އިންޑިއާގެ އާންމު އިންތިހާބުގެ އެގްޒިޓް ޕޯލުން ދައްކާ ގޮތުން އިންޑިއާގެ ބޮޑުވަޒީރު ނަރެންދުރަ މޯދީގެ ބީޖޭޕީ އިސްކޮށް އޮވެ އުފައްދާފައިވާ އިއްތިހާދު، ނެޝަނަލް ޑިމޮކްރަޓިކް އެލަޔަންސް (އެންޑީއޭ) އަށް އަގުލަބިއްޔަތު ލިބޭނެ ކަމަށް ދައްކައިފި އެވެ.
އިންޑިއާގެ އާންމު އިންތިހާބުގައި ގާނޫނު ހަދާ މަޖިލިސް، ލޮކް ސަބާގެ 543 ގޮނޑިއަށް މެންބަރުން އިންތިހާބު ކުރާއިރު، އޭގެ ތެރެއިން 272 ގޮނޑި ލިބޭ ޕާޓީއަކަށް މެޖޯރިޓީ ލިބޭނެ އެވެ.
ވޯޓު ލާފައިވާ މީހުންގެ ސާވޭއިން ދައްކާ ގޮތުގައި މޯދީގެ ކޯލިޝަން، އެންޑީއޭ ނިސްބަތްވާ 355 އާއި 380 އާ ދެމެދުގެ އަދަދެއްގެ ކެންޑިޑޭޓުން ގޮނޑި ކާމިޔާބު ކުރައްވާނެ އެވެ. ނަމަވެސް އިދިކޮޅުން ވަނީ އެ ނަތީޖާ ގަބޫލުކުރަން ދެކޮޅު ހަދައިފަ އެވެ.
އިންޑިއާގެ ބޮޑެތި ހުރިހާ ނޫސްތަކުން ވަނީ މޯދީ ޕްރޮމޯޓު ކުރަން އިސް ދައުރެއް އަދާކޮށްފައިވާ ކަމަށާއި، އިންތިހާބަށް އެކި ގޮތްގޮތުން ނުފޫޒު ފޯރުވާފައި ކަމަށް އިދިކޮޅު ޕާޓީތަކުން ތުހުމަތުކުރެ އެވެ.
މިދިޔަ ދެ ދައުރުގައި ވެސް އިންޑިއާގެ އިންތިހާބު ކާމިޔާބުކުރި އެންޑީއޭ އިންނެވެ. އެ އިއްތިހާދުން 2019 ގެ އިންތިހާބުގައި 353 ގޮނޑި ކާމިޔާބު ކުރިއިރު، އޭގެ ތެރެއިން 303 ގޮނޑި ލިބުނީ ބީޖޭޕީ އަށެވެ.
ހަތް މަރުހަލާ އަކަށް ބަހާލައިގެން ކުރިއަށްގެންދިޔަ އިންޑިއާގެ އިންތިހާބުގައި 969 މިލިއަނެއްހާ މީހުންނަށް ވޯޓުލުމުގެ ހައްގު ލިބުނެވެ. އިންތިހާބުގެ ނަތީޖާ އަންގާރަ ދުވަހު ގުނުމަށް ހަމަޖެހިފައި ވާއިރު، އެ ދުވަހު ނަތީޖާ އިއުލާން ކުރާނެ އެވެ.
