އިންޑިއާގެ ވެރި ރަށް ނިއު ދިއްލީއަށް ރެކޯޑު މިންވަރަކަށް ހޫނުމިން މައްޗަށް ގޮސްފައިވާ ކަމަށް އެ ގައުމުގެ މޫސުމާބެހޭ ގައުމީ އިދާރާއިން މިއަދު ބުނެފި އެވެ.
އިންޑިއާ މީޓިއަރޮލޮޖިކަލް ޑިޕާޓްމަންޓް (އައިއެމްޑީ) އިން ބުނީ ދިއްލީގައި ހޫނުމިން 52.3 ޑިގްރީ ސެލްސިއަސްއަށް އަރައިގެން ގޮސްފައިވާއިރު، މިއީ މިހާތަނަށް މުޅި އިންޑިއާގައި ވެސް ހޫނުމިން އެންމެ މަތިވި ފަހަރު ކަމަށެވެ.
އިންޑިއާގައި މީގެކުރިން ހޫނުމިން އެންމެ މަތިވެފައި ވަނީ 2016 ގައި ރާޖަސްތާނުގަ އެވެ. އެއީ 51 ޑިގްރީ ސެލްސިއަސް އެވެ.
އިންޑިއާގައި ހޫނުމިން މަތިވުމާ ގުޅިގެން ގިނަ ސްޓޭޓުތަކުގައި ސްކޫލްތައް ވަނީ ބަންދުކޮށްފަ އެވެ. އަދި ބައެއް ސްޓޭޓުތަކުގައި ގެއިން މަސައްކަތް ކުރުމަށް ވެސް ވަނީ އަންގާފަ އެވެ.
އިންޑިއާގެ ހޫނުމިން މަތިވެފައި މިވަނީ އެ ގައުމުގެ އާންމު އިންތިހާބު ވެސް ކުރިއަށްދާ ދަނޑިވަޅެއްގަ އެވެ. އެ އިންތިހާބު ހަތް ފޭސްއަކަށް ބަހާލައިގެން ކުރިއަށްދާއިރު، މިހާރު ވަނީ ހަ ފޭސްގެ ވޯޓުލުން ނިމިފަ އެވެ.
އިންޑިއާގައި އާންމުކޮށް ހޫނުމިން މައްޗަށް ދަނީ އެޕްރިލް، މެއި އަދި ޖޫން މަހު އެވެ. މިގޮތުން ބައެއް ސަރަހައްދުތަކުގައި ފެނުގެ ދަތިކަން ވެސް އަންނަނީ ދިމާވެ، ބައެއް ސަރަހައްދުތަކުން ފެން ހުސްވެދާނެތީ ފިޔަވަޅުތައް އަޅަމުންނެވެ.
