ދޮށީ އުމުރުގެ މީހުންގެ އާބާދީ އިތުރުވުމާ ދިމާލަށް މިސްރާބު ހިފާފައި ވާއިރު, އިސްރަށްވެހިން ޝާމިލުވާނެހެން ގައުމުގެ ކަންތައްތައް ބައްޓަންވާން ޖެހޭ ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
އޭޖްޑް ކެއާ މޯލްޑިވްސްގެ 20 ވަނަ އަހަރީ ދުވަހުގެ މުނާސަބާގައި ރޭ ބޭއްވި ޖަލްސާގައި ފައިސަލް ނަސީމް ވިދާޅުވީ, މިހާރު ޒުވާނުންގެ ގޮތުގައި ތިބި މީހުން އިސްރަށްވެހިންގެ ގޮތުގައި ބަދަލުވެގެންދާއިރު, އެ އާބާދީ ވަރަށް ބޮޑަށް އިތުރުވެގެން ދާނެ ކަމަށެވެ.
އެހެންކަމުން އެކަމާ މެދު ވިސްނާ, އިސްރަށްވެހިން ޝާމިލުވާހެން ގައުމުގެ ކަންތައްތައް ބައްޓަންވާން ޖެހޭކަން އޭނާ ފާހަގަކުރެއްވި އެވެ.
ފައިސަލް ވިދާޅުވީ ދިވެހި ގައުމާއި, ގައުމު މިހާރު އޮތް ހިސާބަށް އައީ ކިހިނެތްކަން ވިސްނަން ޖެހޭ ކަމަށެވެ. އަދި އެއީ ހަމަ މޮޅުކަމުން ހާސިލު ކުރެވުނު ކަންތައްތަކެއް ނޫން ކަމަށާއި, އެއީ އެތައް ބައެއްގެ މަސައްކަތުން ހާސިލު ކުރެވުނު ކަންތައްތަކެއްކަން އޭނާ ފާހަގަކުރެއްވި އެވެ.
"އަޅުގަނޑުމެން ވިސްނާލަންޖެހޭ, އަޅުގަނޑުމެންގެ ގައުމު, އަޅުގަނޑުމެންނަށް ދަސްވި އެއްޗެއް, އަޅުގަނޑުމެން ހިނގަން މިފެށި މަގު ހޯދައިގަތީ ކިހިނެތްތޯ؟ ހަމަ ހިތަށް އަޅުގަނޑުމެންގެ މޮޅުކަމުން, ހަމައެކަނި މޮޅުކަމުން ކަމެއް ކުރެވެނީތޯ, އެއްގޮތަކަށް ވެސް ނޫން. އެނގުނު އެއްޗެއް އެނގުނީ, ދަސްވި އެއްޗެއް ދަސްވީ, ކުރެވުނު މޮޅުކަމެއް ކުރެވުނީ ވަރަށް ގިނަ ބަޔަކު ކޮށްފައިވާ މުހިންމު މަސައްކަތްތަކާއި ތަޖުރިބާތަކެއް ގާތުން ފެނިގެން, އެކަންތައްތައް ދަސްކުރީ," އޭނާ ވިދާޅުވި އެވެ.
ގައުމަށް މުހިންމު ހިދުމަތްތަކެއް ކޮށްދެއްވި ގިނަ ބަޔަކު ވަކިވެގެން ގޮސްފައިވާކަން ފާހަގަކުރައްވާ ފައިސަލް ވިދާޅުވީ އެފަދަ މީހުން ކުރެއްވި ހިދުމަތްތައް ފޮތެއްގެ ސިފައިގައި ނަމަވެސް ޒުވާން ކުދިންނަށް ކިޔައިދޭން ޖެހޭ ކަމަށެވެ. ގައުމީ ކަންތައްތައް ދިރުވަމުން ދާއިރު މިފަދަ ކަންކަމކީ ތައުލީމީ ނިޒާމުގެ ތެރެއިން ދިރުވަން ޖެހޭ ކަމެއް ކަމަށް ފައިސަލް ވިދާޅުވި އެވެ.
