ސްވިމިން އެސޯސިއޭޝަން އޮފް މޯލްޑިވްސްގެ ރައީސްގެ މަގާމަށް ހަތަރު ވަނަ ދައުރަކަށް މުހައްމަދު އަބްދުއްސައްތާރު (ޗަމްޕީ) އިންތިހާބުވެވަޑައިގެންފި އެވެ.
ސްވިމިން އެސޯސިއޭޝަންގެ އިންތިހާބު މިއަދު ކުރިއަށްގެންދިޔައިރު، ކޮންމެ މަގާމަކަށް ވެސް ކުރިމަތިލީ އެންމެ ފަރާތެއް ކަމުން ނެގީ ފެންނަ ނުފެންނަ ވޯޓެކެވެ.
އެ ގޮތުން، މީގެ 12 އަހަރު ކުރިން، އެންމެ ފުރަތަމަ ސްވިމިން ރައީސަކަށް އިންތިހާބުވި، ސައްތާރު، ހަތަރު ވަނަ ދައުރަކަށް އެ އެސޯސިއޭޝަންގެ ރައީސްގެ މަގާމަށް އިންތިހާބުވީ، މިއަދުގެ ވޯޓުގައި ބައިވެރިވި، 66 މެމްބަރުންގެ ތެރެއިން 64 ވޯޓާ އެކު އެވެ. ނުފެންނަ ކަމަށް ދެ މެމްބަރަކު ވޯޓު ދިނެވެ.
މޯލްޑިވްސް އޮލިމްޕިކް ކޮމިޓީގެ ރައީސްގެ މަގާމު ވެސް ފުރުއްވަމުން އަންނަ ސައްތާރު، މި ފަހަރު މަގާމަށް ހޮވިވަޑައިގެންނެވީ، ކުރިން ފަހަރަށް ވުރެ ގިނަ ވޯޓު ހޯއްދަވައިގެންނެވެ.
މި ފަހަރުގެ އިންތިހާބުގައި ވޯޓުލި 96.97 ޕަސެންޓް ވޯޓު ސައްތާރަށް ލިބިވަޑައިގެންނެވި އެވެ.
މިއަދު ބޭއްވި ސްވިމިންގެ އިންތިހާބީ ޖަލްސާގައި ސައްތާރު ވާހަކަ ދައްކަވަނީ،--- ފޮޓޯ: ސްވިމިން އެސޯސިއޭޝަން
ސްވިމިން އެސޯސިއޭޝަންގެ ނައިބު ރައީސަކަށް އިންތިހާބުވީ، މިހާރު ވެސް އެ މަގާމު ފުރުއްވަމުން އަންނަ، އިސްމާއިލް އަލީ އެވެ. އޭނާ އަށް ވޯޓުގައި ބައިވެރިވި، 66 މެމްބަރުންގެ ތެރެއިން 63 ވޯޓު ލިބުނެވެ.
ހިންގާ ކޮމިޓީގެ އެހެން މަގާމުތަކަށް އިންތިހާބުވި މެމްބަރުންނަށް ބަލާއިރު، ފަރުދީ މެންބަރުން ރިޕްރެޒެންޓްކުރާ އަންހެން މެންބަރަކަށް ރަހީމާ އާދަމް، ފަރުދީ މެމްބަރުން ރިޕްރެޒެންޓްކުރާ ފިރިހެން މެމްބަރަކަށް މުހައްމަދު ނައްވާރު އިބްރާހިމް، ޓެކްނިކަލް އޮފިޝަލުން ތަމްސީލްކުރާ މެމްބަރުކަމަށް ހަސަން ސިރާރު އެވެ.
މީގެ އިތުރުން، ކޯޗުން ތަމްސީލްކުރާ މެމްބަރަކަށް އަހުމަދު ފިރާސް އަފީފް، އަދި ހަޒާންދާރަކަށް، އަލީ ޝަމީމް ވަނީ އިންތިހާބުކޮށްފަ އެވެ. އަދި ދެ ވަނަ ފަހަރަށް ކުރިމަތިލާން ހުޅުވާލައިގެން، ކެންޑިޑެސީ ހުށަހަޅައި، އިންތިހާބުގައި ވާދަކޮށް ކްލަބް ރިޕްރެޒެންޓްކުރާ މެމްބަރެއްގެ ގޮތުގައި އިންތިހާބުވީ، އަލީފް އަބްދުﷲ ނަސީމް އެވެ.
ހަޒާންދާރަކަށް ޝަމީމް އިންތިހާބުވީ، 66 މެމްބަރުންގެ ތެރެއިން 63 ވޯޓު ހޯދައިގެންނެވެ. ކްލަބް ރިޕްރެޒެންޓްކުރާ މެމްބަރަކަށް އަލީފް އިންތިހާބުވީ، ވޯޓުގައި ބައިވެރިވި ހަތަރު މެމްބަރުންގެ ވެސް ތާއީދާ އެކުގަ އެވެ.
ސްވިިމިން އެސޯސިއޭޝަންގެ ހިންގާ ކޮމިޓީ އަށް އިންތިހާބުވި މެމްބަރުން: ޓެކްނިކަލް އޮފިޝަލުން ތަމްސީލްކުރާ މެމްބަރު، ސިރާރު މިއަދުގެ ޖަލްސާގައި ބައިވެރިވެވަޑައިނުގެންނެވީ، މުބާރާތެއްގެ މަސައްކަތުގައި ރަށުންބޭރުގައި ހުންނެވުމުން ކަމަށް، އެސޯސިއޭޝަނުން ވަނީ މައުލޫމާތުދީފައި.--- ފޮޓޯ: ސްވިމިން އެސޯސިއޭޝަން
ކޯޗުންގެ ރިޕްރެޒެންޓްކުރާ ފަރާތަކަށް، ފިރާސް އިންތިހާބުވީ، 14 މެމްބަރުންގެ ތެރެއިން 13 ވޯޓު ހޯދައިގެންނެވެ. ޓެކްނިކަލް އޮފިޝަލުން ރިޕްރެޒެންޓްކުރާ މެމްބަރަކަށް ސިރާރު ހޮވުނީ، ވޯޓުލި 13 މެމްބަރުންގެ ވެސް ތާއީދާ އެކުގަ އެވެ.
ފަރުދީ މެންބަރުން ރިޕްރެޒެންޓްކުރާ އަންހެން މެންބަރަކަށް ރަހީމާ އިންތިހާބުވީ، 62 މެމްބަރުންގެ ތެރެއިން 60 ވޯޓު ހޯދައިގެންނެވެ. އަދި ފަރުދީ މެމްބަރުން ރިޕްރެޒެންޓްކުރާ ފިރިހެން މެމްބަރަކަށް ނައްވާރު އިންތިހާބުވީ، 62 މެމްބަރުންގެ ތެރެއިން 59 ވޯޓު ހޯދައިގެންނެވެ.
އަލަށް އިންތިހާބުވި ހިންގާ ކޮމިޓީގެ ހަތަރު އަހަރުގެ ދައުރު ފަށާނީ އަންނަ މަހުގެ 25 އިން ފެށިގެންނެވެ.
