ރައީސް ޑރ. މުހައްމަދު މުއިއްޒުގެ މައިގަނޑު އެއްވެސް ވައުދެއް ނުފުއްދޭނެ ކަމަށް ކުރީގެ ހޯމް މިނިސްޓަރު އަދި މިދިޔަ ރިޔާސީ އިންތިހާބުގައި ވާދަކުރެއްވި އުމަރު ނަސީރު ވިދާޅުވެއްޖެ އެވެ.
"އަދަދު" ގެ "އެތެރެފުށް" ޕްރޮގްރާމުގައި އުމަރު ވިދާޅުވީ ރައީސް މުއިއްޒުގެ ގެދޮރުވެރިކަމުގެ ވައުދު ނުފުއްދޭނެކަން ޔަގީނާ ގާތަށް ބުނަން އެނގޭ ކަމަށާއި، ރަސްމާލެއާ ގުޅޭ ގޮތުން ދައްކަވާ ވާހަކަތަކަކީ ފައިސާ ނެތް ދަނޑިވަޅެއްގައި ބުއްދިއަށް ގަބޫލުކުރެވޭ ވާހަކަތަކެއް ނޫން ކަމަށެވެ.
ރާއްޖެއަށް 2008 ގައި ސިޔާސީ ޕާޓީތައް އައި ފަހުން ހުރިހާ ވެރިކަމެއްގައި ވެސް މީހުންގެ ވޯޓުތައް ހޯދުމަށް ހިންގަން ނުޖެހޭ ބައިވަރު މަޝްރޫއުތަކާއެކު ދައުލަތް އޮތީ ވަރަށް ބޮޑަށް ދަރާފައި ކަމަށް އުމަރު ވިދާޅުވި އެވެ.
"އަޅުގަނޑަކަށް ނުފެނޭ ރައީސް މުއިއްޒުގެ މައިގަނޑު އެއްވެސް ވައުދެއް ފުރިހަމަވާނެކަމަކަށެއް. މިސާލަކަސް ހައުސިން. ގެދޮރުގެ ވައުދު އަޅުގަނޑު ޔަގީނާ ގާތަށް މިދަންނަވަނީ އެކަމެއް ނުވާނެއޭ. ރަސްމާލެ ހިއްކާ ސިޓީއަކަށް ބަދަލުކުރުން ނޮންސެންސް ހަމަ. ނުވާނެ. އެ ދޭތެރޭގައި ޓަނަލްއެއް އެޅުން އިމްޕޮސިބަލް. ނުވާނެ އެކަންތަކެއް. ސަބަބަކީ ފައިސާ ނެތުން،" އުމަރު ވިދާޅުވި އެވެ.
ރައީސް މުއިއްޒުއާ ކުރިމަތިވެފައި ވަނީ މާލީގޮތުން ވަރަށް ބޮޑު ޗެލެންޖެއްކަން ފާހަގަކުރައްވާ އުމަރު ވިދާޅުވީ ހަމައެކަނި އޮތް ގޮތަކީ ދަރަނި ނެގުން ކަމަށެވެ.
ނަމަވެސް އުމަރު ވިދާޅުވީ ދަރަނި ނެގުމަށް ބަލާއިރު ސަރުކާރަށް ބޮޑެތި ޕްރޮޖެކްޓުތަކަށް ބޮޑެތި އަދަދުތަކުން ދޭން ޗައިނާއިން ބޭނުން ނުވާ ކަމަށާއި، އެއީ ޗައިނާއަށް ލަންކާއަށް ވީ ގޮތް ވެސް އެނގޭތީ ކަމަށެވެ.
"ދިވެހިރާއްޖޭގެ ސަރުކާރު ކުޑަކޮށް، ހަރަދު ކުޑަކޮށް، އިސްރާފު ޕްރޮޖެކްޓުތައް ހިންގުން ހުއްޓާލައި، ހިނގަ ހިނގާހުރި ޕްރޮޖެކްޓުތައް ވެސް ހުއްޓާލައި މަޑުޖައްސާ ފަސް އަހަރު ފަހަތަށް ޖައްސާލަންޖެހޭނެ އެއްވެސް ޝައްކެއް ނޯންނާނެ،" އުމަރު ބުންޏެވެ.
މީގެއިތުރުން ދަރަނީގެ އަނދަވަޅުން އަރައިގަންނަން ސިޔާސީ ބޭނުންތަކަށް އުފައްދާފައިވާ ފެނަކަ އާއި ވެމްކޯ ކަހަލަ ކުންފުނިތައް އުވާލަން ޖެހޭ ކަމަށް ވެސް އުމަރު ވިދާޅުވި އެވެ.
