އިޒްރޭލުން ފަލަސްތީނަށް ދެމުން އަންނަ ހަނގުރާމަ ހުއްޓާލަން އެމެރިކާއިން ހުށަހެޅި އެއްބަސްވުން އިޒްރޭލާއި ހަމާސްއިން ގަބޫލުކުރަން ގަތަރު، މިސްރު އަދި އެމެރިކާއިން ވެސް ގޮވާލައިފި އެވެ.
އެމެރިކާގެ ރައީސް ޖޯ ބައިޑެން އިޒްރޭލާއި ހަމާސްއަށް ހުށަހަޅާފައިވާ އެއްބަސްވުމުގައި ހަނގުރާމަ ހުއްޓާލަން ޖުމްލަ ތިން ފޭސްއެއް ވަނީ ހިމަނާފަ އެވެ.
އޭގެ ތެރޭގައި، ފުރަތަމަ ފޭސްގައި ހަނގުރާމަ އެއްކޮށް ހަ ހަފްތާއަށް ހުއްޓާލައި، ގާޒާގެ ގިނަ މީހުން ތިބޭ ސަރަހައްދުތަކުން އިޒްރޭލުގެ ސިފައިން ފޭބުން ހިމެނެ އެވެ. އަދި ގާޒާގައި ތިބި އިޒްރޭލުގެ މީހުންނާއި އިޒްރޭލުގައި ތިބި ފަލަސްތީނު މީހުން ބަދަލު ކުރުން ހިމެނެ އެވެ.
މީގެ އިތުރުން މި ފޭސްގައި ފަލަސްތީނުގެ ރައްޔިތުންނަށް ގާޒާގެ ހުރިހާ ސަރަހައްދުތަކަށް ދިޔުމަށް ފުރުސަތުދީ، ދުވާލަކު އެހީގެ 600 ލޮރީ ގާޒާއަށް ވަނުމަށް ފުރުސަތު ދޭނެ އެވެ.
ދެވަނަ ފޭސްގައި ދެ ގައުމުގައި ވެސް ހިފަހައްޓާފައި ތިބި ރައްޔިތުން ބަދަލު ކުރުމަށް އެއްބަސްވުމަކަށް ދާން ޖެހެ އެވެ. އަދި އިޒްރޭލުގެ ހުރިހާ ސިފައިން ގަޒާއިން ފައިބަން މި ފޭސްގައި ޖެހެ އެވެ.
ތިން ވަނަ ފޭސްގައި އަރަބި ގައުމުތަކާއި ދުނިޔޭގެ އެކި ގައުމުތަކުގެ އެހީއާއެކު ގާޒާ އަލުން އާރާސްތުކުރަން ފަށާފައިރު، ދެ ގައުމުގައި ވެސް މަރުވެފައި ތިބި މީހުން އަނބުރާ ގައުމަށް ފޮނުވާނެ އެވެ.
މި އެއްބަސްވުމުގެ ވާހަކަ ބައިޑެން މީގެ ދެ ދުވަސް ކުރިން ވިދާޅުވެފައިވާއިރު، ހަމާސްއިން ބުނީ މިހާތަނަށް އެ އެއްބަސްވުން ލިޔުމުން ލިބިފައި ނުވާ ކަމަށެވެ.
އެއްބަސްވުމާ ގުޅޭގޮތުން ގޮތެއް ނިންމުމަށް އިޒްރޭލުގެ ކެބިނެޓުން ބައްދަލުވުމެއް ބޭއްވުމަށް ވަނީ ހަމަޖެހިފަ އެވެ.
ފަލަސްތީނަށް އިޒްރޭލުން ދެމުން އަންނަ ހަމަލާތަކުގައި މިހާތަނަށް ފަލަސްތީނުގެ 36،1379 މީހުން މަރުވެފައިވާއިރު، އޭގެ ތެރޭގައި ގިނައިން ހިމެނެނީ އަންހެނުންނާއި ކުޑަކުދިންނެވެ.
