ޕެރިސް (ޖޫން 2) - އަންނަ މަހު ފްރާންސްގެ ޕެރިހުގައި ފަށާ އޮލިމްޕިކްސްގެ ފުޓްބޯޅަ އިވެންޓްގައި ފްރާންސް ޓީމަށް ކުޅެން ބޭނުންވިޔަސް ގަދަބާރުން އެކަން ކުރުމުގެ ވިސްނުމެއް ނެތް ކަމަށް މަޝްހޫރު ފޯވާޑް އެންޓޮއިން ގްރީޒްމަން ބުނެފި އެވެ.
އޮލިމްޕިކްސްގެ ފުޓްބޯޅަ އިވެންޓަކީ، 23 އަހަރުން ދަށަށް ހާއްސަ މުބާރާތެއް ނަމަވެސް، ސީނިއާ ތިން ކުޅުންތެރިންނަށް ލިބޭ ޖާގައިގެ ތެރެއިން، މަޝްހޫރު ކުޅުންތެރިން އަންނަނީ އެ މުބާރާތުގައި ކުޅެމުންނެވެ.
ފްރާންސްގައި މި ފަހަރުގެ އޮލިމްޕިކްސް އޮތުމުން، މަޝްހޫރު ކުޅުންތެރިން އަންނަނީ އޮލިމްޕިކްސްގައި ކުޅުމުގެ ޝައުގުވެރިކަން ފާޅުކުރަމުންނެވެ.
"އަހަރެން ވަރަށް ބޮޑަށް ބޭނުންވޭ އޮލިމްޕިކްސްގައި ކުޅެން. އެއީ ހުވަފެނެއް، އެކަމަކު، މީގެ ގޮތެއް ނިންމާނީ ކްލަބުން. އަހަންނަށް މި ވަގުތު ފެންނަން އޮތް ގޮތުން، ކްލަބަކުން އެ ގޮތަށް ބޭނުމެއް ނުވޭ،" ފްރާންސާ އެކު މި މަހު ފަށާ ޔޫރޯ ފުޓްބޯޅަ މުބާރާތަށް ތައްޔާރުވަމުން އަންނަ ގްރީޒްމަން ބުންޏެވެ.
އޮލިމްޕިކްސް އަކީ، ސީނިއާ ފުޓްބޯޅަ އިވެންޓަކަށްނުވާއިރު، ގައުމީ ޓީމަށް ކުޅުންތެރިން ވީއްލަން ޖެހޭ، އުސޫލުން ކްލަބްތަކުން، އޮލިމްޕިކްސް އަށް ކުޅުންތެރިން ދޫކުރަން ލާޒިމެއް ނުކުރެ އެވެ. އެހެންކަމުން، އޮލިމްޕިކްސްގައި ކުޅޭ ކުޅުންތެރިން، ކްލަބުން ދޫކުރުން އޮންނަނީ އެ ކްލަބެއްގެ މެނޭޖްމަންޓްގެ އިހުތިޔާރީ ކަމަކަށްވެފަ އެވެ.
"ގަދަ ހަދައިގެން އަހަރެން އޮލިމްޕިކްސް އަށް ދާން ނުވިސްނަން، ކްލަބުން ގޮތެއް ނިންމީމަ އިހުތިރާމްކުރާނަން. އަހަރެން އެދެނީ ޔޫރަޕްގައި އަހަރެންގެ އެންމެ ފަހު ކްލަބަކީ، އެތުލެޓިކޯ އަށް ވާން،" ގްރީޒްމަން ބުންޏެވެ.
