އަދި ރައީސް ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި ޗައިނާ އާއި ރާއްޖެ ގުޅިގެން މެރިން ރިސާޗު ދާއިރާ ކުރިއެރުވުމަށް ކުރެވުނު މަޝްވަރާތައް ހަގީގަތަކަށް ހެދުމަށޤ ޝަންހާއީ ޔުނިވާސިޓީގެ ފުރިހަމަ އެއްބާރުލުން ލިބޭނެ ކަމަށް ހޮންޒޫ ވިދާޅުވި އެވެ.
އޭގެއިތުރުން ވަންގު ހޮންޒޫ ވަނީ ރާއްޖޭގެ ފިޝަރީޒް މިނިސްޓަރީން ބޭނުންވާ މެނޭޖުމަންޓު ދާއިރާއިންނާއި އެހެނިހެން ދާއިރާތަކުން މީހުން ބިނާ ކުރުމަށާއި ރާއްޖޭގައި ގާއިމު ކުރުމުގެ މަސައްކަތް ކުރަމުން އަންނަ ފިޝަރީޒް ކޮލެޖަށް އެކި ދާއިރާތަކުން އެހީތެރިކަން ފޯރުކޮށްދެއްވާނެ ކަމަށް ވިދާޅުވެފަ އެވެ.
އެގޮތުން ފިޝަރީޒް ކޮލެޖުގައި ކިޔަވައިދޭނެ ލެކްޗަރާއިން ތަމްރީނު ކުރުމާއި އެކިއެކި ދިރާސާތައް ކުރުމުގައި އެހީތެރިކަން ފޯރުކޮށްދެއްވަން ބޭނުންވާކަން ހޮންޒޫ ފާހަގަކުރެއްވި އެވެ.
އެ ބައްދަލުވުމުގައި ރާއްޖޭގެ ފަރާތުން ޑރ. އަޒްމަރު ވަނީ ދިވެހި މަސްވެރިކަން ކުރިއެރުވުމަށް މި ސަރުކާރުން ކުރަމުންދާ ކަންކަން ހިއްސާ ކުރައްވައި ރާއްޖޭގެ ކަނޑުގެ ވަސީލަތްތައް ރަނގަޅު ގޮތުގައި ބޭނުން ކުރުމަށް ގިނަ ދިރާސާތަކެއް ކުރަންޖެހޭކަން ފާހަގަކުރައްވައިފަ އެވެ.
ބައްދަލުވުން ނިންމަވައިލައްވަމުން ޑރ. އަޒްމަތު ވަނީ ރާއްޖޭގެ ކަނޑު ދިރާސާ ކުރުމަށް ޗައިނާގެ އެހީތެރިކަން ބޭނުންވާ ކަމަށާއި ރާއްޖެއަށް ބޭނުންވާ އޯޝަން ޑިވެލޮޕްމަންޓު ޕްލޭން އެކުލަވައިލުމުގައި ވެސް ޗައިނާގެ އެހީތެރިކަން ބޭނުންވާ ކަމަށް ވިދާޅުވެފަ އެވެ.
ބައްދަލުވުން ނިންމައިލީ މަސްވެރިކަމާއި ކަނޑާ ގުޅޭ ދާއިރާތަކުން ގުޅިގެން މަސައްކަތް ކުރުމަށް ޝަންހާއީ އޯޝަން ޔުނިވާސިޓީއާ ފިޝަރީސް މިނިސްޓަރީއާއެކު އެމްއޯޔޫއެއްގައި ސޮއި ކުރުމުގެ މަސައްކަތް ފެށޭނެކަމުގެ ފެހި ސިގުނަލާ އެކުގައި ކަމަށް ފިޝަރީޒް މިނިސްޓަރީން ބުންޏެވެ.
ޝަންހާއި އޯޝަން ޔުނިވާސިޓީއަކީ މެރިން ސައިންސްގެ ދާއިރާއިން ދުނިޔޭގައި ފާހަގަކޮށްލެވޭ ޔުނިވާސިޓީ އެކެވެ. އެ ޔުނިވާސިޓީން ދަނީ ދުނިޔޭގެ އެކި ކަންކޮޅުގައި ހުންނަ 150 އަށްވުރެ ގިނަ ޔުނިވާސިޓީތަކާ އެކު މަސައްކަތް ކުރަމުންނެވެ.
